ବାସୁଦେବପୁର/ପଦ୍ମପୁର, ୨୫।୭ (ଡି.ଏନ.ଏ.)-ଭଦ୍ରକ ଜିଲା ବାସୁଦେବପୁର ବ୍ଲକ ବିଦେଇପୁର କ୍ଲଷ୍ଟରର ସୁନାମୁହିଁ ଉଚ୍ଚ ପ୍ରାଥମିକ ବିଦ୍ୟାଳୟରେ ଛାତ୍ରୀମାନଙ୍କୁ ମାଡ଼ ଘଟଣାରେ ନିଲମ୍ବିତ ଶିକ୍ଷକ କଳ୍ପତରୁ ମଲିକଙ୍କୁ ସୋମବାର ଅପରାହ୍ନରେ ଚାନ୍ଦିମାଳ ବଜାରରୁ ପୋଲିସ ଗିରଫ କରିଛି। ଆହତ ଛାତ୍ରୀଙ୍କ ଅଭିଭାବକଙ୍କ ଅଭିଯୋଗ ଆଧାରରେ ଶିକ୍ଷକ ମଲିକଙ୍କୁ ଗିରଫ ପରେ କୋର୍ଟଚାଲାଣ କରାଯାଇଥିବା କଷିଆ ସାମୁଦ୍ରିକ ଥାନା ଆଇଆଇସି ପ୍ରଫୁଲ୍ଲ କୁମାର ସିଂ କହିଛନ୍ତି।
ସୂଚନାଯୋଗ୍ୟ, ଶିକ୍ଷକ ମଲିକ ଗତ ଶନିବାର ପାଠ ପଢ଼ାଇବା ବେଳେ ଉକ୍ତ ବିଦ୍ୟାଳୟର ୧୪ ଛାତ୍ରୀଙ୍କୁ ମାଡ଼ ମାରିଥିବା ବେଳେ ୪ ଜଣ ଆହତ ହୋଇଥିଲେ। ଏହି ଘଟଣାରେ ରବିବାର ତାଙ୍କୁ ବ୍ଲକ ଶିକ୍ଷାଧିକାରୀ ନିଲମ୍ବନ କରିଥିଲେ। ଆହତ ଛାତ୍ରୀଙ୍କ ଅଭିଭାବକଙ୍କ ଅଭିଯୋଗ କ୍ରମେ କଷିଆ ସାମୁଦ୍ରିକ ଥାନାରେ ମାମଲା(ନଂ.୮୯/୨୨) ରୁଜୁ କରାଯାଇଛି।