ଟୋକିଓ, ୧ା୮ (ଏପି)-ଡୋପିଂ ପାଇଁ ନାଇଜେରିଆନ ସ୍ପ୍ରିଣ୍ଟର ବ୍ଲେସିଂ ଓକାଗବାରେଙ୍କୁ ଶନିବାର ସାମୟିକ ସସ୍ପେଣ୍ଡ କରାଯାଇଛି। ଅଲିମ୍ପିକ୍ସ ମହିଳା ୧୦୦ମିଟର ସେମିଫାଇନାଲ ପୂର୍ବରୁ ତାଙ୍କ ଡୋପ୍ ଟେଷ୍ଟ ଫଳାଫଳ ଖବର ଆସିଥିଲା। ଜୁଲାଇ ୧୯ରେ ପ୍ରତିଯୋଗିତା ବାହାରେ ଓକାଗବାରେଙ୍କ ଡୋପ୍ ଟେଷ୍ଟ ହୋଇଥିଲା। ତାଙ୍କଠାରୁ ସଂଗ୍ରହ କରାଯାଇଥିବା ନମୁନାରେ ମାନବ ବିକାଶ ହରମୋନ ଠାବ କରାଯାଇଥିଲା। ଯାହାଫଳରେ ନିୟମାନୁସାରେ ଆଥ୍ଲେଟିକ୍ସ ଇଣ୍ଟିଗ୍ରିଟି ୟୁନିଟ୍ (ଏଆଇୟୁ) ତାଙ୍କୁ ତୁରନ୍ତ ସାମୟିକ ସସ୍ପେଣ୍ଡ କରିଥିଲା। ଡୋପ୍ ଟେଷ୍ଟର ଫଳାଫଳ ଶୁକ୍ରବାର ଟ୍ରାକ୍ ଆଣ୍ଡ ଫିଲ୍ଡ ଆଣ୍ଟି ଡୋପିଂ ପରିଷଦର ହସ୍ତଗତ ହୋଇଥିଲା। ସେତେବେଳକୁ ଟୋକିଓସ୍ଥିତ ଅଲିମ୍ପିକ ଷ୍ଟାଡିୟମରେ ଟ୍ର୍ରାକ୍ ପ୍ରତିଯୋଗିତାର ପ୍ରଥମ ଦିବସରେ ୧୦୦ମିଟର ହିଟ୍ ଦୌଡ଼ ଶେଷ ହୋଇସାରିଥିଲା। ଓକାଗବାରେ ୧୧.୦୫ ସେକେଣ୍ଡ ଟାଇମିଂରେ ହିଟ୍ ଜିତିଥିଲେ। ନାଇଜେରିଆନ ଆଥ୍ଲେଟ ଜଣକ ଚାହିଁଲେ ତାଙ୍କ ବି’ ସାମ୍ପୁଲ ପରୀକ୍ଷା ପାଇଁ ଆବେଦନ କରିପାରିବେ। ୩୨ ବର୍ଷୀୟା ଓକାଗବାରେ ୨୦୦୮ ବେଜିଂ ଅଲିମ୍ପିକ୍ସ ଓ ୨୦୧୩ ବିଶ୍ୱ ଚାମ୍ପିୟନଶିପ୍ରେ ରୌପ୍ୟ ଜିତିଥିଲେ। ସେ ଆହୁରି ମଧ୍ୟ ମସ୍କୋଠାରେ ୨୦୧୩ ବିଶ୍ୱ ଚାମ୍ପିୟନଶିପ୍ ୨୦୦ ମିଟର ଦୌଡ଼ରେ ସ୍ବର୍ଣ୍ଣ ବିଜୟିନୀ ଶେଲି ଆନ୍ ଫ୍ରେଜର ପ୍ରାଇସ୍ଙ୍କ ପଛରେ ବ୍ରୋଞ୍ଜ ଜିତିଥିଲେ। ଟୋକିଓରେ ସେ ୧୦୦ ମିଟର ଟାଇଟଲ ଫେଭରାଇଟ୍ ଥିଲେ। ଆଥ୍ଲେଟିକ୍ସ ଇଣ୍ଟିଗ୍ରିଟି ୟୁନିଟ୍ ୩ ଦିନ ପୂର୍ବେ ଘୋଷଣା କରିଥିଲା ଯେ, ବିଭିନ୍ନ ଦେଶର ୨୦ଜଣ ଆଥ୍ଲେଟଙ୍କୁ ଅଲିମ୍ପିକ୍ସରେ ଅଂଶଗ୍ରହଣ ପାଇଁ ଅଯୋଗ୍ୟ ଘୋଷଣା କରାଯାଇଛି। ସେମାନଙ୍କ ମଧ୍ୟରେ ନାଇଜେରିଆର ୧୦ ଟ୍ରାକ୍ ଆଣ୍ଡ୍ ଫିଲ୍ଡ ଆଥ୍ଲେଟ ରହିଥିଲେ। କାରଣ ଏମାନେ ସମସ୍ତେ ଡୋପିଂ ଟେଷ୍ଟର ସମସ୍ତ ଆବଶ୍ୟକତକୁ ପୂରଣ କରି ନ ଥିଲେ।
