ଲଣ୍ଡନ,୫।୧: ଏଣିକି ଗର୍ଭାଶୟ କର୍କଟ ଚିହ୍ନଟ କରିବା ହେବ ଆହୁରି ସହଜ। ଲଣ୍ଡନର ଇମ୍ପେରିଆଲ କଲେଜର ବିଶେଷଜ୍ଞମାନେ ଏକ ବିଶେଷ ପ୍ରକାର ସର୍ଜିକାଲ ନାଇଫ୍ (ଛୁରି) ତିଆରି କରିଛନ୍ତି, ଯାହା ମାତ୍ର କିଛି ସେକେଣ୍ଡ ମଧ୍ୟରେ ଗର୍ଭାଶୟ କର୍କଟ ବା ଟ୍ୟୁମର ଚିହ୍ନଟ କରିବ। ବ୍ରେଷ୍ଟ ଏବଂ ବ୍ରେନ୍ କ୍ୟାନ୍ସର ଚିକିତ୍ସା କ୍ଷେତ୍ରରେ ଆଇନାଇଫ୍ ବ୍ୟବହାର କରାଯାଇଥିବା ଗବେଷକଙ୍କ ପକ୍ଷରୁ କୁହାଯାଇଛି। ଆଇ ନାଇଫ୍ ବିଷୟରେ ବିସ୍ତୃତ ବିବରଣୀ କ୍ୟାନ୍ସର ଜର୍ନାଲରେ ପ୍ରକାଶ ପାଇଛି।
ବର୍ତ୍ତମାନ ସମୟରେ ମହିଳାଙ୍କ କ୍ଷେତ୍ରରେ ଗର୍ଭାଶୟ କର୍କଟ ଏକ ସାଧାରଣ ରୋଗ ଭାବେ ଉଭା ହୋଇଛି। ପ୍ରତିବର୍ଷ ବ୍ରିଟେନ୍ରେ ପ୍ରାୟ ୯,୦୦୦ ମହିଳା ଏହି ରୋଗରେ ଆକ୍ରାନ୍ତ ହେଉଥିବାବେଳେ ସେମାନଙ୍କ ମଧ୍ୟରୁ ମାତ୍ର ୧୦%ଙ୍କଠାରେ କର୍କଟର ଲକ୍ଷଣ ଦେଖାଯାଏ। କିନ୍ତୁ ବାକି ମହିଳା ଲାଷ୍ଟ ଷ୍ଟେଜ୍ ବେଳକୁ ରୋଗ ସମ୍ପର୍କରେ ଜାଣିବାକୁ ପାଆନ୍ତି। ତେବେ ଏ ପ୍ରକାର ସ୍ଥିତିରେ ଆଇନାଇଫ୍ ଉପଯୋଗୀ ସାବ୍ୟସ୍ତ ହେବ।
ଇଲେକ୍ଟ୍ରକ୍ କରେଣ୍ଟ ଦ୍ୱାରା ପରିଚାଳିତ ଏହି ଛୁରି ସହଜରେ ସୁସ୍ଥ ଟିସୁଗୁଡ଼ିକ ଭିତରୁ କ୍ୟାନ୍ସର ସେଲ୍କୁ ଚିହ୍ନଟ କରିଥାଏ। ବାୟୋପ୍ସି ବେଳେ ଗର୍ଭାଶୟରୁ ଧୂଆଁ ବାହାରିଥାଏ। କ୍ୟାନ୍ସର ଚିକିତ୍ସାରେ ଆଇନାଇଫର ବ୍ୟବହାର ବଢ଼ାଇବା ସକାଶେ ବିଶେଷଜ୍ଞଙ୍କ ପକ୍ଷରୁ ମେଜର କ୍ଲିନିକାଲ ଟ୍ରାଏଲ କରାଯିବାର ଯୋଜନା ରହିଛି। କର୍କଟ ରୋଗର ଚିହ୍ନଟ ପାଇଁ ଅନେକ ପରୀକ୍ଷା କରାଯାଏ। ଏହାପରେ ରିପୋର୍ଟ ଆସିଲାବେଳକୁ ଚିକିତ୍ସା ପାଇଁ ବହୁ ବିଳମ୍ବ ହୋଇଯାଇଥାଏ। ନିଜର ସମୟ ରକ୍ଷା କରିବା ଏବଂ ଜଟିଳ ସ୍ଥିତି ଉପୁଜିବା ପୂର୍ବରୁ ଚିକିତ୍ସା ଆରମ୍ଭ କରିଦେବା ପାଇଁ ଆଇନାଇଫ୍ ବେଶ୍ ଲାଭପ୍ରଦ ବୋଲି ଗବେଷଣା ମୁଖ୍ୟ ଆଥେନା ଲାମନିସୋସ କହିଛନ୍ତି।