ଦିଗପହଣ୍ଡି,୧୪ା୮: ଗଞ୍ଜାମ ଜିଲା ଦିଗପହଣ୍ଡି ବ୍ଲକ କଇଠଡ଼ା ପଞ୍ଚାୟତ କମଳାପୁର ଗ୍ରାମର ମୋହନ ଚରଣ ମଲ୍ଲିକଙ୍କୁ ଗୁଣିଆ ସନ୍ଦେହରେ କିଛି ଗ୍ରାମବାସୀ ମାଡ଼ ମାରିବା ସହ ନାନା ନିର୍ଯାତନା ଦିଆଯାଇଥିବା ଅଭିଯୋଗ ହୋଇଛି। ତାଙ୍କୁ ୩ ଲକ୍ଷ ଟଙ୍କା ଜରିମାନା ଦେବାକୁ ଗ୍ରାମବାସୀ ଫତଓ୍ବା ଜାରି କରିଛନ୍ତି। ଜରିମାନା ଦେଇ ନ ପାରିବାରୁ ତାଙ୍କ ପରିବାର ଲୋକଙ୍କୁ ଗ୍ରାମରୁ ତଡ଼ି ଦିଆଯାଇଥିବା ଭଳି ସମ୍ବେଦନଶୀଳ ଘଟଣା ସାମ୍ନାକୁ ଆସିଛି।
ଗତ କିଛିଦିନ ବ୍ୟବଧାନରେ ଜଣେ ପରେ ଜଣେ ଏକାଧିକ ବ୍ୟକ୍ତିଙ୍କ ଆକସ୍ମିକ ମୃତ୍ୟୁ ଘଟିଥିବାରୁ ଏସବୁ ମୃତ୍ୟୁ ପଛରେ ଗୁଣି ଗାରେଡ଼ି ଓ ତନ୍ତ୍ରମନ୍ତ୍ରର ପ୍ରଭାବ ବୋଲି ଗ୍ରାମବାସୀଙ୍କ ମନରେ ସନ୍ଦେହ ବସା ବାନ୍ଧିଛି। ଏନେଇ ଗ୍ରାମସଭା କରାଯାଇ କିଛି ଗ୍ରାମବାସୀ ମୋହନଙ୍କୁ ମାଡ଼ ମାରିବା ସହ ନିର୍ଯାତନା ଦେବା କାରଣରୁ ତାଙ୍କ ସ୍ବାମୀ ଜୀବନ ବିକଳରେ କେଉଁ ଆଡ଼େ ଫେରାର ହୋଇଯାଇଥିବା ନେଇ ସ୍ତ୍ରୀ ସୁଶୀଳା ବୁଧବାର ତାଙ୍କ ସମ୍ପର୍କୀୟଙ୍କ ସହ ଦିଗପହଣ୍ଡି ଥାନାରେ ପହଞ୍ଚି ଏତଲା ଦେଇଛନ୍ତି। ଏତଲାକୁ ଭିତ୍ତିକରି ଘଟଣାର ତଦନ୍ତ ଚାଲିଥିବା ଦିଗପହଣ୍ଡି ଥାନା ଆଇଆଇସି ପ୍ରଶାନ୍ତ କୁମାର ପାତ୍ର କହିଛନ୍ତି। ଗ୍ରାମରେ ଚାପା ଉତ୍ତେଜନା ଲାଗିରହିଛି।