ରାୟଗଡ଼ା ଅଫିସ,୨୮ା୬: ବୟସ ମାତ୍ର ୭ ବର୍ଷ। ହେଲେ ମହାକାଶ, ସୌରମଣ୍ଡଳ ବିଷୟରେ ରହିଛି ଗଭୀର ଜ୍ଞାନ। ମହାକାଶର ସୃଷ୍ଟି, ଏହାର ସ୍ଥିତି ଏବଂ ପୃଥିବୀ ଧ୍ୱଂସ ଆଦି ବିଷୟରେ ଏହି ବାଳକଙ୍କ ଜ୍ଞାନ ଅବିଶ୍ୱସନୀୟ। ଉକ୍ତ ବିସ୍ମୟ ବାଳକ ହେଲେ ରାୟଗଡ଼ା ସହର କଲେକ୍ଟରେଟ୍ ରୋଡ୍ ନିବାସୀ ଗୌରହରି ନାଥଙ୍କ ସୁପୁତ୍ର ବିଭୁନନ୍ଦନ ନାଥ।
ଦ୍ୱିତୀୟ ଶ୍ରେଣୀରେ ପଢ଼ୁଥିବା ବିଭୁଙ୍କ ବିଜ୍ଞାନ କ୍ଷେତ୍ରରେ ଏତେ ଆଗ୍ରହ ରହିଛି ବୋଲି ପ୍ରଥମେ ପରିବାର ଲୋକେ ମଧ୍ୟ ଆଭାସ ପାଇ ନ ଥିଲେ। ହେଲେ ବଡ଼ଭଉଣୀଙ୍କୁ ଘରେ ଟ୍ୟୁଶନ ପଢ଼ାଉଥିବା ଶିକ୍ଷକ ଅରବିନ୍ଦ ଟାକ୍ରି ବାଳକଙ୍କ ଜ୍ଞାନକୁ ଜାଣିପାରିଥିଲେ। ଭଉଣୀ ନିକଟରେ ବସି ସେ ଶିକ୍ଷକଙ୍କଠାରୁ ଅନେକ ଜ୍ଞାନ ଆହରଣ କରୁଥିଲେ। ଏପରିକି ସେ ଶିକ୍ଷକଙ୍କୁ ବିଜ୍ଞାନ ବିଷୟରେ ଅନେକ ଆଶ୍ଚର୍ଯ୍ୟଜନକ ପ୍ରଶ୍ନ ପଚାରୁଥିଲେ, ଯାହାର ଉତ୍ତର ସାର୍ଙ୍କ ନିକଟରେ ମଧ୍ୟ ନ ଥିଲା। ପରେ ଶିକ୍ଷକ ବିଭିନ୍ନ ସମୟରେ ବିଭୁଙ୍କୁ କେତେକ ପ୍ରଶ୍ନ ପଚାରିଥିଲେ। ବାଳକ ସମସ୍ତ ପ୍ରଶ୍ନର ଅତି ଚମତ୍କାର ଉତ୍ତର ରଖୁଥିଲେ। ପୃଥିବୀ ଧ୍ୱଂସ ହେଲେ କ’ଣ ହୁଏ, ୨ଟି ତାରା ମିଶିଲେ କିଭଳି ଆଲୋକ ଜାତ ହୁଏ ଭଳି ଅନେକ ପ୍ରଶ୍ନର ଉତ୍ତର ତାଙ୍କ ନିକଟରେ ରହିଛି। ଏହା ଜାଣିବା ପରେ ଅରବିନ୍ଦ ଏ ବିଷୟରେ ବିଭୁଙ୍କ ମା’, ବାପାଙ୍କୁ ଜଣାଇଥିଲେ। ଏହାକୁ ନେଇ ସେମାନେ ବେଶ୍ ଖୁସି ବ୍ୟକ୍ତ କରିବା ସହ ପୁଅକୁ ଏ କ୍ଷେତ୍ରରେ ଅଧିକ ଉତ୍ସାହିତ କରୁଥିବା କୁହନ୍ତି। ଏତେ କମ୍ ବୟସରେ ଅନେକ ଜ୍ଞାନ ହାସଲ କରିଥିବା ବିଭୁ ଭବିଷ୍ୟତରେ ‘ନାସା’ରେ ଯୋଗଦେଇ ଗବେଷଣା କରିବାକୁ ଲକ୍ଷ୍ୟ ରଖିଥିବା କହିଛନ୍ତି। ପୁଅର ଉତ୍ସାହ ଦେଖି ପରିବାର ଲୋକେ ମଧ୍ୟ ବେଶ୍ ଆଶାବାଦୀ। ବାପା ଗୌରହରି କହିଛନ୍ତି, ପୁଅ ଦୀର୍ଘ ୨ ବର୍ଷ ହେଲା ମୋବାଇଲ ମାଧ୍ୟମରେ ୟୁଟ୍ୟୁବ୍ ଏବଂ ଗୁଗଲରୁ ବିଭିନ୍ନ ଭିଡିଓ ଦେଖୁଥଲା। ହେଲେ ଛୋଟ ପିଲା କ’ଣ ଦେଖୁଛି ବୋଲି ଆମେ ଏହାକୁ ଗୁରୁତ୍ୱ ଦେଇ ନ ଥିଲୁ।