ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁକୁ ନେଇ ନାନା ତର୍କ ବିତର୍କ ଚାଲିଛି। ବର୍ତ୍ତମାନ ବଂଶାନୁବାଦକୁ ନେଇ ଆଲୋଚନା ଜୋର୍ ଧରିଛି। ଅନ୍ୟପକ୍ଷରେ ପ୍ରଶଂସକମାନେ ସୁଶାନ୍ତଙ୍କ ପୁରୁଣା ସ୍ମୃତିକୁ ମନେ ପକାଉଛନ୍ତି। ସୁଶାନ୍ତଙ୍କ ଏକ ପୁରୁଣା ଭିଡିଓ ଏବଂ ଫଟୋ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି। ଇନ୍ଷ୍ଟାଗ୍ରାମରେ ଶେୟାର ହୋଇଥିବା ଏକ ଭିଡିଓରେ ସୁଶାନ୍ତ ଟିଭିରେ ନିଜକୁ ଧୋନୀ ରୂପରେ ଦେଖି ଖୁବ୍ ଖୁସି ହୋଇଯାଉଛନ୍ତି।
ଏହି ଭିଡିଓରେ ସୁଶାନ୍ତ ପେନ୍ ଏବଂ ପେପର ଧରି ବସିଛନ୍ତି। ତାଙ୍କ ସମ୍ମୁଖରେ ଫିଲ୍ମ ‘ଏମ୍ଏସ୍ ଧୋନୀ ଦ ଅନ୍ଟୋଲ୍ଡ ଷ୍ଟୋରି’ ଚାଲୁଥିବାର ଦେଖିବାକୁ ମିଳିଛି। ସୁଶାନ୍ତ ଏହି ଫିଲ୍ମକୁ ଖୁବ୍ ଧ୍ୟାନ ସହକାରେ ଦେଖୁଛନ୍ତି। ପ୍ରତ୍ୟେକ ସିନ୍ ବା ଦୃଶ୍ୟକୁ ଏକ ଲୟରେ ଦେଖୁଥିବା ଭିଡିଓଟିରେ ଦେଖିବାକୁ ମିଳିଛି। କିଛି ସମୟ ପରେ ସୁଶାନ୍ତ କ୍ୟାମେରା ପରି ଚାହିଁଛନ୍ତି। ଆଉ ସ୍କ୍ରିନ୍ ପରି ବଢ଼ିଆ ହେଉଛି ବୋଲି ଇସାରା ଦେଉଛନ୍ତି। ଫିଲ୍ମରେ ଧୋନୀଙ୍କ ସହ ଚିୟର କରାଯିବା ଦୃଶ୍ୟରେ ସେ ନିଜ ସହ ଚିୟର ବା ଆନନ୍ଦ କରୁଛନ୍ତି। ସୁଶାନ୍ତଙ୍କ ଏହି ଭିଡିଓକୁ ପ୍ରଶଂସକମାନେ ବେଶ୍ ପସନ୍ଦ କରିଛନ୍ତି। ଏହି ଫିଲ୍ମରେ ସୁଶାନ୍ତ କଠିନ ପରିଶ୍ରମ କରିଥିଲେ। ଫିଲ୍ମଟି ବକ୍ସ ଅଫିସରେ ଜବରଦସ୍ତ ହିଟ୍ ସାବ୍ୟସ୍ତ ହୋଇଥିଲା।
ଫିଲ୍ମ ‘ଏମ୍ଏସ୍ ଧୋନୀ ଦ ଅନଟୋଲ୍ଡ ଷ୍ଟୋରି’ର ନିର୍ଦ୍ଦେଶନା ଦେଇଛନ୍ତି ନିରଜ ପାଣ୍ଡେ। ୧୦୪ କୋଟି ଟଙ୍କା ବଜେଟ୍ରେ ନିର୍ମିତ ଏହି ଫିଲ୍ମ ବକ୍ସ ଅଫିସରେ ୨୧୬ କୋଟି ଟଙ୍କା ବ୍ୟବସାୟ କରିଥିଲା। ଅନୁପମ ଖେର୍ ଏହି ଫିଲ୍ମରେ ମହେନ୍ଦ୍ର ସିଂ ଧୋନୀଙ୍କ ପିତା ଭୂମିକାରେ ଅଭିନୟ କରିଥିବା ବେଳେ କିଆରା ଆଡଭାନୀ, ଦିଶା ପଟାନୀ, ଭୂମିକା ଚାଓ୍ବଲା ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିଥିଲେ।