ଢେଙ୍କାନାଳ,୯ା୪(ରତନ ନାୟାର):ଢେଙ୍କାନାଳ ଜିଲା ଗଁଦିଆ ବ୍ଲକ ନିହଲପ୍ରସାଦ ଥାନା ଲାଉଲଇ ଗ୍ରାମର ଏକ ମନ୍ଦିର ପରିସରରୁ ସୋମବାର ଏକ ପାରାକୁ ଅଞ୍ଚଳବାସୀ ଉଦ୍ଧାର କରିଛନ୍ତି। ଉକ୍ତ ପାରାର ଦୁଇ ଗୋଡ଼ରେ ବିଦେଶୀ ଭାଷାରେ ଲେଖାଥିବା ଜିପିଏସ୍ ଟ୍ରାକର ଭଳି ଚିପ୍ ଲାଗିଛି। ଏହାକୁ ଦେଖି ସ୍ଥାନୀୟ ଅଞ୍ଚଳବାସୀ ସନ୍ଦେହ କରିଥିଲେ। ସେମାନେ ତାକୁ ଏକ ପଞ୍ଜୁରୀରେ ରଖି ବନବିଭାଗ ଓ ପୋଲିସକୁ ଖବର ଦେଇଥିଲେ। ଷଡ଼ଙ୍ଗୀ ରେଞ୍ଜ୍ ବନ କର୍ମଚାରୀମାନେ ପହଞ୍ଚତ୍ ପାରାଟିକୁ ଉଦ୍ଧାର କରିବା ସହ ନିହଲପ୍ରସାଦ ଥାନାକୁ ନେଇଥିଲେ। ପୋଲିସ ଅନୁଧ୍ୟାନ କରିବା ପରେ ତାହାକୁ ବନବିଭାଗକୁ ହସ୍ତାନ୍ତର କରିଛି। ପାରାଟି କେଉଁଠାରୁ ଆସିଛି ଓ ଦୁଇ ଗୋଡ଼ରେ ଲାଗିଥିବା ଚିପ୍ କେଉଁ ସଂସ୍ଥାର ଏବଂ ଏଥିରେ କେଉଁ ଦେଶର ଭାଷା ଲେଖାଯାଇଛି, ତାହା ଜଣାପଡିନାହିଁ। ତେବେ ଲେଖାଯିବା ଭାଷା ଚାଇନାର ବୋଲି ଆଲୋଚନା ହେଉଛି। ବନବିଭାଗ ପକ୍ଷରୁ ପାରାକୁ କପିଳାସ ପ୍ରାଣୀ ଉଦ୍ୟାନ ପରିସରରେ ଥିବା ରେଞ୍ଜ୍ କାର୍ଯ୍ୟାଳୟରେ ରଖାଯାଇଛି। ଅନ୍ୟ ଏକ ସୂତ୍ରରୁ ଜଣାପଡ଼ିଛି, କେନ୍ଦ୍ରୀୟ ଗୋଇନ୍ଦା ବିଭାଗ ପକ୍ଷରୁ ପାରା ଗୋଡ଼ରେ ଲାଗିଥିବା ଚିପ୍କୁ ଅଧିକ ତଦନ୍ତ ଓ ପରୀକ୍ଷା ପାଇଁ ଦିଲ୍ଲୀ ପଠାଯିବା ନିମନ୍ତେ ବନ ବିଭାଗକୁ ଆବେଦନ କରାଯାଇଛି। ଏ ସଂକ୍ରାନ୍ତରେ ସଦର ଏସ୍ଡିପିଓ ବିଭୂତି ଭୂଷଣ ମହାପାତ୍ର କହିଛନ୍ତି, ପୋଲିସ ଓ ବନବିଭାଗ ପକ୍ଷରୁ ତଦନ୍ତ କରାଯାଉଛି। ପୋଲିସର ରାଜ୍ୟ କମ୍ୟୁନିକେଶନ ବିଭାଗକୁ ଜଣାଇ ଦିଆଯାଇଛି। ଜିଲା ବନଖଣ୍ଡ ଅଧିକାରୀ ସୁମିତ କୁମାର କର କହିଛନ୍ତି, ପାରାକୁ କପିଳାସ ରେଞ୍ଜ କାର୍ଯ୍ୟାଳୟ ପରିସରରେ ରଖାଯାଇ ତଦନ୍ତ କରାଯାଉଛି। ତେବେ କେନ୍ଦ୍ରୀୟ ଗୋଇନ୍ଦା ବିଭାଗର ଆବେଦନ ସମ୍ପର୍କରେ ପଚରାଯିବାରୁ କିଛି ପଚାରନ୍ତୁ ନାହିଁ, ଏ ନେଇ କିଛି କହିପାରିବେ ନାହିଁ ବୋଲି କହିଥିଲେ।