ଜୟପୁର,୧୮।୧୧: ଭାରତୀୟ କ୍ରିକେଟର ନୂଆ ଯୁଗ ବିଜୟରୁ ଆରମ୍ଭ ହୋଇଥିଲା। ଟି -୨୦ ବିଶ୍ୱକପ୍ର ଖରାପ ପ୍ରଦର୍ଶନର ଦୁଃଖକୁ ଭୁଲି ନୂଆ କୋଚ ରାହୁଲ ଦ୍ରାବିଡ଼ ଏବଂ ଅଧିନାୟକ ରୋହିତ ଶର୍ମାଙ୍କ ନେତୃତ୍ୱରେ ଭାରତ ଏକ ବିଜୟରୁ ଆରମ୍ଭ ହୋଇଥିଲା। ଜୟପୁରରେ ଖେଳାଯାଇଥିବା ପ୍ରଥମ ଟି -୨୦ ମ୍ୟାଚରେ ଭାରତ ନ୍ୟୁଜିଲାଣ୍ଡକୁ ପାଞ୍ଚ ଉଇକେଟରେ ପରାସ୍ତ କରିଛି। ତିନି ମ୍ୟାଚ ବିଶିଷ୍ଟ ସିରିଜରେ ଭାରତ ୧-୦ରେ ଆଗୁଆ ରହିଛି। ଅଧିନାୟକ ରୋହିତ ଟସ ଜିତି ନ୍ୟୁଜିଲାଣ୍ଡକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲେ। ମାର୍ଟିନ ଗୁପ୍ତିଲ ଏବଂ ମାର୍କ ଚାପମ୍ୟାନଙ୍କ ଅର୍ଦ୍ଧଶତକୀୟ ସହାୟତାରେ ନ୍ୟୁଜିଲାଣ୍ଡ ଛଅ ଉଇକେଟ୍ ହରାଇ ୧୬୪ ସ୍କୋର କରିଥିଲା। ଗୁପ୍ତିଲ ୪୨ ବଲରୁ ୭୦ ଓ ଚାପମ୍ୟାନ ୫୦ ବଲରେ ୬୩ ରନ ସ୍କୋର କରିଥିଲେ।
ଭାରତ ୧୬୫ ରନ ଲକ୍ଷ୍ୟ ପାଞ୍ଚ ଉଇକେଟ ବାକି ଥାଇ ହାସଲ କରିଥିଲା। ଭାରତର ବିଜୟର ମୂଳଦୁଆ ସୁର୍ଯ୍ୟକୁମାର ଯାଦବ ଏବଂ ରୋହିତ ଶର୍ମା ଯଥାକ୍ରମେ ୬୨ ଓ ୪୮ ରନ ସଂଗ୍ରହ କରିଥିଲେ। ସୁର୍ଯ୍ୟକୁମାର ଯାଦବଙ୍କୁ ମ୍ୟାନ ଅଫ ଦି ମ୍ୟାଚ ପୁରସ୍କାର ଦିଆଯାଇଥିଲା। ମ୍ୟାଚ ପରେ ସୂର୍ଯ୍ୟକୁମାର ଯାଦବ କହିଛନ୍ତି, ମ୍ୟାଚରେ ବ୍ୟାଟ ଉପରେ ବଲ ଭଲ ଆସୁଥିଲା। ଆମେ ମ୍ୟାଚ ଜିତି ଖୁସି। ୧୭ ତମ ଓଭରରେ ଟ୍ରେଣ୍ଟ ବୋଲ୍ଟଙ୍କ ଦ୍ୱାରା ଯାଦବଙ୍କ କ୍ୟାଚ୍ ଅଧିନାୟକ ଟିମ୍ ସାଉଥି ଛାଡିଥିଲେ। ଏ ନେଇ ସୂର୍ଯ୍ୟକୁମାର କହିଛନ୍ତି, ଆଜି ମୋର ସ୍ତ୍ରୀଙ୍କ ଜନ୍ମଦିନ ଏବଂ ବୋଲ୍ଟ ଯେଉଁ କ୍ୟାଚ ଛାଡିଥିଲେ ତାହା ମୋ ସ୍ତ୍ରୀଙ୍କ ପାଇଁ ଉପଯୁକ୍ତ ଜନ୍ମଦିନ ଉପହାର ଥିଲା। ଉଭୟ ବୋଲ୍ଟ ଏବଂ ଯାଦବ ଆଇପିଏଲରେ ମୁମ୍ବାଇ ଇଣ୍ଡିଆନ୍ସ ପାଇଁ ଖେଳନ୍ତି।