ନାକଟିଦେଉଳ,୧୫ା୧୨(ଡି.ଏନ୍.ଏ.): ନାକଟିଦେଉଳ ବ୍ଲକ ଅଧୀନ କିସିଣ୍ଡା ଥାନା ଅଞ୍ଚଳରେ ବେଆଇନ ନିଶା କାରବାର ବନ୍ଦ ସହିତ ବେଆଇନ ହମ୍ପ୍ସ ନିର୍ମାଣ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ଗୁରୁବାର ଅଞ୍ଚଳର ଶତାଧିକ ବୁଦ୍ଧିଜୀବୀ ଓ ସ୍ଥାନୀୟ ଲୋକେ ଥାନା ଘେରାଉ କରିଥିଲେ।
ମିଳିଥିବା ସୂଚନା ମୁତାବକ, ଗତ ୧୩ତାରିଖରେ ଧମା ଥାନା ଯୁଗିପାଲି ଗ୍ରାମର ମୋହନ ପୋଢ ନାମକ ଯୁବକ ଶ୍ୱଶୁର ଘର ଯୁଯୁମୁରା ଥାନା ଟାମ୍ପରସିଙ୍ଗା ଆସିଥିଲେ। ସେ କୌଣସି କାମରେ ସେ କିସିଣ୍ଡାକୁ ବାଇକରେ ଆସୁଥିବା ବେଳେ ହୀରାଲୋଇ ଘାଟିରେ ଥିବା ଏକ ହମ୍ପ୍ସରେ ପିଟି ହୋଇ ମୃତ୍ୟୁବରଣ କରିଥିଲେ। ଏହାକୁ ନେଇ ଉତ୍ତେଜନା ପ୍ରକାଶ ପାଇବା ସହ ଲୋକେ ରାସ୍ତାରୋକୋ କରିଥିଲେ। କିସିଣ୍ଡା ପୋଲିସ ପହଞ୍ଚି ଲୋକଙ୍କ ଦାବି ମୁତାବକ ୨୪ଘଣ୍ଟା ମଧ୍ୟରେ ବେଆଇନ ହମ୍ପ୍ସ ନିର୍ମାଣ କରିଥିବା ବ୍ୟକ୍ତିଙ୍କୁ ଗିରଫ କରାଯିବା ସହ ବେଆଇନ ନିଶା କାରବାର ବନ୍ଦ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ତେବେ ଦାବି ପୂରଣ ହୋଇ ନ ଥିବାରୁ ଗୁରୁବାର କିସିଣ୍ଡା, ଗିରିଶ୍ଚନ୍ଦ୍ରପୁର, ପାଣିମୁରା, ବଳମ ଏବଂ ଯୁଯୁମୁରା ବ୍ଲକ ମେଘପାଳ ଓ ଟାମ୍ପରସିଙ୍ଗା ପଞ୍ଚାୟତର ମହିଳାପୁରୁଷ ଶୋଭାଯାତ୍ରାରେ ଯାଇ ଥାନା ଘେରାଉ କରିଥିଲେ। ଖବର ପାଇ ରେଢ଼ାଖୋଲ ଏସ୍ଡ଼ିପିଓ ପ୍ରଶାନ୍ତ କୁମାର ମେହେର ଓ ନାକଟିଦେଉଳ ତହସିଲଦାର ସୁକାନ୍ତ କୁମାର ନାଏକ ଘଟଣାସ୍ଥଳରେ ପହଞ୍ଚି ଅନ୍ଦୋଳନକାରୀଙ୍କ ସହ ଆଲୋଚନା କରିଥିଲେ। ହୀରାଲୋଇ ଘାଟିଠାରେ ବେଆଇନ ହମ୍ପ୍ସ ନିର୍ମାଣକାରୀଙ୍କୁ ତୁରନ୍ତ ସେହି ଜାଗାରୁ ଉଚ୍ଛେଦ କରାଯିବା ସହ ଲୋକଙ୍କ ସହଯୋଗରେ ବେଆଇନ ନିଶା କାରବାର ବନ୍ଦ କରାଯିବ ବୋଲି ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଛି। କିସିଣ୍ଡା ସରପଞ୍ଚ ରୀନା ନାଏକ, ସମିତିସଭ୍ୟା ଯାଜ୍ଞସେନୀ କୁଅଁର, ବଳମ ସରପଞ୍ଚ ଅନୁପମା ଗଡ଼ନାୟକ, ସରାପାଲି ସରପଞ୍ଚ ଶିବନୀ ବାରିକ, ସରପଞ୍ଚ ଶୁଭେନ୍ଦ୍ର ପ୍ରଧାନ ପ୍ରମୁଖ ଘେରାଉରେ ସାମିଲ ଥିଲେ।