ଲଣ୍ଡନ,୧୩।୮: ଭାରତୀୟ କ୍ରିକେଟ ଦଳର ତାରକା ବ୍ୟାଟ୍ସମ୍ୟାନ ସୂର୍ଯ୍ୟକୁମାର ଯାଦବ ଏବଂ ପୃଥ୍ବୀ ଶ’ ଇଂଲଣ୍ଡରେ ପହଞ୍ଚିଛନ୍ତି। କିନ୍ତୁ ଲର୍ଡସରେ ଖେଳାଯାଉଥିବା ଦ୍ୱିତୀୟ ଟେଷ୍ଟ ମ୍ୟାଚରେ ଦଳର ଅଂଶ ନୁହଁନ୍ତି। ଉଭୟ ପୃଥ୍ବୀ ଏବଂ ସୂର୍ଯ୍ୟକୁମାର ଏବେ ଇଂଲଣ୍ଡରେ କ୍ୱାରାଣ୍ଟାଇନରେ ଅଛନ୍ତି। ଏହି କ୍ୱାରାଣ୍ଟାଇନ ସମୟରେ ଉଭୟ ଖେଳାଳି ମଧ୍ୟ ବହୁତ ମଜା କରୁଛନ୍ତି । ସୂର୍ଯ୍ୟକୁମାର ଯାଦବ ଏବଂ ପୃଥ୍ବୀ ସେମାନଙ୍କ କ୍ୱାରାଣ୍ଟାଇନ ସମୟ ଅତିବାହିତ କରିବାର ଏକ ନିଆରା ଉପାୟ ଖୋଜିଛନ୍ତି। ଉଭୟ ଖେଳାଳି ନିଜେ ଏକ ଭିଡିଓ ପ୍ରସ୍ତୁତ କରିଥିଲେ ଏବଂ ଏହାକୁ ଇନଷ୍ଟାଗ୍ରାମରେ ମଧ୍ୟ ଶେୟାର କରିଥିଲେ। ଏହି ଭିଡିଓରେ ଉଭୟ ପ୍ରସିଦ୍ଧ କମେଡି ଚଳଚ୍ଚିତ୍ର ‘ଅନ୍ଦାଜ ଅପ୍ନା ଅପ୍ନା’ ଏକ ସଂଳାପ କହୁଥିବାର ନଜର ଆସିଛନ୍ତି । ସୁର୍ଯ୍ୟକୁମାର ସଲମାନ ଖାନଙ୍କ ସଂଳାପ କହୁଥିବାବେଳେ ପୃଥ୍ବୀ ଅମିର ଖାନଙ୍କ ଭୂମିକାରେ ଅଭିନୟ କରୁଥିବା ନଜର ଆସିଛନ୍ତି। ଏହି ଭିଡିଓକୁ ସୂର୍ଯ୍ୟକୁମାର ଯାଦବ ତାଙ୍କ ଇନଷ୍ଟାଗ୍ରାମ ଆକାଉଣ୍ଟରୁ ଶେୟାର କରିଛନ୍ତି। ଏହି ଭିଡିଓ ଶେୟାର କରିବାବେଳେ ସେ କ୍ୟାପସନରେ ସମାନ ଚଳଚ୍ଚିତ୍ରର ଏକ ସଂଳାପ ମଧ୍ୟ ଲେଖିଛନ୍ତି – ‘ସାର୍, ଆପ୍ ପୁରୁଷ୍ ନେହିଁ, ମହାପୁରୁଷ୍ ହେଁ’ ଏହି ଭିଡିଓଟି ଅତ୍ୟନ୍ତ ମଜାଳିଆ ଏବଂ ପ୍ରଶଂସକମାନେ ମଧ୍ୟ ଏହାକୁ ବହୁତ ପସନ୍ଦ କରୁଛନ୍ତି। ଅନେକ କ୍ରିକେଟର ମଧ୍ୟ ଏହି ଭିଡିଓ ଉପରେ ନିଜର ମନ୍ତବ୍ୟ ଦେଇଛନ୍ତି। ଏହି ଭିଡିଓ ଉପରେ ଶ’ଙ୍କ ଗର୍ଲଫ୍ରେଣ୍ଡ ପ୍ରୀତି ସିଂ ମଧ୍ୟ ମନ୍ତବ୍ୟ ଦେଇଛନ୍ତି। ଏହି ଭିଡିଓ ଉପରେ କମେଣ୍ଟ ଦେଇ ପ୍ରୀତି ଲେଖିଛନ୍ତି – ଆପଣ ଏପରି ଅଭିନୟ କେଉଁଠୁ ଶିଖିଛନ୍ତି? ଦୀର୍ଘ ଦିନ ଧରି ଅଭିନେତ୍ରୀ ପ୍ରୀତି ସିଂଙ୍କ ସହ ପ୍ରୀତି ଖାଁଙ୍କ ନାମ ଜଡିତ ରହିଛି। ଉଭୟଙ୍କୁ ମଧ୍ୟ ଅନେକ ପାର୍ଟିରେ ଏକତ୍ର ଦେଖାଯାଇଛି।
ସୂଚନାଯୋଗ୍ୟ, ସୂର୍ଯ୍ୟକୁମାର ଯାଦବ ଏବଂ ପୃଥ୍ବୀ ଶ’ ଇଂଲଣ୍ଡରେ ୧୦ ଦିନିଆ କ୍ପାରାଣ୍ଟାଇନରେ ଅଛନ୍ତି। ଏଭଳି ପରିସ୍ଥିତିରେ ସେ ୧୨ ଅଗଷ୍ଟରୁ ଆରମ୍ଭ ହୋଇଥିବା ଦ୍ୱିତୀୟ ଟେଷ୍ଟ ମ୍ୟାଚର ଅଂଶ ହୋଇପାରି ନାହାଁନ୍ତି। ଏହି ଦୁଇ ଖେଳାଳି ଇଂଲଣ୍ଡ ବିପକ୍ଷ ଶେଷ ତିନୋଟି ଟେଷ୍ଟରେ ଟିମ ଇଣ୍ଡିଆରେ ଯୋଗଦେବେ। ଉଭୟ ଖେଳାଳି ଶ୍ରୀଲଙ୍କାରେ ସୀମିତ ଓଭର ସିରିଜରେ ଟିମ ଇଣ୍ଡିଆର ଅଂଶ ହୋଇଥିଲେ। ସେ ପ୍ରଥମେ ଇଂଲଣ୍ଡ ଗସ୍ତ ପାଇଁ ମନୋନୀତ ହୋଇ ନ ଥିଲେ, କିନ୍ତୁ ଶଭମନ ଗିଲ, ମୟଙ୍କ ଅଗ୍ରୱାଲ, ଆବେଶ ଖାନ ଏବଂ ୱାଶିଂଟନ ସୁନ୍ଦରଙ୍କ ଭଳି ଖେଳାଳି ଆହତ ହୋଇଥିଲେ। ବିସିସିଆଇ ପୃଥ୍ବୀ ଏବଂ ସୂର୍ଯ୍ୟକୁମାରଙ୍କୁ ଇଂଲଣ୍ଡ ଗସ୍ତରେ ପଠାଇଥିଲା।