ଭବାନୀପାଟଣା,୧୮।୪(ଉତ୍ତମ କୁମାର ଦାଶ)କଳାହାଣ୍ଡିବାସୀ ମେଡ଼ିକାଲ କଲେଜ ଆରମ୍ଭ ହେବାରୁ ଖୁସୀ ହୋଇଥିଲେ। ହେଲେ ଜିଲା ହସ୍ପିଟାଲ ଓ ଶହୀଦ ରେଣ୍ଡୋ ମାଝି ମେଡ଼ିକାଲ କଲେଜ ମଧ୍ୟରେ ସମନ୍ବୟ ନ ରହିବା ଯୋଗୁ ଅଧିକାଂଶ ରୋଗୀ ଅନ୍ୟ ମେଡ଼ିକାଲ କଲେଜକୁ ରେଫର ହେଉଥିବାବେଳେ ବହୁ ସମୟରେ ଗୁରୁତର ରୋଗୀ ହସ୍ପିଟାଲରେ ଠିକ ସମୟରେ ଚିକିତ୍ସା ନ ପାଇ ହଇରାଣ ହେଉଛନ୍ତି। ଏପରି କି ମୃତ୍ୟୁ ମୁଖରେ ପଡୁଛନ୍ତି। ସେହିପରି ମେଡ଼ିକାଲ କଲେଜରେ ଓ ଜିଲା ହେଡକ୍ୱାଟର ହସ୍ପିଟାଲରେ ସି ଆର୍ମ ମେଶିନ ନ ଥିବାରୁ ଅସ୍ଥି ଶଲ୍ୟ ବିଭାଗରେ ଗୋଟିଏ ବି ଅସ୍ତ୍ରୋପଚାର ହୋଇ ପାରୁନାହିଁ। ଗତ ୧ ବର୍ଷ ହେଲା ମେଡ଼ିକାଲ କଲେଜ ଖୋଲିଲାଣି। କଲେଜର ୫ଜଣ ବିଶେଷଜ୍ଞ ଡାକ୍ତର ଥିବାବେଳେ ଜଣେ ହେଡକ୍ୱାଟର ହସ୍ପିଟାଲରେ ନିଯୁକ୍ତି ପାଇଛନ୍ତି। ହେଲେ ଉପରୋକ୍ତ ମେଶିନ ନ ଥିବାରୁ ୧୦୦ ପ୍ରତିଶତ ଅସ୍ଥି ଶଲ୍ୟ ଅସ୍ତ୍ରୋପଚାର ସବୁ ଅନ୍ୟ ମେଡ଼ିକାଲ କଲେଜକୁ ରେଫର ହେଉଛି, ନ ହେଲେ ଲୋକେ ବେସରକାରୀ ହସ୍ପିଟାଲକୁ ଯାଇ ଅଧିକ ଖର୍ଚ୍ଚରେ ପଡୁଛନ୍ତି। ଏମିତି କି ଛୋଟ ଅସ୍ତ୍ରୋପଚାର ବି ହୋଇ ପାରୁନାହିଁ। ଲୋକେ କହୁଛନ୍ତି ମେଡ଼ିକାଲ କଲେଜର ଲାଭ କ’ଣ ବୋଲି ପ୍ରଶ୍ନ କରୁଛନ୍ତି। ପୂର୍ବରୁ ଏକ ଆର୍ମ ମେଶିନ ବହୁ ବର୍ଷ ତଳେ ଥିଲା। ଏହାର ରକ୍ଷଣା ବେକ୍ଷଣା ଅଭାବ ଏବଂ ବ୍ୟବହାର ନ ହେବାରୁ ଖରାପ ହୋଇ ପଡିଛି। ଏହି ପୁରୁଣା କାଳିଆ ମେଶିନ ମରାମତି ବି ହୋଇ ପାରୁନାହିଁ। ଫଳରେ ଅସ୍ତ୍ରୋପଚାର ବନ୍ଦ ରହିଛି। ଏହା ଦ୍ୱାରା ଏହି ବିଭାଗ ବିଶେଷଜ୍ଞଙ୍କ ହାତ ବି ବନ୍ଦ ହୋଇଯାଇଛି। ମେଡ଼ିକାଲ କଲେଜକୁ ଡାକ୍ତର ହେବା ପାଇଁ ପଢିବାକୁ ଆସୁଥିବା ଡାକ୍ତରୀ ଛାତ୍ର ବି କିଛି ଶିଖି ପାରୁ ନାହାନ୍ତି। ଜିଲାରେ ପ୍ରତିଦିନ ବହୁ ଦୁର୍ଘଟଣା ଘଟି ଲକୋଙ୍କ ହାଡ଼ ଗୋଡ଼ ଭାଙ୍ଗୁଛି। ଅଧିକାଂଶ ଅସ୍ତ୍ରୋପଚାର ଆବଶ୍ୟକତା ହେଉଛି। ହେଲେ ଏଠି ମେଶିନ ଅଭାବରୁ ହୋଇ ପାରୁନାହିଁ। ସ୍ବାସ୍ଥ୍ୟ ବିଭାଗ ପକ୍ଷରୁ ମେଶିନର ମୂଲ୍ୟ ବହୁତ ଅଧିକ ଥିବାରୁ କିଣା ଯାଇପାରୁ ନ ଥିବା କୁହାଯାଇଛି। ବହୁ ସମୟରେ ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ସମୀକ୍ଷା ହେଉଛି। ହେଲେ ଏହି ସମସ୍ୟା ଗୁରୁତ୍ୱ ଦିଆ ନ ଯିବାକୁ ଲୋକେ ନା ପସନ୍ଦ କରିଛନ୍ତି। ବର୍ତ୍ତମାନ କଲେଜ ସହ ଜିଲା ହେଡକ୍ୱାଟର ହସ୍ପିଟାଲ ଯୋଡି ହୋଇ ରହିଛି। କିନ୍ତୁ ବହୁ ସମୟରେ ସମନ୍ବୟ୍ର ଅଭାବ ଦେଖାଦେଇଛି। ଯାହା ନେଇ ହଇରାଣ ହେଉଥିବା ରୋଗୀ ଅଭିଯୋଗ କଲେ ମଧ୍ୟ କେହି ପଦକ୍ଷେପ ନେଉ ନାହାନ୍ତି ବୋଲି ଲୋକେ ଅଭିଯୋଗ କରିଛନ୍ତି। ଏ ସମ୍ପର୍କରେ ଦାୟିତ୍ୱରେ ଥିବା ଜିଲା ମୁଖ୍ୟ ଚିକିତ୍ସା ଅଧିକାରୀ ଡ଼ ନିହାରେନ୍ଦ୍ର ପଣ୍ଡାଙ୍କୁ ପଚାରିବାରୁ ମେଶିନ ନ ଥିବାରୁ ଅସ୍ତ୍ରୋପଚାର ହେଇ ପାରୁ ନ ଥିବା କହିଛନ୍ତି। ଏହା ପାଇଁ ପ୍ରସ୍ତାବ ଦିଆହୋଇଛି ବୋଲି କହିଛନ୍ତି।