ପଦ୍ମପୁର,୩୦ା୩ (ଡି.ଏନ.ଏ.):ଭଦ୍ରକ ଜିଲା ବାସୁଦେବପୁର ବ୍ଲକ ଅଧୀନ ବାଲିମେଦ ଗ୍ରାମରୁ ଏକ ସନ୍ଦିଗ୍ଧ ପାରା ଉଦ୍ଧାର ହୋଇଛି। ପାରା ଗୋଡ଼ରେ ଦୁଇଟି ପିତ୍ତଳ ରିଙ୍ଗ୍ ଲାଗିଥିବା ବେଳେ ସେଥିରେ ଏକ ଫୋନ୍ ନମ୍ବର ଲେଖାଥିବା ଦେଖିବାକୁ ମିଳିଛି।
ସୂଚନା ଅନୁଯାୟୀ, ମଙ୍ଗଳବାର ସନ୍ଧ୍ୟାରେ ଝଡ଼ବର୍ଷା ବେଳେ ବାଲିମେଦ ଗ୍ରାମର ସୁଶୀଲ ମହାନ୍ତି ଘର ପାଖରେ ଉକ୍ତ ପାରାଟିକୁ ଦେଖିଥିଲେ। ପାରା ଗୋଡ଼ରେ ୨ଟି ପିତ୍ତଳ ରିଙ୍ଗ୍ ସଦୃଶ ବନ୍ଧାଯାଇଥିବାବେଳେ ସେଥିରେ ‘ୱାଇ ଯାଦବ’ ନାମ ସହ ମୋବାଇଲ ନମ୍ବର ଲେଖା ରହିଛି। ସନ୍ଦିଗ୍ଧ ପାରାକୁ ଦେଖିବା ପାଇଁ ସେଠାରେ ଲୋକଙ୍କ ଭିଡ଼ ଜମିଥିଲା। ସୁଶୀଲ ପାରାକୁ ଉଦ୍ଧାର କରି ବାସୁଦେବପୁର ବନ ବିଭାଗକୁ ଖବର ଦେଇଥିଲେ। ରାତି ପ୍ରାୟ ୧୧ଟା ବେଳେ ଫରେଷ୍ଟର ପ୍ରଶାନ୍ତ କୁମାର ଦାସ କର୍ମଚାରୀଙ୍କ ସହ ଉକ୍ତ ଗ୍ରାମରେ ପହଞ୍ଚତ୍ ସୁଶୀଲଙ୍କଠାରୁ ପାରାକୁ ନେଇ ବାସୁଦେବପୁର ବନ ବିଭାଗ କାର୍ଯ୍ୟାଳୟରେ ରଖିଥିଲେ। ବୁଧବାର ପୂର୍ବାହ୍ନରେ ବନ ବିଭାଗ କର୍ମଚାରୀମାନେ ପାରାକୁ ନାୟକାଣିଡିହୀ ଥାନା ପୋଲିସକୁ ହସ୍ତାନ୍ତର କରିଥିଲେ। ପାରା ଗୋଡ଼ରେ ଲାଗିଥିବା ରିଙ୍ଗ୍ରେ ଲେଖାଥିବା ନମ୍ବରରୁ ତା’ର ଠିକଣା ସମ୍ପର୍କରେ ଜଣାପଡ଼ିଛି। ଏନେଇ ନାୟକାଣିଡିହୀ ଥାନା ଭାରପ୍ରାପ୍ତ ଅଧିକାରୀ ଶ୍ରୀକାନ୍ତ ପତି କହିଛନ୍ତି, ଉଦ୍ଧାର ହୋଇଥିବା ପାରା ବିଜୟଓ୍ବାଡା ଅଞ୍ଚଳର ଜଣେ ବ୍ୟକ୍ତିଙ୍କର। ସେ ପାରାଗୁଡ଼ିକୁ ରଖି ଟ୍ରେନିଂ ଦେଉଥିବା ବେଳେ ଏହି ପାରା ପଶ୍ଚିମବଙ୍ଗରୁ ଝଡ଼ ସମୟରେ ବାଟ ଭୁଲି ଓଡ଼ିଶା ଭିତରକୁ ପଶିଆସିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। ତେବେ ଅଧିକ ତଦନ୍ତ ଜାରି ରହିଛି। ପ୍ରକାଶଥାଉ କି, କିଛିଦିନ ତଳେ ପାରାଦୀପରେ ଏକ ସନ୍ଦିଗ୍ଧ ପାରା ଠାବ ହୋଇଥିଲା। ମତ୍ସ୍ୟଜୀବୀମାନେ ସମୁଦ୍ରରୁ ଉକ୍ତ ପାରାକୁ ଉଦ୍ଧାର କରିଥିଲେ।