ମୁମ୍ବାଇ: ବଲିଉଡ୍ ନାୟକ ସୁଶାନ୍ତ ସିଂ ରାଜପୁତଙ୍କ ଦେହାନ୍ତ ହୋଇଥିଲେ ମଧ୍ୟ ଏହାକୁ ଏପର୍ଯ୍ୟନ୍ତ ଗ୍ରହଣ କରିପାରୁ ନାହାନ୍ତି ତାଙ୍କ ପ୍ରଶଂସକ। ନିକଟରେ ତାଙ୍କ ଶେଷ ଅଭିନୀତ ଫିଲ୍ମର ଟ୍ରେଲର୍ ରିଲିଜ୍ ହୋଇଥିବା ବେଳେ ଦର୍ଶକେ ଏହାକୁ ଦେଖିବାକୁ ଏକ ପ୍ରକାର ପାଗଳ ହୋଇ ଯାଇଥିଲେ। ଆଉ ଖୁବ୍ କମ୍ ସମୟ ମଧ୍ୟରେ ଏହା ଇତିହାସ ସୃଷ୍ଟି କରିଥିଲା। ଏବେ ସୁଶାନ୍ତଙ୍କ ପ୍ରଶଂସକଙ୍କ ପାଇଁ ଆସିଛି ଆଉ ଏକ ସରପ୍ରାଇଜ୍। ‘ଦିଲ୍ ବେଚାରା’ର ପ୍ରଥମ ଗୀତର ଟିଜର୍ ଏବେ ରିଲଜ୍ ହୋଇସାରିଛି। ସୁଶାନ୍ତ ଓ ସଞ୍ଜନାଙ୍କ ଅଭିନୀତ ଏହି ଫିଲ୍ମର ପ୍ରଥମ ଗୀତର ଟିଜରରେ ସୁଶାନ୍ତଙ୍କ ହସ ହସ ମୁହଁ ଓ ମସ୍ତି କରୁଥିବା ଅନ୍ଦାଜ ଦର୍ଶକଙ୍କୁ ବେଶ୍ ପସନ୍ଦ ଆସିବ ବୋଲି କୁହାଯାଉଛି। ଏହି ଟିଜରରେ ଦେଖିବାକୁ ମିଳିଛି ସୁଶାନ୍ତ ଏକ ଷ୍ଟେଜରେ ନିଶ୍ଚିତ ଭାବେ ଏକ ଧମାକାଦାର ପରଫରମାନ୍ସ ଦେବାକୁ ଯାଉଛନ୍ତି। ଆଉ ବ୍ୟାକଗ୍ରାଉଣ୍ଡରେ ମନ ମୋହିଲା ଭଳି ମ୍ୟୁଜିକ ବାଜୁଛି। Disney+HotstarVIPର ଅଫିସିୟାଲ ଟୁଇଟର ଆକାଉଣ୍ଟରେ ସୁଶାନ୍ତଙ୍କ ଫିଲ୍ମ ‘ଦିଲ ବେଚାରା’ର ପ୍ରଥମ ଗୀତର ଏକ ଝଲକ୍ ଶେୟାର କରାଯାଇଛି। ଏହାସହ ସୂଚନା ଦିଆଯାଇଛି କି ଏହି ଗୀତ ଜୁଲାଇ ୧୦ ଅର୍ଥାତ୍ ଶୁକ୍ରବାର ଦିନ ୧୨ଟାରେ ରିଲିଜ କରାଯିବ। ୨୪ ଜୁଲାଇରେ Disney+HotstarVIPରେ ଏହି ଫିଲ୍ମ ରିଲିଜ୍ କରାଯିବ।