ବେମେତରା, ୧୯।୭: ଝିଅର ଚରିତ୍ରକୁ ସନ୍ଦେହ କରି ଜଣେ ବାପା କେତେ ହିଂସ୍ରରୂପ ଧାରଣ କରିବାରେ ତାହା ଛତିଶଗଡ଼ର ବେମେତରା ଜିଲାରେ ଦେଖିବାକୁ ମିଳିଛି। ବେମେତରାର ନାନ୍ଦଲ ଗ୍ରାମର ହରିଶଙ୍କର ସାହୁ କିଛିଦିନ ହେବ ତାଙ୍କ ୧୫ ବର୍ଷୀୟ ନାବାଳିକା ଝିଅର ଚରିତ୍ର ଉପରେ ସନ୍ଦେହ ପ୍ରକାଶ କରି ଆସୁଥିଲେ। ହରିଶଙ୍କରଙ୍କ ଝିଅର ସେହି ଗ୍ରାମର ଜଣେ ଯୁବକଙ୍କ ସହ ପ୍ରେମ ସମ୍ପର୍କ ରହିଥିଲା। ସେହି କାରଣଣୁ ସେ ଅଧିକାଂଶ ସମୟ ଚାପରେ ରହୁଥିଲେ। ଏପରିକି ଝିଅ ଚରିତ୍ର ଉପରେ ସନ୍ଦେହ କରିବାରେ ଲାଗିଥିଲେ। ଶେଷରେ କ୍ରୋଧରେ ଦିନେ ହିତାହିତ ଜ୍ଞାନ ଭୁଲି ଝିଅକୁ ପିଟିପିଟି ମାରି ଦେଇଥିଲେ। ଏହି ଘଟଣା ଗତ ବୁଧବାର ଘଟିଥିଲା। ବେମେତରା ଜିଲା ଚିକିତ୍ସାଳୟରେ ଚିକିତ୍ସତ ଅବସ୍ଥାରେ ନାବାଳିକାଙ୍କ ମୃତ୍ୟୁ ହୋଇଥିଲା। ପୋଲିସ ତଦନ୍ତ କରି ହରିଶଙ୍କର ଝିଅକୁ ପିଟି ପିଟି ମାରିଥିବା ଜାଣିବାକୁ ପାଇଥିଲା। ଏହାପରେ ତାଙ୍କୁ ଥାନାକୁ ନେଇ ଜେରା କରିଥିଲେ ମଧ୍ୟ ହରିଶଙ୍କର ପ୍ରଥମେ ଏହାକୁ ଅସ୍ବୀକାର କରିଥିଲା। କିନ୍ତୁ ପୋଲିସର ଚାପରେ ସେ ବେଶି ସମୟ କଥାକୁ ଲୁଚାଇ ରଖିପାରି ନ ଥିଲେ। ଏବଂ ଶେଷରେ ଝିଅକୁ ମାରି ଦେଇଥିବା ସ୍ବୀକାର କରିଥିଲେ। ଏହି ଘଟଣାରେ ପୋଲିସ ହରିଶଙ୍କରକୁ ଗିରଫ କରିଛି।
