ମାଲକାନଗିରି,୨୪।୯ (ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା ସୀମାନ୍ତ ଛତିଶଗଡ଼ର ସୁକ୍ମା ଜିଲା ପୋଲିସ ନିକଟରେ ଶନିବାର ୨ଜଣ ଜନମିଲିସିଆ ମାଓବାଦୀ ଆତ୍ମସମର୍ପଣ କରିଛନ୍ତି। ସେମାନେ ହେଲେ ତାତି ଜଗା ଓ ଦୁଧି ମୁକା। ଏହି ୨ଜଣ କିସ୍ତାରାମ ଥାନା ଅଞ୍ଚଳ ନିବାସୀ ହୋଇଥିବା ବେଳେ ଦୀର୍ଘଦିନ ଧରି ମାଓବାଦୀ କାର୍ଯ୍ୟକଳାପରେ ସମ୍ପୃକ୍ତ ଥିଲେ। ତେବେ ପୋଲିସର କୋମ୍ବିଂ ଅପରେଶନ ପରେ ତାତି ଓ ଦୁଧି ଅପରେଶନ କାର୍ଯ୍ୟାଳୟକୁ ଯାଇ ଆତ୍ମସମର୍ପଣ କରିଥିଲେ। ଉଭୟଙ୍କୁ ସରକାରଙ୍କ ଥଇଥାନ ନୀତି ଅନୁଯାୟୀ ସମସ୍ତ ପ୍ରକାର ସୁବିଧା ମିଳିିବ ବୋଲି ସୁକ୍ମା ପୋଲିସ ପ୍ରକାଶ କରିଛି। ସେମାନଙ୍କ ଆତ୍ମସମର୍ପଣ ସମୟରେ ଦ୍ୱିତୀୟ କମାଣ୍ଡ ଅଧିକାରୀ ଦିନେଶ କୁମାର, କୋବ୍ରା ବାହିନୀର ଅତିରିକ୍ତ କମାଣ୍ଡାଣ୍ଟ ହେମନ୍ତ ପ୍ଲାସ୍ ଓ ଅତିରିକ୍ତ ଏସ୍ପି ଉତ୍ତମ ପ୍ରତାପ ସିଂ ଉପସ୍ଥିତ ଥିଲେ।