ଭୁବନେଶ୍ୱର, ୨୪।୩ (ବ୍ୟୁରୋ):ଜାଗା ମିଶନ୍ ଅନ୍ତର୍ଗତ ଭୁବନେଶ୍ୱରର ବସ୍ତି ଅଞ୍ଚଳରେ ରହୁଥିବା ପ୍ରତ୍ୟେକ ବ୍ୟକ୍ତି ବା ପରିବାରକୁ ଜାଗା ପ୍ରଦାନ କରାଯିବ। ଏଥିପାଇଁ ବିଭିନ୍ନ ବସ୍ତି ଅଞ୍ଚଳରେ ବ୍ୟାପକ ସର୍ଭେ କରାଯାଇ ପ୍ରକୃତ ହିତାଧିକାରୀଙ୍କୁ ଚିହ୍ନଟ କରାଯାଉଛି। ଶୁକ୍ରବାରଠାରୁ କିନ୍ନର ବସ୍ତି ଅଞ୍ଚଳରେ ସର୍ଭେ ଆରମ୍ଭ କରାଯିବ। ପ୍ରଥମେ କଳିଙ୍ଗ ଷ୍ଟୁଡିଓ କିନ୍ନର ବସ୍ତିରେ ଜାଗା ମିଶନ୍ ସର୍ଭେ କରାଯିବ। ଏଠାରେ ୧୨୦ରୁ ଊର୍ଦ୍ଧ୍ୱ କିନ୍ନର ରହୁଛନ୍ତି। ସେହିପରି ଭୁବନେଶ୍ୱରର ବାଣୀବିହାର କିନ୍ନର ବସ୍ତି, ଡମଣା କିନ୍ନର ବସ୍ତି, ନାକାଗେଟ୍ ଚାଳସାହି କିନ୍ନର ବସ୍ତି, ଭରତପୁର ତାରିଣୀ କିନ୍ନର ବସ୍ତି, ପାତ୍ରପଡ଼ା, ସତ୍ୟନଗର, ପଳାଶପଲ୍ଲି, କାର୍ଗିଲ ବସ୍ତି, ସୁନ୍ଦରପଦା ଆଦି ବିଭିନ୍ନ ବସ୍ତିରେ ପ୍ରାୟ ୫ଶହ କିନ୍ନର ଘର କରି ରହୁଛନ୍ତି। ଏସବୁ ବସ୍ତି ଏହି ସର୍ଭେରେ ସାମିଲ ହେବ। ବସ୍ତିରେ ରହୁଥିବା କିନ୍ନରଙ୍କ ଆବଶ୍ୟକ କାଗଜପତ୍ର ଯାଞ୍ଚ କରିବା ପରେ ପ୍ରକୃତ ହିତାଧିକାରୀଙ୍କୁ ଭୂମିହୀନ ଶ୍ରେଣୀରେ ଗଣତି କରାଯାଇ ଜାଗା ପ୍ରଦାନ କରାଯିବ। କଳିଙ୍ଗ ଷ୍ଟୁଡିଓ କିନ୍ନର ବସ୍ତିରେ ସର୍ଭେ ହେବା ପରେ ପର୍ଯ୍ୟାୟକ୍ରମେ ଅନ୍ୟ ବସ୍ତିଗୁଡିକରେ ସର୍ଭେ କରାଯିବ। କିନ୍ନରମାନଙ୍କୁ ପରିବାର ଲୋକେ ଦୂରେଇ ଦେଉଥିବାବେଳେ ମୁଣ୍ଡ ଗୁଞ୍ଜିବା ପାଇଁ ସେମାନେ ବସ୍ତିକୁ ଆଶ୍ରା କରିଥାନ୍ତି। ସରକାର ଏବେ ସେମାନଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରୁଥିବାବେଳେ ଜାଗା ମିଶନ୍ରେ ସେମାନଙ୍କୁ ଜମି ମିଳିବା ନିହାତି ସ୍ବାଗତଯୋଗ୍ୟ ପଦକ୍ଷେପ ବୋଲି ରାଜ୍ୟ କିନ୍ନର ସଂଘର ସମ୍ପାଦିକା ମେଘନା ମିଶ୍ର କହିଛନ୍ତି।