ନୂଆଦିଲ୍ଲୀ,୭।୧୨: ଆଇପିଏଲ୍ ୨୦୨୦ରେ ଭଲ ପ୍ରଦର୍ଶନ କରିଥିଲେ ସୂର୍ଯ୍ୟ କୁମାର ଯାଦବ। କେବଳ ଚଳିତ ସିଜନରେ ନୁହେଁ ବରଂ ଗତ ୩ ସିଜନରେ ସେ ୪୦୦ରୁ ଅଧିକ ରନ୍ କରିଛନ୍ତି। ଏହାସତ୍ତ୍ୱେ ତାଙ୍କୁ ଭାରତ ଏକାଦଶ ପାଇଁ ଚୟନ କରାଯାଇନାହିଁ। ତେବେ ସୂର୍ଯ୍ୟକୁମାର ୨୦୧୬ରେ ଦେବିଶା ଶେଟ୍ଟିଙ୍କୁ ବିବାହ କରିଛନ୍ତି। ଆଇପିଏଲ୍ ମ୍ୟାଚ୍ ସମୟରେ ସେ ଚିୟର କରିବାକୁ ପହଞ୍ଚିଥାନ୍ତି। ଏକଦା ସେ ପାର୍ଥିବ ପଟେଲ ଏବଂ ଦୀପକ ଚହରଙ୍କ ସହ କପିଲ ଶର୍ମାଙ୍କ ଶୋ’କୁ ଯାଇଥିଲେ। ସେଠାରେ ସେ ନିଜ ସ୍ତ୍ରୀଙ୍କ ବିଷୟରେ ରୋଚକ କଥା କହିଥିଲେ। ଭଲ ଖେଳିବା ପରେ ସ୍ତ୍ରୀଙ୍କ ପ୍ରଶଂସା ମିଳୁଛି କି ନାହିଁ ପ୍ରଶ୍ନର ଜବାବରେ ସେ କହିଥିଲେ, ମ୍ୟାଚ୍ ସମୟରେ ଚଉକା ଛକ୍କା ମାରିବା ପରେ ଚିୟର ଲିଡରଙ୍କୁ ଦେଖିଥାନ୍ତି ସେ। ହେଲେ ପରେ ଏହାର ପାଉଣା ଦେବାକୁ ପଡେ। କ’ଣ ପାଇଁ ଚଉକା ମାରି ଏଣେତେଣେ ଦେଖୁଛ ବୋଲି ସ୍ତ୍ରୀ ରାଗି କରି କହିବା ସହ ସେ କ’ଣ ବେଶି ଭଲ ଲାଗୁଥିଲେ ନା କ’ଣ ବୋଲି କହିଥାନ୍ତି। ତାଙ୍କୁ ବୁଝାଇବାରେ ନାକେଦମ ହୁଅନ୍ତି ସେ ବୋଲି କହିଥିଲେ।
ତେବେ ଘରୋଇ ମ୍ୟାଚ୍ରେ ମୁମ୍ବାଇ ପକ୍ଷରୁ ଖେଳନ୍ତି ସୂର୍ଯ୍ୟକୁମାର। ୨୦୧୦ରେ ସେ ନିଜର ପ୍ରଥମ ଘରୋଇ ମ୍ୟାଚ୍ ଖେଳିଥିଲେ। ଏହାପରେ ୨୦୧୧ରୁ ୨୦୧୩ ପର୍ଯ୍ୟନ୍ତ ମୁମ୍ବାଇ ଇଣ୍ଡିଆନ୍ସରୁ ସେ ଆଇପିଏଲ୍ ଖେଳିଥିଲେ। ୨୦୧୪ରେ ତାଙ୍କୁ କୋଲକାତା ନାଇଟ ରାଇଡର୍ସ ନିଜ ଟିମ୍ରେ ସାମିଲ କରିଥିଲା। ହେଲେ ୨୦୧୮ରେ ମୁମ୍ବାଇ ତାଙ୍କୁ ପୁଣି କିଣି ନେଇଥିଲା। ସେବେଠାରୁ ସେ ରୋହିତଙ୍କ ଟିମ୍ରେ ପ୍ରମୁଖ ଭୂମିକା ତୁଲାଇ ଆସୁଛନ୍ତି।