ବମ୍ବେ: ପ୍ରଥମେ ଧାରାବାହିକରୁ ସଫଳ ନାୟକର ପରିଚୟ ପାଇବା ପରେ ଫିଲ୍ମରେ ନିଜର କ୍ୟାରିୟର ଆରମ୍ଭ କରିଥିଲେ ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତ। ଫିଲ୍ମ ‘କାଇ ପୋ ଚେ’ ଜରିଆରେ ସେ ବଲିଉଡ୍ରେ ପାଦ ଥାପିଥିଲେ। ପରେ ସେ ଭାରତୀୟ କ୍ରିକେଟ ଟିମ୍ର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ବାୟୋପିକ୍ କରି ଦର୍ଶକଙ୍କ ମନରେ ସ୍ବତନ୍ତ୍ର ଛାପ ଛାଡ଼ିଥିଲେ। କ୍ୟାରିୟର ଠିକ୍ ଠାକ୍ ଚାଲିଥିବା ବେଳେ ହଠାତ୍ ତାଙ୍କର ଆତ୍ମହତ୍ୟା ସମସ୍ତଙ୍କୁ ଚକିତ କରିଦେଇଥିଲା। ଏବେ ପୋଲିସ ଏହା ପଛରେ ଥିବା କାରଣକୁ ନେଇ ଖୋଳତାଡ଼ କରୁଛି।
ଯାଞ୍ଚରେ ଅନେକ କଥା ସାମ୍ନାକୁ ଆସୁଛି। ଉକ୍ତ ଦିନ ସୁଶାନ୍ତ ଗୋଟିଏ ଥର ନୁହେଁ ବରଂ ଦୁଇଥର ଆତ୍ମହତ୍ୟା କରିବାକୁ ଚେଷ୍ଟା କରିଥିବା ପୋଲିସ ସନ୍ଦେହ କରୁଛି। ପ୍ରଥମଟିରେ ସେ ସଫଳ ହୋଇ ନ ଥିଲେ ହେଁ ଦ୍ୱିତୀୟଥରରେ ତାଙ୍କର ଜୀବନ ଚାଲିଯାଇଥିଲା। ଏପରି କହିବା ପଛରେ କାରଣ ମଧ୍ୟ ରହିଛି।
ସୁଶାନ୍ତ ଆତ୍ମହତ୍ୟା କରିଥିବା କୋଠରୀରେ ବାଥରୋବ୍(ଗାଧୋଇବା ପୋଷାକ)ର କିଛି ଖଣ୍ଡ ପଡ଼ିଥିବା ପୋଲିସ ଦେଖିବାକୁ ପାଇଥିଲା। ଏଣୁ ସେ ପ୍ରଥମେ ବାଥରୋବ୍ ଜରିଆରେ ଆତ୍ମହତ୍ୟା କରିଥିଲେ। ହେଲେ ତାହା ଛିଣ୍ଡିଯିବାରୁ ସେ ଦ୍ୱିତୀୟ ଥର ପାଇଁ କୁର୍ତ୍ତା ବ୍ୟବହାର କରି ଆତ୍ମହତ୍ୟା ଉଦ୍ୟମ କରିଥିବା ପୋଲିସ ସନ୍ଦେହ କରୁଛି।
ଏହାଛଡ଼ା ସୁଶାନ୍ତଙ୍କ କୋଠରୀରେ ଲୁଗାପଟା ଖେଳାଇ ହୋଇ ପଡ଼ିଥିଲା। ତେଣୁ ସେ ପ୍ରଥମ ବାଇରୋବ୍ ଛିଡ଼ିଯିବା ପରେ ଆଲମାରୀରେ ଥିବା କପଡ଼ା ଖୋଜିଥିଲେ। ପରେ ସବୁଜ ରଙ୍ଗର କୁର୍ତ୍ତା ସାହାଯ୍ୟରେ ଆତ୍ମହତ୍ୟା କରିଥିଲେ। ପୋଲିସ ଘରେ ପହଞ୍ଚିବା ସମୟରେ ତାଙ୍କ ଭଉଣୀ ଏବଂ ଅନ୍ୟ ଲୋକମାନେ ତାଙ୍କ ପୋଷାକକୁ କାଟି ଉଦ୍ଧାର କରିଥିଲେ। ଅପରପକ୍ଷେ ପୋଲିସ ଉକ୍ତ କୁର୍ତ୍ତାକୁ ଫରେନ୍ସିକ୍ ଲ୍ୟାବ୍କୁ ପଠାଇଛି। ଏହାଦ୍ୱାରା ପୋଷାକ ଜଣଙ୍କର ଓଜନ ସମ୍ଭାଳିବାକୁ ସକ୍ଷମ ଥିଲା ନା ନାହିଁ ତାହା ଯାଞ୍ଚ ହେବ ବୋଲି କୁହାଯାଉଛି।