ନୂଆଦିଲ୍ଲୀ,୨୪।୭: ଶ୍ରୀଲଙ୍କା ବିପକ୍ଷରେ ଭାରତ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜକୁ ୨-୧ରେ ଜିତିଛି। ଏହି ସିରିଜରେ ସୂର୍ଯ୍ୟକୁମାର ଯାଦବ ଏବଂ ପୃଥ୍ବୀ ଶ’ ଉଲ୍ଲେଖନୀୟ ବ୍ୟାଟିଂ କରିଥିଲେ। ୧୨୭ ରନ୍ କରିଥିବା ସୂର୍ଯ୍ୟକୁମାରଙ୍କୁ ‘ମ୍ୟାନ୍ ଅଫ୍ ଦ ସିରିଜ୍’ ଚୟନ କରାଯାଇଥିଲା। ସେହିଭଳି ପୃଥ୍ବୀ ଭାରତ ପକ୍ଷରୁ ସର୍ବାଧିକ ରନ୍ ସ୍କୋର କରିବାରେ ତୃତୀୟ ସ୍ଥାନରେ ରହିଥିଲେ। ତେବେ ସିରିଜ ଶେଷ ହେବାପରେ ସୂର୍ଯ୍ୟକୁମାର ପୃଥ୍ବୀଙ୍କୁ ‘ଶୋ-ଷ୍ଟପର୍’ ବୋଲି କହିଛନ୍ତି।
ଏକ ଭର୍ଚୁଆଲ ଖବରଦାତା ସମ୍ମିଳନୀରେ ପୃଥ୍ବୀଙ୍କ ବିଷୟରେ କଥାବାର୍ତ୍ତା କରି ସୂର୍ଯ୍ୟକୁମାର କହିଛନ୍ତି, ତାଙ୍କ ପାଇଁ ମୋ ପାଖରେ କେବଳ ଗୋଟିଏ ଶବ୍ଦ ରହିଛି। ଯେତେବେଳେ ସେ ଖେଳନ୍ତି କିମ୍ବା ତାଙ୍କୁ ଭେଟିଥାଏ, ସେତେବେଳେ ତାଙ୍କୁ ମୁଁ କେବଳ ‘ଶୋ-ଷ୍ଟପର’ ବୋଲି କହିଥାଏ। ଏହାର ଅର୍ଥ ଆପଣ ଦେଖିବାକୁ ପସନ୍ଦ କରୁଥିବା ବ୍ୟକ୍ତି ଏବଂ ଯିଏ ତାଙ୍କ ଉପରେ ନଜର ରଖାଯିବାକୁ ପସନ୍ଦ କରିଥାନ୍ତି। କେବଳ ଏତିକି ନୁହେଁ ପୃଥ୍ବୀ ଯେତେବେଳେ ବ୍ୟାଟିଂ କରିବାକୁ ଆସନ୍ତି ସେ ସେହିଭଳି ବ୍ୟାଟିଂ କରିଥାନ୍ତି। ତାଙ୍କ ଖେଳ ଦେଖିବାକୁ ମୁଁ ପସନ୍ଦ କରିଥାଏ। ସେ ଆଜିକାଲି ଚମତ୍କାର ବ୍ୟାଟିଂ କରୁଛନ୍ତି। ସେତେବେଳେ ତାଙ୍କ ମନୋଭାବ ଭଲ ଥାଏ। ସେ ତାଙ୍କ ଫିଟ୍ନେସ୍କୁ ନେଇ ବହୁତ ପରିଶ୍ରମ କରିଥାନ୍ତି। ତାଙ୍କୁ ଭଲ ଖେଳୁଥିବା ଦେଖିବା ଖୁସି ଦେଇଥାଏ ବୋଲି ସେ କହିଛନ୍ତି।