ଯାଜପୁରରୋଡ,୨୫ା୧୧(ପବିତ୍ର ରଞ୍ଜନ ମହାନ୍ତି): ବ୍ୟାସନଗର ସହରର ମାକ୍ସ ଶୋ’ରୁମ୍ ନିକଟରୁ ଜଣେ ମହିଳାଙ୍କଠାରୁ ସନ୍ଦେହଜନ ଭାବେ ଜଣେ ୬ ମାସର ଶିଶୁକନ୍ୟାଙ୍କୁ ଉଦ୍ଧାର କରାଯାଇଛି। ପରେ ତାଙ୍କୁ ଜିଲା ଶିଶୁ ସୁରକ୍ଷା ଅଧିକାରୀଙ୍କୁ ହସ୍ତାନ୍ତର କରାଯାଇଛି। ଏଥିସହିତ ସମ୍ପୃକ୍ତ ମହିଳାଙ୍କୁ ପୋଲିସ ଅଟକ ରଖି ପଚରାଉଚରା କରିବା ପରେ ଛାଡ଼ିଦେଇଛି।
ଶୁକ୍ରବାର କୋରେଇ ଥାନା ଅନ୍ତର୍ଗତ କଣ୍ଟାଝରିଗଡ଼ ଅଞ୍ଚଳର ସମ୍ପୃକ୍ତ ମହିଳା ଶିଶୁକନ୍ୟାକୁ ନେଇଯାଉଥିଲେ। ଲୋକେ ତାଙ୍କୁ ସନ୍ଦେହ କରି ଅଟକାଇବା ସହିତ ଯାଜପୁର ରୋଡ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ଶିଶୁକନ୍ୟା ସମ୍ପର୍କରେ ସମ୍ପୃକ୍ତ ମହିଳାଙ୍କୁ ପଚରାଉଚରା କରିଥିଲା। ମହିଳା ଜଣକ ଯାଜପୁର ରୋଡ୍ ଷ୍ଟେଟ ବ୍ୟାଙ୍କ ମୁଖ୍ୟ ଶାଖା ନିକଟରୁ ଶିଶୁକନ୍ୟାଙ୍କୁ ପାଇଥିବା କହିଥିଲେ। ପୋଲିସ ତାଙ୍କୁ ଘଟଣାସ୍ଥଳକୁ ନେବା ପରେ ସେ ଠିକ ସ୍ଥାନ କହି ପାରି ନ ଥିଲେ। ତାଙ୍କ କଥାରେ ତାଳମେଳ ରହୁ ନ ଥିବା ଲକ୍ଷ୍ୟ କରି ତାଙ୍କୁ ପୋଲିସ ଥାନାକୁ ନେଇଥିଲା। ଥାନାରେ ଶିଶୁକନ୍ୟା ଏବଂ ମହିଳା ପହଞ୍ଚିବା ପରେ ମହିଳା ଉକ୍ତ ଶୋ’ରୁମ୍ରେ ଛାଡ଼ିଥିବା ଶିଶୁକନ୍ୟାଙ୍କ କଣ୍ଢେଇ, ଖେଳଣା ଓ ବିଭିନ୍ନ ନିତ୍ୟ ବ୍ୟବହାର୍ଯ୍ୟ ଆସବାବପତ୍ର ଥାନାକୁ ହସ୍ତାନ୍ତର କରାଯାଇଥିଲା। ଏସବୁକୁ ଲକ୍ଷ୍ୟ କଲେ ଶିଶୁକନ୍ୟାଙ୍କୁ ତାଙ୍କ ମା’ ବିକ୍ରି କରି ଦେଇଥିବା ସହରରେ ଆଲୋଚନା ଜୋର ଧରିଛି। ଶିଶୁକନ୍ୟାଙ୍କୁ ଯାଜପୁର ରୋଡ ଥାନାଧିକାରୀ ଉପେନ୍ଦ୍ର ପ୍ରଧାନ ଯାଜପୁର ଶିଶୁ ସୁରକ୍ଷା ଅଧିକାରୀଙ୍କୁ ହସ୍ତାନ୍ତର କରିଥିବା କହିଛନ୍ତି।