ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ପରେ ପ୍ରଶଂସକମାନେ ତାଙ୍କର ଶେଷ ଚଳଚ୍ଚିତ୍ର ଦିଲ ବେଚାରାକୁ ଉତ୍ସାହର ସହିତ ଅପେକ୍ଷା କରିଥିଲେ। ଆଜି ସୁଶାନ୍ତଙ୍କ ଲକ୍ଷ ଲକ୍ଷ ପ୍ରଶଂସକଙ୍କ ଅପେକ୍ଷା ଶେଷ ହେବାକୁ ଯାଉଛି। ଏହି ଅପେକ୍ଷାରେ ଆଉ କିଛି ଘଣ୍ଟା ବାକି ଅଛି।
ଆଜି ସା ୭ ଟା ୩୦ ମିନିଟ୍ରେ ସୁଶାନ୍ତଙ୍କ ଫିଲ୍ମ ଦିଲ ବେଚାରା ଓଟିଟି ପ୍ଲାଟଫର୍ମ ଡିଜନି + ହଟଷ୍ଟାରରେ ମୁକ୍ତିଲାଭ କରିବାକୁ ଯାଉଛି। ସୁଶାନ୍ତଙ୍କ ପାଇଁ ପ୍ରଶଂସକଙ୍କ ଭାବନାକୁ ବଜାୟ ରଖି ଏହି ଚଳଚ୍ଚିତ୍ରଟି ମାଗଣା କରାଯାଇଛି। ବର୍ତ୍ତମାନ ସମସ୍ତେ ଏହି ଚଳଚ୍ଚିତ୍ରକୁ ମାଗଣାରେ ଦେଖିପାରିବେ।
ସୁଶାନ୍ତଙ୍କ ଫିଲ୍ମକୁ ଅନେକ ସେଲିବ୍ରିଟି ମଧ୍ୟ ପ୍ରମୋଟ କରିଛନ୍ତି। ମୁକେଶ ଛାବ୍ରା ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି। ସୁଶାନ୍ତଙ୍କ ଫିଲ୍ମରେ ନାୟିକା ସଞ୍ଜନା ସାଙ୍ଗୀ ଏବଂ ନିର୍ଦ୍ଦେଶକ ମୁକେଶ ଛାବ୍ରା ମଧ୍ୟ ସୋସିଆଲ ମିଡିଆ ଆକାଉଣ୍ଟ ଇନଷ୍ଟାଗ୍ରାମରେ ଏହି ଚଳଚ୍ଚିତ୍ର ସହ ଜଡିତ ସ୍ମୃତି ବାଣ୍ଟୁଛନ୍ତି।
‘ଦିଲ ବେଚାରା’ ହେଉଛି ୨୦୧୪ ହଲିଉଡ ଚଳଚ୍ଚିତ୍ର ‘ଦ ଫଲ୍ଟ ଇନ ଆଓ୍ବାର ଷ୍ଟାର୍ସ’ର ରିମେକ। ଏହି ଚଳଚ୍ଚିତ୍ର ଜନ ଗ୍ରୀନଙ୍କ ପୁସ୍ତକ ଉପରେ ଆଧାରିତ ଥିଲା। ଫିଲ୍ମର ଅନେକ ଗୀତ ରିଲିଜ ହୋଇସାରିଛି। ଏହା ସହିତ ଫିଲ୍ମର ଟ୍ରେଲର ଏକ ନୂଆ ରେକର୍ଡ ସୃଷ୍ଟି କରିଛି।
ସୋସିଆଲ ମିଡିଆରେ ପ୍ରଶଂସକମାନେ କହିଛନ୍ତି ଯେ ଆଜି ସମସ୍ତଙ୍କ ଆଖିରୁ ଲୁହ ଝରିବ । କେହିକେହି କହୁଛନ୍ତି ଏହି ଭଲପାଇବା ଦେଖିବାକୁ ସୁଶାନ୍ତ ଆମ ସମସ୍ତଙ୍କ ମଧ୍ୟରେ ଥାନ୍ତେ କି। ଏହି ପୋଷ୍ଟର ସେୟାର କରି ଚଳଚ୍ଚିତ୍ରର ନିର୍ଦ୍ଦେଶକ ମୁକେଶ ଲେଖିଛନ୍ତି, ‘ଆମେ ତୁମ ସମସ୍ତଙ୍କ ପାଇଁ ଏହାକୁ ଅଧିକ ସ୍ବତନ୍ତ୍ର କରିବାକୁ ଚାହୁଁଛୁ, ତେଣୁ ଏହି ତାରିଖ ଏବଂ ସମୟକୁ ଲକ କର। ଆସନ୍ତୁ ସମସ୍ତେ ଏକାଠି ଦେଖିବା। ଏକାସାଙ୍ଗରେ, ବିଭିନ୍ନ ସ୍ଥାନରୁ, ଦର୍ଶକ ହେବା।ଏହା ସୁଶାନ୍ତଙ୍କ ପାଇଁ ଅଟେ ।
