ନୂଆଦିଲ୍ଲୀ,୨୩।୧ : ଅବିବାହିତ ମହିଳାମାନେ ମଧ୍ୟ ସରୋଗେସିର ଅଧିକାର ପାଇବା ଉଚିତ କି? ସୁପ୍ରିମକୋର୍ଟ ଏହି ମାମଲାର ପରୀକ୍ଷଣ କରିବାକୁ ପ୍ରସ୍ତୁତ ଅଛନ୍ତି। ଏହାର ଉତ୍ତର ଲୋଡି କୋର୍ଟ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି। ଅବିବାହିତା ମହିଳାଙ୍କୁ ସରୋଗେସି ପାଇବାକୁ ରୋକିବା ପାଇଁ ସରୋଗେସି ଆକ୍ଟର ବ୍ୟବସ୍ଥାକୁ ଚ୍ୟାଲେଞ୍ଜ କରି ଏକ ଆବେଦନ ଉପରେ ସୁପ୍ରିମକୋର୍ଟ ଏକ ବିଜ୍ଞପ୍ତି ଜାରି କରିଛନ୍ତି। ଅବିବାହିତା ମହିଳାଙ୍କୁ ’ଇଚ୍ଛା କରୁଥିବା ମହିଳା’ଙ୍କର ସଂଜ୍ଞାରୁ ବାଦ ଦେଇଥିବା ସରୋଗେସି ଆକ୍ଟ, ୨୦୨୧ ର ବ୍ୟବସ୍ଥାକୁ ଚ୍ୟାଲେଞ୍ଜ କରାଯାଇଛି। ଏହି ନିୟମ ଅନୁଯାୟୀ ଇଚ୍ଛୁକ ମହିଳାମାନଙ୍କ ମଧ୍ୟରେ ଏଭଳି ଭାରତୀୟ ମହିଳା ଅଛନ୍ତି ଯେଉଁମାନଙ୍କର ବୟସ ୩୫ ରୁ ୪୫ ବର୍ଷ ମଧ୍ୟରେ। ସେମାନେ ବିଧବା କିମ୍ବା ଛାଡପତ୍ର ପାଇଛନ୍ତି ଏବଂ ସରୋଗେସି ଅଧିକାର ପାଇବାକୁ ଚାହୁଁଛନ୍ତି।
ଅବିବାହିତା ମହିଳାଙ୍କ ଦ୍ୱାରା ଦାଖଲ ହୋଇଥିବା ଆବେଦନ ଉପରେ ନୋଟିସ ଜାରି କରିବାବେଳେ ଜଷ୍ଟିସ ଅଜୟ ରାସ୍ତୋଗୀ ଏବଂ ଜଷ୍ଟିସ ବେଲା ଏମ ତ୍ରିବେଦୀଙ୍କ ନେତୃତ୍ୱରେ ଗଠିତ ଏକ ବେଞ୍ଚ କହିଛନ୍ତି ଯେ ଏହି ଆବେଦନପତ୍ରର ଏକ ନକଲ ଅତିରିକ୍ତ ସୋଲିସିଟର ଜେନେରାଲ ଐଶ୍ୱର୍ଯ୍ୟା ଭଟ୍ଟଙ୍କ କାର୍ଯ୍ୟାଳୟରେ ଉପଲବ୍ଧ ହେବ। ପୂର୍ବରୁ ମଧ୍ୟ ସମାନ ମାମଲା ଦେଖିବାକୁ ମିଳିଛି।
ଏହି ଆବେଦନରେ ମହିଳାମାନେ କହିଛନ୍ତି ଯେ କେବଳ ବିବାହିତ ମହିଳାଙ୍କୁ ଏହି ଅଧିକାର ପ୍ରଦାନ କରି ବିଧବା ଏବଂ ଛାଡପତ୍ର ପାଇଥିବା ମହିଳା ତଥା ଅବିବାହିତା ମହିଳାଙ୍କୁ ଏନେଇ ବାରଣ କରିବା ଯୋଗୁ ସମାନତା ଅଧିକାର ସହ ଜଡିତ ସମ୍ବିଧାନର ଧାରା ୧୪କୁ ଉଲ୍ଲଂଘନ କରାଯାଉଛି। ଏହି ଆବେଦନରେ ଏହା ମଧ୍ୟ କୁହାଯାଇଛି ଯେ, ଏପରି ବ୍ୟବସ୍ଥା ଜଣେ ମହିଳାଙ୍କର ସ୍ବାଧୀନତା ଅଧିକାର ଏବଂ ତାଙ୍କର ପ୍ରଜନନ ନିଷ୍ପତ୍ତି ଉପରେ ନିୟନ୍ତ୍ରଣକୁ ଉଲ୍ଲଂଘନ କରୁଛି। ଅବିବାହିତା ମହିଳାଙ୍କୁ ସରୋଗେସି ଅଧିକାରରେ ଅନ୍ତର୍ଭୁକ୍ତ କରିବା ପାଇଁ ଆଇନ କମିଶନଙ୍କ ଦ୍ୱାରା ଦିଆଯାଇଥିବା ସୁପାରିଶକୁ କାର୍ଯ୍ୟକାରୀ କରିବାରେ ବିଫଳ ହୋଇଥିବା ଉଲ୍ଲେଖ କରାଯାଇଛି।