ବମ୍ବେ: ଓଟିଟି ପ୍ଲାଟ୍ଫର୍ମରେ ରିଲିଜ ହୋଇଛି ଅଭିନେତା ସୁଶାନ୍ତ ସିଂ ରାଜପୁତ ଅଭିନୀତ ଶେଷ ଫିଲ୍ମ ‘ଦିଲ ବେଚାରା’। ଡିଜନୀ ହଟ୍ଷ୍ଟାରରେ ରିଲିଜ କରାଯିବା ପରେ ଫିଲ୍ମଟି ଏକାଧିକ ରେକର୍ଡ ନିଜ ନାମରେ କରି ସାରିଲାଣି। ସୋସିଆଲ ମିଡିଆରେ ଦିଲ୍ ବେଚାରା ଟ୍ରେଣ୍ଡ କରୁଥିବା ବେଳେ ଫିଲ୍ମ ରିଭ୍ୟୁ ଓ୍ବେବ୍ସାଇଟ୍ ଆଇଏମ୍ଡିବିରେ ଦଶରୁ ଦଶ ରେଟିଂ ହୋଇଥିଲା। ଏବେ ଏହା ୯.୮ ରହିଛି। ହେଲେ ୧୧.୨୫ ମିନିଟ ପର୍ଯ୍ୟନ୍ତ ଫିଲ୍ମର ରେଟିଂ ୧୦ ରହିଥିଲା, ଯାହାକି ଏକ ରେକର୍ଡ ବୋଲି କୁହାଯାଉଛି। ଫିଲ୍ମ ସମୀକ୍ଷକମାନେ ମଧ୍ୟ ଏହାକୁ ବେଶ୍ ପସନ୍ଦ କରୁଛନ୍ତି।
ଫିଲ୍ମର କାହାଣୀକୁ ଯଦି ଦେଖିବା ତେବେ ଏହା ପ୍ରେମ ଏବଂ ମୃତ୍ୟୁ ଉପରେ ପର୍ଯ୍ୟବଶିତ ରହିଛି। ମ୍ୟାନି ଏବଂ କିଜି ବାସୁଙ୍କ ଜୀବନକାହାଣୀକୁ ଏଥିରେ ଦେଖାଯାଇଛି। ଉଭୟ କ୍ୟାନ୍ସର ସହ ଲଢ଼ୁଥିବା ବେଳେ ପ୍ରେମରେ ପଡ଼ୁଛନ୍ତି। ପରେ ମ୍ୟାନି କିଜିଙ୍କ ଖୁସିକୁ କିଭଳି ପୂରଣ କରୁଛନ୍ତି ତାହା ବେଶ ଭାବବିହ୍ବଳ କରୁଛି। କୁହାଯାଉଛି ଫିଲ୍ମ ରିଲିଜର ଦୁଇ ଘଣ୍ଟା ପରେ ହଟ୍ଷ୍ଟାର କ୍ରାସ୍ ହୋଇଯାଇଥିଲା।
