ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତ ଅନେକ ବଡ଼ ସ୍ବପ୍ନ ଦେଖୁଥିଲେ। ସେଗୁଡ଼ିକ ପୂରଣ ପାଇଁ ଅକ୍ଲାନ୍ତ ପରିଶ୍ରମ ମଧ୍ୟ କରିଥିଲେ। ସେ ଏହି ସ୍ବପ୍ନଗୁଡ଼ିକର ଏକ ହାତଲେଖା ତାଲିକା ବି ପ୍ରସ୍ତୁତ କରିଥିଲେ। ଯାହାକି ଦୁଇବର୍ଷ ତଳେ ସୁଶାନ୍ତ ସେପ୍ଟେମ୍ବରରେ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ଶେୟାର କରିଥିଲେ। ଅଭିନେତା ଟୁଇଟରରେ ୫୦ଟି ସ୍ବପ୍ନର ତାଲିକା ଶେୟାର କରିଥିଲେ। ଯେଉଁଥିରେ କିଛି ବ୍ୟକ୍ତିଗତ ଲକ୍ଷ୍ୟ ରହିଥିଲା। ଏହି ତାଲିକାରେ ବିମାନ ଉଡ଼ାଣ ଶିଖିବା ଠାରୁ ଆରମ୍ଭ କରି ଗଛ ଲଗାଇବା, ମହିଳାମାନଙ୍କୁ ଆତ୍ମରକ୍ଷା ପାଇଁ ପ୍ରସ୍ତୁତ କରିବା ପର୍ଯ୍ୟନ୍ତ ଅନେକ ଗୁରୁତ୍ୱପୂର୍ଣ୍ଣ କଥା ଅନ୍ତର୍ଭୁକ୍ତ କରାଯାଇଥିଲା। ଆଜି ଅର୍ଥାତ୍ ଡିସେମ୍ବର ୨୧ରେ ସୁଶାନ୍ତ ସିଂ ରାଜପୁତଙ୍କ ୩୬ତମ ଜନ୍ମଦିନ। ତେବେ ଆଜିର ଏହି ଖାସ୍ ଦିନରେ ଜାଣନ୍ତୁ ତାଙ୍କ ସହ ଜଡ଼ିତ କିଛି କଥା…
୨୦୧୮ରେ ସୁଶାନ୍ତ ଇନ୍ଷ୍ଟାଗ୍ରାମରେ ନିଜର ପୁରୁଣା ପୋଷ୍ଟ ଡିଲିଟ୍ କରିବା ପୂର୍ବରୁ ତାଙ୍କର ନୂତନ କୌଶଳ ପ୍ରଦର୍ଶନ କରୁଥିବା ଏକ ଭିଡିଓ ଶେୟାର କରିଥିଲେ। ‘ମୋର ସ୍ବପ୍ନକୁ ଭଲ ପାଇବା ୧/୫୦ ’ଫ୍ଲାଇଙ୍ଗ ଲାଇସେନ୍ସ ପାଇବାକୁ ଯାଉଛି !!’ ଏହି ସୁନ୍ଦର ଉଡ଼ାଣ (ବୋଇଙ୍ଗ ୭୩୭ ଫିକ୍ସଡ ବେସ ଫ୍ଲାଇଟ ସିମୁଲେଟର) କିଣିବାକୁ ଯାଉଛି। ଯାହା ଦ୍ୱାରା ମୁଁ ମୋର ୫୦ଟି ସ୍ବପ୍ନ ମଧ୍ୟରୁ ପ୍ରଥମଟି ହାସଲ କରିବି।
ସେହିପରି ବାମ ହାତରେ କ୍ରିକେଟ ମ୍ୟାଚ ଖେଳିବା, ଧନୁ ଚାଳନା ଶିଖିବା, ସେନୋଟ୍ରେ ପହଁରିବାର ସ୍ବପ୍ନ, ନିଜ କଲେଜକୁ ଯାଇ ଗୋଟିଏ ସନ୍ଧ୍ୟା ବିତାଇବା, ଏକ ଶକ୍ତିଶାଳୀ ବାଇନୋକୁଲାର ମାଧ୍ୟମରେ ଆଣ୍ଡ୍ରୋମିଡା ଦେଖିବା, ବ୍ଲୁ ହୋଲ୍କୁ ଯାଇ ପହଁରିବା, ଡିଜ୍ନିଲ୍ୟାଣ୍ଡ ପାର୍କ ଯିବା ଆଦି ସ୍ବପ୍ନ ଦେଖିଥିଲେ। ମାତ୍ର ଜୁନ୍ ୨୦୨୦ରେ ସୁଶାନ୍ତଙ୍କ ମୃତ୍ୟୁ ଘଟିବାରୁ ସେସବୁ ସ୍ବପ୍ନ ଆଜି ଅଧୁରା ରହିଯାଇଛି।