ଭଞ୍ଜନଗର,୨୪ା୪(ଡି.ଏନ୍.ଏ.): ବେଲଗୁଣ୍ଠାରେ କାର୍ଯ୍ୟରତ ଥିବା ଖବରଦାତା ମଦନ ମୋହନ ପାଢ଼ୀ(୩୮)ଙ୍କ ଶନିବାର ରାତିରେ ମୃତ୍ୟୁ ଘଟିଛି। ପୋଲିସ ରବିବାର ମଦନଙ୍କ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଭଞ୍ଜନଗର ହସ୍ପିଟାଲକୁ ପଠାଇଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡିବ ବୋଲି ପୋଲିସ କହିଛି।
ମଦନଙ୍କ ମୃତ୍ୟୁକୁ ନେଇ ବେଲଗୁଣ୍ଠା ଅଞ୍ଚଳର ଖବରଦାତାମାନେ ଶୋକବ୍ୟକ୍ତ କରିଛନ୍ତି। ପ୍ରକାଶ ଯେ, ମଦନ ରାତି ପ୍ରାୟ ୧୦ଟାରେ ଗ୍ରାମ ଗିରିସୋଲାରେ ଖାଇବା ପରେ ନିଜ ଫାର୍ମ ହାଉସ୍କୁ ଶୋଇବାକୁ ଯାଇଥିଲେ। ସେଠାରେ କିଛି ସାଙ୍ଗ ରାତିରେ ଥିଲେ। ରବିବାର ସକାଳେ କିଛି ଲୋକ ମଦନଙ୍କୁ ଫାର୍ମରେ ଅଚେତ ଅବସ୍ଥାରେ ପଡ଼ିଥିବା ଦେଖି ପରିବାର ଲୋକଙ୍କୁ ଜଣାଇଥିଲେ। ପରିବାର ଲୋକେ ତାଙ୍କୁ ଭଞ୍ଜନଗର ହସ୍ପିଟାଲ ଆଣିଥିଲେ। ସେଠାରେ ଡାକ୍ତର ମଦନଙ୍କୁ ମୃତ ଘୋଷଣା କରିଥିଲେ। ମଦନଙ୍କ ମୋବାଇଲ ଏବଂ ବାଇକ୍ ଚାବି ମିଳୁନାହିଁ। ଏଥିସହ ତାଙ୍କ ଶରୀରର ବିଭିନ୍ନ ଅଂଶ କଳା ପଡି ଯାଇଥିଲା। ଅନ୍ୟପକ୍ଷେ ମଦନଙ୍କ ମୃତ୍ୟୁକୁ ନେଇ ପରିବାର ଲୋକେ ସନ୍ଦେହ ବ୍ୟକ୍ତ କରିଛନ୍ତି।