ନୂଆଦିଲ୍ଲୀ,୪।୧: ଦେଶର ପ୍ରମୁଖ ଷ୍ଟେନ୍ଲେସ୍ ଷ୍ଟିଲ୍ ନିର୍ମାତା ତଥା ଜିନ୍ଦଲ ଷ୍ଟେନ୍ଲେସ୍ ଲିମିଟେଡ୍ (ଜେଏସ୍ଏଲ୍)ର ନୂତନ ମୁଖ୍ୟ ମାନବ ସମ୍ବଳ ଅଧିକାରୀ (ସିଏଚ୍ଆର୍ଓ) ଭାବେ ସୁଶୀଲ ବାୱେଜାଙ୍କୁ ନିକଟରେ ନିଯୁକ୍ତି ଦିଆଯାଇଥିବା ଜେଏସ୍ଏଲ୍ ପକ୍ଷରୁ କୁହାଯାଇଛି। ଏହାପୂର୍ବରୁ ସୁଶୀଲ ଡିସିଏମ୍ ଶ୍ରୀରାମ ଲିମିଟେଡ୍, ଆଲ୍କାଟେଲ, କ୍ୟାଡ୍ବରି ଇଣ୍ଡିଆ ଲିମିଟେଡ୍ ଏବଂ ଜିଲେଟ୍ ଇଣ୍ଡିଆ ଭଳି ପ୍ରମୁଖ ଭାରତୀୟ ତଥା ବହୁରାଷ୍ଟ୍ରୀୟ ସଙ୍ଗଠନ ସହ ଦୀର୍ଘ ବର୍ଷ ଧରି କାର୍ଯ୍ୟ କରିଛନ୍ତି। ଏପରିକି ସେ ଇନ୍ଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଣ୍ଟ ଆଣ୍ଡ ଟେକ୍ନୋଲୋଜି (ଆଇଏମ୍ଟି) ଗାଜିଆବାଦର ପୂର୍ବତନ ଛାତ୍ର ଏବଂ ମିଶିଗାନ୍ ୟୁନିଭର୍ସିଟିର ରସ୍ ସ୍କୁଲ ଅଫ୍ ବିଜ୍ନେସ୍ରୁ ମାନବ ସମ୍ବଳ କୌଶଳରେ ଆଡଭାନ୍ସଡ୍ ମାନବ ସମ୍ବଳ କାର୍ଯ୍ୟନିର୍ବାହୀ କାର୍ଯ୍ୟକ୍ରମ କରିଥିବା ଜଣାପଡ଼ିଛି। ବିଶେଷ କରି ଦୀର୍ଘ ୩ ଦଶନ୍ଧିରୁ ଅଧିକ ସମୟ ଧରି କର୍ପୋରେଟ ଜଗତ ସହ ଜଡ଼ିତ ଥିବା ବାୱେଜାଙ୍କ ଦୀର୍ଘ ଅଭିଜ୍ଞତା କମ୍ପାନୀ କର୍ମଚାରୀଙ୍କୁ ଉତ୍ସାହିତ କରିବାର ରଣନୀତି, କର୍ମକ୍ଷେତ୍ରର ସଂସ୍କୃତି ଉନ୍ନତ କରିବା ଓ ପ୍ରତିଭା ପରିଚାଳନାକୁ ଦୃଢ଼ କରିବା ସହ ସଂଗଠନର ଅଭିବୃଦ୍ଧି ଦାୟିତ୍ୱ ନେବେ ବୋଲି କମ୍ପାନୀ ପକ୍ଷରୁ କୁହାଯାଇଛି।
ଏ ସମ୍ପର୍କରେ ଜେଏସ୍ଏଲ୍ର ପରିଚାଳନା ନିର୍ଦ୍ଦେଶକ ଅଭ୍ୟୁଦୟ ଜିନ୍ଦଲ କହିଛନ୍ତି, ଆଜିର ପ୍ରତିଯୋଗିତାମୂଳକ ନିଯୁକ୍ତିର ପାଣିପାଗରେ ସଂଗଠନଗୁଡ଼ିକ ସେମାନଙ୍କର ସଂସ୍କୃତି, ନେତୃତ୍ୱ ଏବଂ ମୂଲ୍ୟବୋଧ ଦ୍ୱାରା ନିଜକୁ ଭିନ୍ନକରି ଗଢ଼ି ତୋଳନ୍ତି। ବିଶେଷକରି ଗ୍ରାହକ ସନ୍ତୁଷ୍ଟି, ସୃଜନଶୀଳତା ଏବଂ ନବସୃଜନ ତଥା ଶିକ୍ଷଣ କ୍ଷମତା ଉପରେ ଆମର ଧ୍ୟାନ କମ୍ପାନୀକୁ ଭିନ୍ନ କରେ। ଆମେ ଠିକ୍ ପ୍ରତିଭାକୁ ଆକର୍ଷିତ କରିବାକୁ ଏବଂ ଉଚ୍ଚ ପ୍ରଦର୍ଶନକାରୀଙ୍କୁ ବଜାୟ ରଖିବାକୁ ଚାହୁଁ।
