ବାଲିପାଟଣା,୨୪(ଡି.ଏନ୍.ଏ.): ବାଲିପାଟଣା ଥାନା ଅନ୍ତର୍ଗତ ଭାକରସାହି ଗ୍ରାମରେ ଜଣେ ଯୁବକଙ୍କ ସନ୍ଦେହଜନକ ମୃତ୍ୟୁ ଘଟିଛି। ସେ ହେଲେ ଉକ୍ତ ଗ୍ରାମର ରଶ୍ମିରଞ୍ଜନ ବିଶ୍ୱାଳ। ହେଲେ ରଶ୍ମିରଞ୍ଜନଙ୍କ ମୃତ୍ୟୁ ପୂର୍ବରୁ ଏକ ଭିଡିଓରେ ତାଙ୍କ ପରିବାରର ସମ୍ପର୍କୀୟମାନେ ଜୀବନରେ ମାରିଦେବା ପାଇଁ ଯୋଜନା କରିଥିବା ନେଇ କହିଛନ୍ତି। ତେବେ ଏହି ଘଟଣା ଗୁରୁବାର ରାତିରେ ହୋଇଥିବା ବେଳେ ଏବେ ଉକ୍ତ ଭିଡିଓଟି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଅନ୍ୟପଟେ ଘଟଣାକୁ ୩ ଦିନ ବିତିଯାଇଥିଲେ ମଧ୍ୟ ପରିବାର ପକ୍ଷରୁ ଏ ନେଇ ଥାନାରେ କୌଣସି ଅଭିଯୋଗ ହୋଇ ନାହିଁ। ଏପରିକି ଗ୍ରାମରେ କାହାକୁ କିଛି ନ ଜଣାଇ ଯୁବକଙ୍କ ମୃତଦେହକୁ ଶୁକ୍ରବାର ଗଁା ଶ୍ମଶାନରେ ପୋଡ଼ି ଦିଆଯାଇଛି। ଖବରପାଇ ପୋଲିସ ପ୍ରାଥମିକ ତଦନ୍ତ ଚଳାଇଥିବା ବେଳେ ପରିବାର ଲୋକଙ୍କୁ ମଧ୍ୟ ପଚରାଉଚରା ଚଳାଇଛି। ସେହିପରି ଶନିବାର ଏସିପି ଶୁଭନାରାୟଣ ମୁଦୁଲିଙ୍କ ନେତୃତ୍ୱରେ ସାଇଣ୍ଟିଫିକ ଟିମ୍ ଗଁା ଶ୍ମଶାନରେ ପହଞ୍ଚତ୍ ପାରିପାର୍ଶ୍ୱିକ ଅବସ୍ଥାକୁ ଅନୁଧ୍ୟାନ କରିବା ସହ ମୃତ ଯୁବକଙ୍କ ପାଉଁଶ ନେଇ ଟେଷ୍ଟ ପାଇଁ ଲାବୋରେଟୋରିକୁ ପଠାଇଛି।
ସୂଚନା ଅନୁଯାୟୀ, ଭାଇରାଲ ହେଉଥିବା ଭିଡିଓରେ ରଶ୍ମିରଞ୍ଜନ ଭୟରେ ଥିବାବେଳେ ପରିବାରର କେତେଜଣ ସମ୍ପର୍କୀୟ ଓ ଏକ କମ୍ପାନୀର ମ୍ୟାନେଜର ଥିବା ଜଣେ ମହିଳା ମିଶି ତାଙ୍କୁ ମାରିଦେବାକୁ ଷଡ଼ଯନ୍ତ୍ର କରୁଛନ୍ତି। ତେଣୁ ମୋ ମୃତ୍ୟୁର କାରଣ ସରକାର ଜାଣିବା ଦରକାର। ଏଥିସହ ପୋଲିସ ସହଯୋଗପୂର୍ବକ ସେମାନଙ୍କୁ ଦଣ୍ଡ ଦିଅନ୍ତୁ ବୋଲି କହିଛନ୍ତି। କିନ୍ତୁ ରଶ୍ମିରଞ୍ଜନଙ୍କ ପରିବାର ଲୋକ ପୁଅ ଆତ୍ମହତ୍ୟା କରିଥିବା କହିବା ସହ ଅଧିକ କିଛି କହିନାହାନ୍ତି। ଅପରପକ୍ଷେ ଗ୍ରାମର କେତେଜଣ ନିଜ ନାମ ଗୋପନ ରଖି କହିଛନ୍ତି, ଯୁବକଙ୍କର ଲକ୍ଷାଧିକ ଟଙ୍କାର ଲୋନ ଥିଲା। ତାହା ଶୁଝିବାକୁ ସେ ନିଜ ପରିବାର ଓ ଉକ୍ତ ଯୁବତୀଙ୍କ ସହାୟତା ଲୋଡିଥିଲା। ହେଲେ ସେମାନେ ସମ୍ମତି ପ୍ରଦାନ କରି ନ ଥିବାରୁ ମନାନ୍ତର ହୋଇଥିଲା। ତେଣୁ ଆତ୍ମହତ୍ୟାକୁ ବିକଳ୍ପ ଭାବେ ବାଛିଥାଇପାରେ। ଏପଟେ ବାଲିପାଟଣା ଥାନା ଅଧିକାରୀ ଓଁପ୍ରକାଶ କୁହନ୍ତି, ଯେହେତୁ ପରିବାର ପକ୍ଷରୁ କୌଣସି ଅଭିଯୋଗ ହୋଇନାହିଁ କେବଳ ଷ୍ଟେଶନ ଡାଏରି କରି ତଦନ୍ତ କରାଯାଉଛି। ଏପରିକି ସାଇଣ୍ଟିଫିକ ଟିମ୍ ମଧ୍ୟ ତଦନ୍ତ ଚଳାଇଛି। ରିପୋର୍ଟ ଆସିଲେ ଅଧିକ କିଛି ଜଣାପଡ଼ିବ।