ମୁମ୍ବାଇ,୨୨।୮-ବଲିଉଡ ଅଭିନେତା ସୁଶାନ୍ତ ସିଂ ମୃତ୍ୟୁ ମାମଲାରେ ଦିନକୁ ଦିନ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ବର୍ତ୍ତମାନ ଏହି ମାମଲାରେ ଏକ ନୂଆ ତଥ୍ୟ ପୁଣି ସାମ୍ନାକୁ ଆସିଛି। ୧୩ ଜୁନ ରାତିରେ ବନ୍ଦ ଥିଲା ସୁଶାନ୍ତଙ୍କ ରୁମ ଲାଇଟ୍। ଯାହା କେବେ ଆଗରୁ ହୋଇ ନ ଥିଲା। ଏଭଳି ଚାଞ୍ଚଲ୍ୟକର ବୟାନ ଦେଇଛନ୍ତି ସୁଶାନ୍ତଙ୍କ ବାନ୍ଦ୍ରା ସ୍ଥିତ ବିଲ୍ଡିଂର ପଡୋଶୀ ଘରେ ରହୁଥିବା ଜଣେ ମହିଳା। ମହିଳାଙ୍କ ଏପରି ବୟାନ ପରେ ଚର୍ଚ୍ଚା ଜୋର ଧରିଛି।
ଉକ୍ତ ମହିଳା ଜଣକ କହିଛନ୍ତି, ସବୁବେଳେ ସକାଳ ୪ଟା ପର୍ଯ୍ୟନ୍ତ ସୁଶାନ୍ତଙ୍କ ରୁମର ଲାଇଟ ଜଳୁଥାଏ। ମାତ୍ର ୧୩ ଜୁନ ରାତିରେ ସୁଶାନ୍ତଙ୍କ ରୁମର ଲାଇଟ ବନ୍ଦ ଥିଲା। ପୂର୍ବରୁ ଏମିତି କେବେ ହୋଇନଥିଲା। ସେହିପରି ୧୩ ଜୁନ ରାତିରେ ସୁଶାନ୍ତଙ୍କ ଘରେ କୌଣସି ପାର୍ଟି ହୋଇ ନ ଥିବା ମହିଳା ଜଣକ କହିଛନ୍ତି। ମହିଳାଙ୍କ ଏପରି ଖୁଲାସ ପରେ ସୁଶାନ୍ତଙ୍କ ମୃତ୍ୟୁ ରହସ୍ୟ ଆହୁରି ଘନେଇବାରେ ଲାଗିଛି। ଅପରପକ୍ଷେ ସିବିଆଇ ଏହି ମାମଲାରେ ତଦନ୍ତ ଜୋରଦାର ଚଳାଇଛି।
