ମଥୁରା, ୧୪।୭- ଉତ୍ତର ପ୍ରଦେଶର ମଥୁରାରୁ ଚକିତ କଲାଭଳି ଏକ ଖବର ଆସିଛି। ଦିଲ୍ଲୀରୁ ଫିରୋଜାବାଦ ଯାଉଥିବା ଜଣେ ଅସୁସ୍ଥ ଯୁବତୀଙ୍କୁ କରୋନା ସନ୍ଦେହରେ କଣ୍ଡକ୍ଟର ବସ୍ରୁ ଓହ୍ଲାଇ ଦେଇଥିଲେ। ବସ୍ରୁ ଓହ୍ଲାଇବା ପରେ ଯୁବତୀଙ୍କ ମୃତ୍ୟୁ ହୋଇଯାଇଥିଲା। ଏହି ଘଟଣାରେ ବସ୍ କଣ୍ଡକ୍ଟରଙ୍କ ନାମରେ ହତ୍ୟା ମାମଲା ରୁଜୁ କରାଯାଇଛି। ଏହି ଘଟଣାକୁ ଦୃଷ୍ଟିରେ ରଖି ଦିଲ୍ଲୀ ରାଜ୍ୟ ମହିଳା ଆୟୋଗ ମଥୁରର ପୋଲିସ ଅଧୀକ୍ଷକଙ୍କ ନିକଟକୁ ନୋଟିସ କରି କାଯ୍ୟାନୁଷ୍ଠାନ ଗ୍ରହଣ କରିବା ପାଇଁ କହିଛନ୍ତି। ଘଟଣାରୁ ଜଣାପଡ଼ିଛି ଯେ, ଉତ୍ତର ପ୍ରଦେଶ ଫିରୋଜାବାଦ ଜିଲାର ହେରା ସିଂ ଗ୍ରାମ ସୁଶୀଲ କୁମାର ତାଙ୍କ ସ୍ତ୍ରୀ ଓ ୧୯ ବର୍ଷୀୟା ଝିଅ ଅଂଶିକାଙ୍କ ସହ ଦିଲ୍ଲୀରୁ ବସ୍ ଯୋଗେ ଗ୍ରାମକୁ ଫେରୁଥିଲେ। ବାଟରେ ଅଂଶିକା ଅସୁସ୍ଥ ଅନୁଭବ କରିଥିଲେ। ଏଥିରେ କଣ୍ଡକ୍ଟର ଅଂଶିକାଙ୍କୁ କରୋନା ହୋଇଥିବା ସନ୍ଦେହରେ ଭିଡ଼ି ଭିଡ଼ି ବସ୍ ବାହାରକୁ ନେଉଥିଲେ। ଏହି ସମୟରେ ବସ୍ର ଏକ ଲୁହା ଅଂଶିକାଙ୍କ ମୁଣ୍ଡରେ ମାଡ଼ ହୋଇଥିଲା। ଏହାପରେ ତଳେ ଓହ୍ଲାଇବା ପରେ ତାଙ୍କର ମୃତ୍ୟୁ ହୋଇଯାଇଥିଲା। ଏହି ଘଟଣାରେ ପୋଲିସ କଣ୍ଡକ୍ଟରଙ୍କୁ ଗିରଫ କରିଛି।