ପାରାଦୀପ,୧।୧୨(ଶରତ ରାଉତ):ପାରାଦୀପ ବନ୍ଦର ପିଆଇସିଟି (ପାରାଦୀପ ଇଣ୍ଟରନ୍ୟାସନାଲ କାର୍ଗୋ ଟର୍ମିନାଲ)ବର୍ଥରୁ ଶୁକ୍ରବାର ଭୋରୁ କିଛି ସନ୍ଦିଗ୍ଧ ସାମଗ୍ରୀ ଜବତ ହୋଇଛି। ମେରାଇନ ପୋଲିସ, କଷ୍ଟମ୍ସ ଓ ସିଆଇଏସଏଫ ମିଳିତ ଭାବେ ଯାଞ୍ଚ କରୁଛନ୍ତି। ପ୍ରାଥମିକ ଭାବେ ଡଗ ସ୍କ୍ବାର୍ଡ, ବୋମା ନିଷ୍କ୍ରିୟକାରୀ ଟିମ ଯାଞ୍ଚ କରିଥିଲେ। ସେଥିରେ ସେପରି କିଛି ମିଳିନାହିଁ। ଯେଉଁ ୮ ଟି ପ୍ୟାକେଟ ରହିଛି ତାହା ବ୍ରାଉନସୁଗାର ବୋଲି କୁହାଯାଇଛି। ଉକ୍ତ ସାମଗ୍ରୀକୁ କଷ୍ଟମ୍ସ ବିଭାଗ ଅଧିକ ଯାଞ୍ଚ ପାଇଁ ଭୁବନେଶ୍ୱର ପଠାଇଛନ୍ତି। ଏହି ଘଟଣାକୁ ନେଇ ପାରାଦୀପ ବନ୍ଦର ଅଞ୍ଚଳରେ ଚର୍ଚ୍ଚା ଜୋର ଧରିଛି।
ଏମ ଭି ଦେବୀ ନାମକ ଜାହାଜ ଇଣ୍ଡୋନେସିଆରୁ ଆସି ପିଆଇସିଟି ବର୍ଥରେ ଲାଗିଛି। ସେଥିରେ ଜେଏସପିଏଲ କମ୍ପାନୀର ଷ୍ଟିଲ ବୋଝେଇ ହେଉଥିଲା। ବୋଝେଇ ବେଳେ ୮ଟି ପ୍ୟାକେଟ ଦେଖି ପ୍ରଥମେ କର୍ମଚାରୀମାନେ ଆତଙ୍କିତ ହୋଇ ପଡିଥିଲେ। ଏହି ଖବର ପାଇ କଷ୍ଟମ୍ସ ବିଭାଗ ଯାଞ୍ଚ କରିଥିଲେ। ଜବତ ପ୍ୟାକେଟରେ ପ୍ରାୟ ୮ରୁ ୧୦ କେଜି ନିଶା ଦ୍ରବ୍ୟ ଅଛି ବୋଲି ଜଣାପଡିଛି। ପାରାଦୀପ ବନ୍ଦରରେ ଏଭଳି ଘଟଣା ପ୍ରଥମ ବୋଲି ଜଣାପଡିଛି।