ଖୋର୍ଦ୍ଧା ଅଫିସ,୨୦ା୭: ଖୋର୍ଦ୍ଧା ଜିଲା ପ୍ରଶାସନ ପକ୍ଷରୁ ବେଆଇନ ଭାବେ ଚାଲିଥିବା କ୍ରସର ଶିଳ୍ପସଂସ୍ଥା ଉପରେ ଚଢ଼ାଉ ଜାରି ରହିଛି। ୯ ଦିନରେ ୯୦ଟି କ୍ରସର ୟୁନିଟ୍କୁ ସିଲ କରାଯିବା ସହ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଛି। ଶିଳ୍ପସଂସ୍ଥା ବନ୍ଦ ଯୋଗୁ ୫୦ ହଜାରରୁ ଊଦ୍ଧର୍ବ ଶ୍ରମିକ କାମ ହରାଇଛନ୍ତି। ଏହାର ପ୍ରତିବାଦରେ ତାପଙ୍ଗସ୍ଥିତ ଆଞ୍ଚଳିକ କ୍ରସର ଆସୋସିଏଶନ ପକ୍ଷରୁ ଶତାଧିକ କ୍ରସର ମାଲିକ, ଶ୍ରମିକ ପରିବାର ନୂଆ ବସଷ୍ଟାଣ୍ଡଠାରୁ ଶୋଭାଯାତ୍ରାରେ ବାହାରି ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। କ୍ରସର ସଂସ୍ଥା ଚାଲୁ ରଖିବା ଲାଗି ସିଟିଂ କ୍ରାଇଟେରିଆ ଅନୁମତି ପ୍ରଦାନ ଲାଗି ଜିଲାପାଳଙ୍କୁ ଦାବିପତ୍ର ଦେଇଛନ୍ତି।
ଦାବିପତ୍ର ରେ ଦର୍ଶାଯାଇଛି ଯେ, ୨୦୧୯ରେ ତତ୍କାଳୀନ ଜିଲାପାଳଙ୍କ ଅଧ୍ୟକ୍ଷତାରେ ଏ ସଂକ୍ରାନ୍ତରେ ବୈଠକ ଅନୁଷ୍ଠିତ ହୋଇଥିଲା। ଏଥିରେ ସ୍ଥାନୀୟ ବିଧାୟକ, ଜିଲା ପ୍ରଶାସନିକ ଅଧିକାରୀ, ଶ୍ରୀମନ୍ଦିର ପ୍ରଶାସନର ଡେପୁଟି ଆଡମିନିଷ୍ଟ୍ରେଶନ ଏବଂ କ୍ରସର ମାଲିକ ଉପସ୍ଥିତ ଥିଲେ। ପୂର୍ବରୁ କ୍ରସର ଚଲାଇବା ଲାଗି ରାଜ୍ୟ ପ୍ରଦୂଷଣ ବୋର୍ଡ ଅନୁମତି ରହିଛି। ସିଟିଂ କ୍ରାଇଟେରିଆ ଲାଗି ପ୍ରଶାସନ ନିକଟରେ ଆବେଦନ କରାଯାଇଛି। ବାତ୍ୟା ଏବଂ କୋଭିଡ ଯୋଗୁ ଏହା ଉପରେ କୌଣସି ପଦକ୍ଷେପ ନିଆଗଲା ନାହି। ଏବେ ସିଟିଂ କ୍ରାଇଟେରିଆ ଏବଂ ଅନ୍ୟାୟ ଡକ୍ୟୁମେଣ୍ଟ ନ ଥିବା ଦର୍ଶାଇ ପ୍ରଶାସନ ପକ୍ଷରୁ ଚଢ଼ାଉ ସହ ସିଲ୍ କରାଯାଉଛି।
ସଂଘ କାର୍ଯ୍ୟକାରୀ ସଭାପତି ପ୍ରକାଶ ସାମନ୍ତରାୟ କୁହନ୍ତି, ଆସନ୍ତା ସପ୍ତାହ ମଧ୍ୟରେ ଏହାର ସମାଧାନ କରା ନ ଗଲେ ଜୁଲାଇ ୨୬ରୁ ଜିଲାପାଳଙ୍କ କାର୍ଯ୍ୟାଳୟ ଆଗରେ ଶାନ୍ତିପୂର୍ଣ୍ଣ ଭାବେ ଧାରଣା ଦିଆଯିବ। ବିଦ୍ୟୁତ ବିଚ୍ଛିନ୍ନ ଯୋଗୁ ଅସାମାଜିକ ଯୁବକଙ୍କ ଆଡ୍ଡାସ୍ଥଳୀ ପାଲଟିଛି। ଅସାମାଜିକ କାର୍ଯ୍ୟକଳାପ ବଢୁଛି। ଏପରିକି ବିଜୁଳି କଟିବାରୁ ଶିଳ୍ପ ସଂସ୍ଥାରେ ରହୁଥିବା ପରିବାର ପାନୀୟଜଳ ଯୋଗାଣରୁ ବଞ୍ଚିତ ହେଉଛନ୍ତି। ସିଙ୍ଗଲ ଫେଜ୍ ବିଦ୍ୟୁତ ସଂଯୋଗ ଦେବା ଲାଗି ଅନୁରୋଧ କରିଛନ୍ତି। ଜିଲାପାଳ କେ.ସୁଦର୍ଶନ ଚକ୍ରବର୍ତ୍ତୀ କୁହନ୍ତି, କେବଳ ବେଆଇନ ଭାବେ ଚାଲିଥିବା କ୍ରସର ସଂସ୍ଥାକୁ ବନ୍ଦ କରାଯାଇଛି। ବିନା ପଞ୍ଜୀକରଣରେ କୌଣସି କ୍ରସର ସଂସ୍ଥାକୁ ସୁଯୋଗ ଦିଆଯିବ ନାହିଁ।