ଅସ୍ତରଙ୍ଗ,୧୬।୩(ଡି.ଏନ୍.ଏ.): ଓଡ଼ିଶା ପ୍ରତି ବାହ୍ୟ ଶତ୍ରୁର ବିପଦ ବଢ଼ିବାରେ ଲାଗିଛି। ଗତ କିଛିଦିନ ତଳେ ପାରାଦୀପ ପୋର୍ଟ ଅଞ୍ଚଳରୁ ଏକ ସନ୍ଦିଗ୍ଧ ପାରା ଧରାପଡ଼ିଥିବା ବେଳେ ବିଭିନ୍ନ ତଦନ୍ତ କରାଯାଉଛି। ହେଲେ ଏବେ ପୁଣି ପୁରୀ ଜିଲା ଅସ୍ତରଙ୍ଗ ଥାନା ଅନ୍ତର୍ଗତ ନାନପୁର ଗ୍ରାମରୁ ବୁଧବାର ଆଉ ଏକ ସନ୍ଦିଗ୍ଧ ପାରାକୁ ପୋଲିସ ଉଦ୍ଧାର କରିଛି। ଖବର ଅନୁଯାୟୀ, ଏହି ସନ୍ଦିଗ୍ଧ ପାରାଟି ଗତ ୮ଦିନ ହେବ ଉକ୍ତ ଗ୍ରାମରେ ବିଚରଣ କରୁଥିବା ଗ୍ରାମବାସୀ ଦେଖିବାକୁ ପାଇଥିଲେ। ହେଲେ ବୁଧବାର ଅପରାହ୍ନ ୫ଟା ସମୟରେ ନାନପୁର ଗ୍ରାମର ରୂପନ ପତିଙ୍କ ଘର ପାଖରେ ଅନ୍ୟ ପାରାଙ୍କ ସହିତ ଉକ୍ତ ସନ୍ଦିଗ୍ଧ ପାରାଟି ବସିଥିଲା। ରୂପନ ସନ୍ଦେହ କରି ଉକ୍ତ ପାରାଟିକୁ ଧରିବାକୁ ସକ୍ଷମ ହୋଇଥିଲେ। ପାରାଟିର ଗୋଡ଼ରେ କିଛି ବନ୍ଧାଯାଇଥିବାରୁ ସେ ପୋଲିସକୁ ଜଣାଇଥିଲେ। ଖବରପାଇ ଅସ୍ତରଙ୍ଗ ଥାନା ଅଧିକାରୀ ତଥା ନୂଆଗଡ ସାମୁଦ୍ରିକ ଥାନା ଭାରପ୍ରାପ୍ତ ଅଧିକାରୀ ପଞ୍ଚାନନ ପରିଡାଙ୍କ ନେତୃତ୍ୱରେ ଏକ ଟିମ୍ ଘଟଣାସ୍ଥଳରେ ପହଞ୍ଚି ସନ୍ଦିଗ୍ଧ ପାରାଟିକୁ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛନ୍ତି। ତେବେ ପାରାଟିର ଗୋଟିଏ ଗୋଡରେ ପିତ୍ତଳ ଓ ଆଉ ଗୋଟେ ଗୋଡ଼ରେ ପ୍ଲାଷ୍ଟିକର ଏକ ରିଙ୍ଗ୍ ଲାଗିଛି। ସେଥିରେ ରେଡି ଭିଏସ୍ପି ଡିଏନ୍(Ready VSP DN ) ଇଂଲିଶରେ ଲେଖାଯାଇଛି। ପ୍ଲାଷ୍ଟିକ ରିଙ୍ଗରେ ୩୧ ଲେଖାଯାଇଛି। ପୋଲିସ ସନ୍ଦିଗ୍ଧ ପାରାକୁ ଘର ମାଲିକଙ୍କ ହେପାଜତରେ ରଖିଛନ୍ତି। ତେବେ ଉକ୍ତ ପାରାଟିକୁ କେଉଁଠାରୁ, କିଏ ପଠାଇଛି ତାହା ଜଣାପଡ଼ି ନ ଥିବାବେଳେ ଗୁରୁବାର ଜିଲାରୁ ତଦନ୍ତକାରୀ ଦଳ ଆସିବା ପରେ ପ୍ରକୃତ ତଥ୍ୟ ଜଣାପଡିବ ବୋଲି ଥାନା ଅଧିକାରୀ ପରିଡ଼ା ସୂଚନା ଦେଇଛନ୍ତି। ଏହି ଘଟଣାକୁ ନେଇ ଅସ୍ତରଙ୍ଗ ଅଞ୍ଚଳରେ ଏବେ ଚର୍ଚ୍ଚା ଜୋର ହେଉଛି।