ସମ୍ବଲପୁର,୧୪ା୬(ଶୁଭାଶିଷ ପାଢୀ): ସମ୍ବଲପୁର ବନଖଣ୍ଡ ସଦର ରେଞ୍ଜ ବସିଆପଡା ଗ୍ରାମ ରାସ୍ତାପାର୍ଶ୍ୱ ନାଳ ନିକଟରେ ମଙ୍ଗଳବାର ଏକ ଦନ୍ତାହାତୀର ମୃତଦେହକୁ ବନ ବିଭାଗ ଠାବ କରିଥିଲା। ପେଟଜନିତ ରୋଗେରେ ଦନ୍ତାର ମୃତ୍ୟୁ ହୋଇଥିବା ନେଇ ଗଣମାଧ୍ୟମରେ ଏସିଏଫ୍ ତେଜରାଜ ନାୟକ ସୂଚନା ଦେଇଥିଲେ। ଏବେ ହାତୀମୃତ୍ୟୁ ଘଟଣାକୁ ନେଇ ବନ ବିଭାଗ ଉପରେ ସନ୍ଦେହ ସୃଷ୍ଟି ହୋଇଛି। ସରକାର ହାତୀମୃତ୍ୟୁ ଘଟଣାରେ ତଦନ୍ତ କରିବା ପାଇଁ ମିଳିତ ଟାକ୍ସଫୋର୍ସ ଗଠନ କରିଛନ୍ତି। କୌଣସି ସ୍ଥାନରେ ହାତୀ ମୃତ୍ୟୁ ଘଟିଲେ ଏହି ଟାକ୍ସଫୋର୍ସ ଘଟଣାସ୍ଥଳ ପରିଦର୍ଶନ କରି ତଦନ୍ତ ପରେ ସ୍ବତନ୍ତ୍ର ରିପୋର୍ଟ ପ୍ରସ୍ତୁତ କରିଥାନ୍ତି। ଏହି ଟିମ୍ରେ ବିଶେଷଜ୍ଞ ରହିଥାନ୍ତି। ଅନେକ ସ୍ଥାନରେ ବନ ବିଭାଗ ଅଧିକାରୀ ନିଜ ଦୋଷ ଦୁର୍ବଳାତାକୁ ଚପାଇବାକୁ ଉଦ୍ୟମ କରି ମିଥ୍ୟା ରିପୋର୍ଟ ଦେଇଥାନ୍ତି। ତାହାକୁ ରୋକାଯିବା ଓ ସତ୍ୟାସତ୍ୟ ସାମ୍ନାକୁ ଆଶିବା ଲାଗି ଏହି ଟାକ୍ସଫୋର୍ସ ଗଠନ କରାଯାଇଛି। ହେଲେ ଟାକ୍ସଫୋର୍ସ ଯାଞ୍ଚ ନ କରି ଦନ୍ତାର ମୃତଦେହକୁ ପୋତି ଦିଆଯାଇଥିବା ପରିବେଶ ପ୍ରେମୀ ଅଭିଯୋଗ କରିଛନ୍ତି।
ପ୍ରାଣିଧନ ବିଭାଗ ଦଳ ହାତୀର ବ୍ୟବଚ୍ଛେଦ କରିଥିଲେ। ହେଲେ ଏ ପର୍ଯ୍ୟନ୍ତ ରିପୋର୍ଟ ଦାଖଲ କରି ନାହାନ୍ତ। ପେଟ ରୋଗରେ ପୀଡିତ ନେଇ ପ୍ରାଥମିକ ତଦନ୍ତରୁ ଜଣାପଡିଥିବା ବନ ବିଭାଗ କହୁଥିଲା। ହେଲେ ହାତୀ ମୁହଁରୁ ରକ୍ତ ବାହାରୁଥିବାରୁ ଏହାକୁ ଶିକାର କରାଯାଇଥିବା, ବିଶାକ୍ତ ଖାଦ୍ୟ, କିମ୍ବା ଆକ୍ରମଣ କରି ଶିକାରୀମାନେ ଆହତ କରିଥିବା ଅଭିଯୋଗ ହେଉଛି। ଏ ସମ୍ପର୍କରେ ଏସିଏଫ୍ ନାୟକଙ୍କୁ ଫୋନ ଯୋଗେ ଯୋଗାଯୋଗ କରାଯାଇଥିଲେ ମଧ୍ୟ ସମ୍ଭବ ହୋଇ ପାରିନାହିଁ। ଆର୍ସିସିଏଫ୍ କେ. ଆଶିଷ କୁମାର କହିଛନ୍ତି, ଦନ୍ତା ମୃତ୍ୟୁ ପରେ ଟାକ୍ସଫୋର୍ସ ଯାଞ୍ଚ କରିବା ନିୟମ ରହିଛି। ଘଟଣାକୁ ନେଇ ଟାକ୍ସଫୋର୍ସକୁ ଅବଗତ କରାଯାଇଥିଲା। ଶିକାର ହୋଇ ନ ଥିବା ନେଇ ସୂଚନା ଦେବା ପରେ ପୋତିବା ପାଇଁ ଅନୁମତି ଦେଇଥିଲେ।
