ବମ୍ବେ: ସ୍ବାମୀଙ୍କଠାରୁ ଅଲଗା ହେଲେ ଅଭିନେତା ହ୍ରିତିକ୍ ରୋଶନଙ୍କ ଶାଳି ତଥା ପୂର୍ବପତ୍ନୀ ସୁଜୈନ ଖାନଙ୍କ ଭଉଣୀ ଫରାହ ଖାନ୍। ନିଜର ଇନ୍ଷ୍ଟାଗ୍ରାମରେ ଫରାହ ସ୍ବାମୀ ଡିଜେ ଅକିଲଙ୍କ ସହ ନିଜର ଫଟୋ ଶେୟାର କରି ଲମ୍ବା ଚଉଡ଼ା ପୋଷ୍ଟ ଲେଖିଛନ୍ତି। ସେହିଭଳି ଅକିଲ ମଧ୍ୟ ନଅ ବର୍ଷ ପୂର୍ବେ ସମ୍ପର୍କ ଛିନ୍ନ ହୋଇଥିବା କଥା ଲେଖିଛନ୍ତି।
ନଅ ବର୍ଷ ବିତିଛି। ସ୍ବାମୀ ଅକିଲଙ୍କ ସହ ସମ୍ପର୍କ କେବଳ ବନ୍ଧୁକୁ ପହଞ୍ଚିଛି। ଏବେ ନିଜକୁ ‘ହାପିଲି ସେପାରେଟେଡ୍’ କହିବା ଠିକ୍ ହେବ। ଆମେ ପରସ୍ପରର ବନ୍ଧୁ ହୋଇ ରହିବା ସହ ପିଲା ଅଜାନ ଏବଂ ଫିଜାଙ୍କ ପିତାମାତା ଭୂମିକା ସମାନ ଭାବେ ନିର୍ବାହ କରିବୁ। ହଁ। ଆମେ ଏବେ ଏକାଠି ରହିପାରିବୁ ନାହିଁ। ଏହି ନିଷ୍ପତ୍ତି ପରସ୍ପରର ବୁଝାମଣାରେ ନେଇଛୁ। ଆମକୁ ବୁଝିବା ଏବଂ ସମର୍ଥନ କରିବା ଲାଗି ଏହି କଥାକୁ ସମସ୍ତଙ୍କ ସହ ବାଣ୍ଟୁଛୁ। କାରଣ ଆମେ କେହି କାହାର ଶତ୍ରୁ ନୋହୁଁ। ପରସ୍ପରର ଆବଶ୍ୟକତା ବେଳେ ଆମେ ବନ୍ଧୁ ଭଳି ଛିଡ଼ା ହେବୁ। ଜୀବନରେ ଯାହା ମିଳିଛି ସେଥିପାଇଁ ମୁଁ ଆଭାରୀ। ଧନ୍ୟବାଦ ଦେଉଛି ବୋଲି ଫରାହ କହିଛନ୍ତି।
୧୯୯୯ରେ ଅକିଲଙ୍କୁ ବିବାହ କରିଥିଲେ ଫରାହ। ୨୦୦୨ରେ ସେମାନଙ୍କ ପୁଅ ହୋଇଥିଲା। ୨୦୦୫ରେ ଝିଅ ଜନ୍ମ ନେଇଥିଲା। ଗତ ବର୍ଷ ଫରାହ କଙ୍ଗନାଙ୍କ ସହ ଝଗଡ଼ାକୁ ନେଇ ଚର୍ଚ୍ଚାକୁ ଆସିଥିଲେ। ତାଙ୍କ ପୂର୍ବରୁ ଭଉଣୀ ସୁଜୈନ ଖାନ୍ ମଧ୍ୟ ହ୍ରିତିକଙ୍କୁ ଛାଡ଼ପତ୍ର ଦେଇଛନ୍ତି।