ଦୁବାଇ,୧୭।୧୦: ଭେଟେରାନ ବ୍ୟାଟର ସୁରେଶ ରାଇନ ସମ୍ଭବତଃ ଆଗାମୀ ସିଜନରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଦଳରୁ ବାଦ୍ ପଡ଼ିପାରନ୍ତି। ରୁତୁରାଜ ଗାଏକ୍ୱାଡ ଓ ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କୁ ରିଟେନ ସିଏସ୍କେ ରିଟେନ କରିବ। ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ମଧ୍ୟ ରଖାଯାଇପାରେ। କିନ୍ତୁ ଏହା ୨୦୨୨ ଆଇପିଏଲର ରିଟେନଶନ ପଲିସି ଉପରେ ନିର୍ଭର କରେ। ଯଦି ଫ୍ରାଞ୍ଚାଇଜମାନଙ୍କୁ ୩ ଖେଳାଳି ରିଟେନ କରିବାକୁ ଦିଆଯାଏ, ତେବେ ଧୋନୀଙ୍କୁ ୩ୟ ଖେଳାଳି ଭାବେ ରଖାଯିବ। ଏହାବାଦ୍ ଅମ୍ବାତି ରାୟୁଡୁ, ଫାଫ ଡୁ’ପ୍ଲେସି, ଶାର୍ଦ୍ଦୁଳ ଠୁକର, ଦୀପକ ଚହର ଓ ୩୮ ବର୍ଷୀୟା ଡ୍ବେନ ବ୍ରାଭୋଙ୍କୁ ସିଏସ୍କେ ଅକଶନରେ ଟାର୍ଗେଟ କରିବ ବୋଲି ସିଏସ୍କେର ନିକଟସ୍ଥ ସୂତ୍ରରୁ କୁହାଯାଇଛି।
ଆଇପିଏଲରେ ଦୁଇଟି ନୂଆ ଫ୍ରାଞ୍ଚାଇଜ ସାମିଲ ହେଉଥିବାରୁ ୨୦୨୨ ସଂସ୍କରଣରେ ପ୍ରାୟତଃ ଖେଳାଳିଙ୍କୁ ଅକଶନର ସମ୍ମୁଖୀନ ହେବାକୁ ପଡ଼ିବ। ଏହି ପ୍ରକ୍ରିୟାରେ ରାଇନାଙ୍କ ପ୍ରତି ସିଏସ୍କେ ଇଛା ପ୍ରକଟ ନ କରିପାରେ। ଆଇପିଏଲରେ ଚେନ୍ନାଇ ପାଇଁ ସର୍ବାଧିକ ୪୬୮୭ ରନ୍ କରିଥିବା ରାଇନା ଚଳିତ ସିଜନରେ ସମ୍ପୂର୍ଣ୍ଣ ବିଫଳ ହୋଇଥିଲେ। ଏପରି କି ମିଷ୍ଟର ଆଇପିଏଲ ଭାବେ ଜଣାଶୁଣା ରାଇନାଙ୍କୁ ଚଳିତ ଆଇପିଏଲର ପ୍ଲେ-ଅପ୍ରେ ମଧ୍ୟ ଖେଳିବାକୁ ସୁଯୋଗ ଦିଆଯାଇ ନ ଥିଲା।