ମୁମ୍ବାଇ: ଅଭିନେତା ସୁଶାନ୍ତ ସିଂ ରାଜପୁତଙ୍କ ଚଳିତବର୍ଷ ଜାନୁୟାରୀର ଆଉ ଏକ ଅଡିଓ କ୍ଲିପ୍ ସାମ୍ନାକୁ ଆସିଛି। ଏଥିରେ ସୁଶାନ୍ତ, ରିୟା ଏବଂ ଇନ୍ଦ୍ରଜିତ୍ ଚକ୍ରବର୍ତ୍ତୀଙ୍କ ସହ ଆଉ କିଛି ବିତ୍ତୀୟ ପରାମର୍ଶଦାତା ଏକସାଥୀରେ ବସି ସୁଶାନ୍ତଙ୍କ ଆର୍ଥିକ ପରିଚାଳନା ବିଷୟରେ କଥାବାର୍ତ୍ତା କରୁଥିବା ଶୁଣିବାକୁ ମିଳିଛି। ସୁଶାନ୍ତ ଏଥିରେ ଟ୍ରଷ୍ଟ ଗଢ଼ିବା ସମ୍ପର୍କରେ କଥା ହେଉଥିବା ଅଡିଓରୁ ଜଣାପଡ଼ିଛି। ଏଥିସହିତ ସୁଶାନ୍ତ ନିଜ ଭବିଷ୍ୟତ ବିଷୟରେ ମଧ୍ୟ କଥା ହେଉଛନ୍ତି। ଆହୁରି ମଧ୍ୟ ସେ ତାଙ୍କ ଅବସର ଯୋଜନା କରୁଥିବା ନେଇ କଥା ହୋଇଛନ୍ତି।
ଏଥିରେ ସୁଶାନ୍ତ କ’ଣ କହିଛନ୍ତି ଜାଣନ୍ତୁ:
ପୂରା ୩୬ ମିନିଟ୍ର ଏହି ଅଡିଓ ଶୁଣିବା ପରେ ଲାଗୁଛି ସୁଶାନ୍ତ ବିତ୍ତୀୟ ବା ଅର୍ଥ ପରାମର୍ଶଦାତାଙ୍କୁ ଆଗାମୀ ଯୋଜନା ସମ୍ପର୍କରେ ଡାକିଛନ୍ତି। ଅଡିଓରେ ସୁଶାନ୍ତ ବଲିଉଡ୍ ଛାଡ଼ିବା, ନିଜର ଅବସର ସମ୍ପର୍କରେ କଥା ବାର୍ତ୍ତା କରିବା, ନିଜ ସ୍ବାସ୍ଥ୍ୟଗତ ସମସ୍ୟା ସମ୍ପର୍କରେ କଥା ହୋଇଛନ୍ତି। ରିୟା ଏବଂ ଇନ୍ଦ୍ରଜିତ୍ ଚକ୍ରବର୍ତ୍ତୀ ମଧ୍ୟ ନିଜ କଥା କିଛି କିଛି ଏହି ଅଡିଓରେ କହିଛନ୍ତି।
ରିୟା କହିଛନ୍ତି, ସୁଶାନ୍ତ ଏକ ଫିକ୍ସ ଡିପୋଜିଟ୍ କରିବା ଉଚିତ୍। ସେ ଏକ ଉଦାହରଣ ଦେଇ କହିଛନ୍ତି, ମନେକର ମୁଁ ଏଠି ନାହିଁ, ଶ୍ରୁତି ଏବଂ ମିରାଣ୍ଡା ମଧ୍ୟ ନାହାନ୍ତି। କିଛି ନୂଆ ଲୋକ ସୁଶାନ୍ତଙ୍କ ସହ ଅଛନ୍ତି। ଆମେ ସୁଶାନ୍ତଙ୍କ ସମସ୍ତ ଟଙ୍କା ଏଫ୍ଡି କରିବୁ। ସୁଶାନ୍ତଙ୍କ କାର୍ଡରେ ୧୦-୧୫ ଲକ୍ଷରୁ ଅଧିକ ଟଙ୍କା ରହିବ ନାହିଁ। ଦ୍ୱିତୀୟ କଥା ହେଲା ଯେଉଁ ଟଙ୍କା ସୁଶାନ୍ତଙ୍କ ନିକଟରେ ଅଛି ସେଥିରୁ ସେ ସୁଧ ପାଉଛନ୍ତି। ସୁଶାନ୍ତଙ୍କ ଜମାଟଙ୍କା ମଧ୍ୟ ସୁରକ୍ଷିତ ରହିବ। ସୁଶାନ୍ତଙ୍କ ଦସ୍ତଖତ ବିନା ଏହି ଟଙ୍କାକୁ କେହି ଉଠାଇପାରିବେ ନାହିଁ। ଅଡିଓରେ ସୁଶାନ୍ତ କହୁଛନ୍ତି, ମୁଁ କେବଳ ନିବେଦନ କରିବାକୁ ଚାହୁଁଛି ଆମେ ଏସବୁ କିପରି ଶେଷ ନକରି ଟଙ୍କା ସଞ୍ଚୟ କରିପାରିବା। ମୁଁ ମୋ’ ମନ ସହିତ ଯୁଦ୍ଧ କରୁଛି। ଏହା ସବୁଠାରୁ କଷ୍ଟକର। ଏମିତି ସମୟ ମୁଁ କେବେବି ଦେଖିନାହିଁ।
ଏଥିରୁ ସ୍ପଷ୍ଟ ହେଉଛି ରିୟା ତାଙ୍କ ବୟାନରେ ଅନେକ ଥର କହିଛନ୍ତି ସୁଶାନ୍ତ ବହୁତ ବଦଖର୍ଚ୍ଚି। ସେ ଟଙ୍କା ଉଡ଼ାଇବାକୁ ଭଲପାଆନ୍ତି। ମାତ୍ର ଏହି ଅଡିଓରୁ ସ୍ପଷ୍ଟ ଜଣାପଡୁଛି ସୁଶାନ୍ତ ଟଙ୍କା ସଞ୍ଚୟ କରିବାକୁ ଚାହାନ୍ତି।