ମୁମ୍ବାଇ: ବଲିଉଡ୍ ଭର୍ସାଟାଇଲ୍ ଅଭିନେତା ସୁଶାନ୍ତ ସିଂହ ରାଜପୁତଙ୍କ ମାମଲାର ତଦନ୍ତ ଯେମିତି ଯେମିତି ଆଗକୁ ବଢ଼ୁଛି ସେମିତି ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ଯାହା କେବଳ ଅଭିନେତ୍ରୀ ରିୟା ଚକ୍ରବର୍ତ୍ତିଙ୍କ ସମସ୍ୟା ବଢ଼ାଇନାହିଁ ବରଂ ମୁମ୍ବାଇ ପୋଲିସକୁ ମଧ୍ୟ ଅନେକ ସମୟରେ କାଠଗଡ଼ାରେ ଠିଆ କରିଛି। ସୁଶାନ୍ତଙ୍କ ମାମଲାରେ ଏବେ ରିୟାଙ୍କ କଲ୍ ଡିଟେଲ୍ସ ଯାଞ୍ଚ କରାଯାଇଛି। ଯେଉଁଥିରେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। କୁହାଯାଉଛି, ସୁଶାନ୍ତଙ୍କ ମୃତ୍ୟୁ ପରେ ରିୟା ଲଗାତାର ଭାବେ ବାନ୍ଦ୍ରା ଡିସିପିଙ୍କ ସମ୍ପର୍କରେ ଥିଲେ ଏବଂ ଅନେକଥର ତାଙ୍କୁ କଲ୍ ମଧ୍ୟ କରିଛନ୍ତି। ରିୟା ଓ ବାନ୍ଦ୍ରା ଡିସିପି ଅଭିଷେକ ତ୍ରିମୁଖେଙ୍କ ମଧ୍ୟରେ ୪ ଥର ଫୋନରେ କଥା ହୋଇଛନ୍ତି ଏବଂ ଗୋଟିଏ ଥର ମେସେଜ ଜରିଆରେ ଦୁହେଁ ଦୁହିଁଙ୍କୁ ସମ୍ପର୍କ କରିଥିବା ଜଣାପଡ଼ିଛି। ସୂଚନା ମୁତାବକ ଜୁନ ୨୧କୁ ବାନ୍ଦ୍ରା ଡିସିପିଙ୍କ ସହ ଫୋନ୍ରେ ରିୟା ୨୮ ସେକେଣ୍ଡ ପର୍ଯ୍ୟନ୍ତ କଥା ହୋଇଛନ୍ତି। ଜୁନ ୨୨ରେ ଡିସିପି ରିୟାଙ୍କୁ ଏକ ମେସେଜ୍ କରିଥିଲେ ଏବଂ ସେହିଦିନ ହିଁ ଡିସିପି ଅଭିଷେକ ରିୟାଙ୍କ ସହ ୨୯ସେକେଣ୍ଡ ପର୍ଯ୍ୟନ୍ତ କଥା ହୋଇଥିଲେ। ପୁଣି ୮ ଦିନ ପରେ ଡିସିପି ରିୟାଙ୍କୁ ଫୋନ କରିଥିଲେ। ସେତେବେଳେ ଦୁହେଁ ୬୬ସେକେଣ୍ଡ ବାର୍ତ୍ତାଳାପ କରିଥିବା ଜଣାପଡ଼ିଛି। ଏହାପରେ କିଛି ଦିନ ଯାଏଁ ଦୁହିଁଙ୍କ ମଧ୍ୟରେ କୌଣସି କଥାବାର୍ତ୍ତା ହୋଇନାହିଁ। କିନ୍ତୁ ଜୁଲାଇ ୧୮ରେ ପୁଣି ଥରେ ରିୟା ଡିସିପିଙ୍କ ଫୋନ କରିଥିବା ସୂଚନା ରହିଛି। ତେବେ ଡିସିପି ଓ ରିୟାଙ୍କ ମଧ୍ୟରେ କ’ଣ ସବୁ ବାର୍ତ୍ତାଳାପ ହୋଇଥିଲା ତାହା ଏବେ ସନ୍ଦେହ ଘେରରେ।