କୋଲକାତା,୬।୬: ଓଡ଼ିଶାର ବାଲେଶ୍ୱରରେ ଶୁକ୍ରବାର ହୋଇଥିବା ଟ୍ରେନ ଦୁର୍ଘଟଣାକୁ ନେଇ ରାଜନୀତି ଆରମ୍ଭ ହୋଇଯାଇଛି। ପଶ୍ଚିମବଙ୍ଗର ଭାରତୀୟ ଜନତା ପାର୍ଟି(ଭାଜପା) ନେତା ଶୁଭେନ୍ଦୁ ଅଧିକାରୀ ଏହି ଘଟଣାକୁ ନେଇ ଏକ ଚମକାଇବା ଭଳି ବୟାନ ଦେଇଛନ୍ତି। ସେ କହିଛନ୍ତି ବାଲେଶ୍ୱର ଟ୍ରେନ୍ ଦୁର୍ଘଟଣା ପଛରେ ତ୍ରୁଣମୂଳ କଂଗ୍ରେସ(ଟିଏମସି)ର ହାତ ରହିଛି। ଏହାକୁ ନେଇ ଟିଏମସି କହିଛି ଶୁଭେନ୍ଦୁ ତାଙ୍କ ମାନସିକ ସନ୍ତୁଳନ ହରାଇ ସାରିଛନ୍ତି।
ଶୁଭେନ୍ଦୁ ଅଧିକାରୀ କହିଛନ୍ତି, ଏହି ଲୋକମାନେ ପୋଲିସର ସହାୟତାରେ ଉଭୟ ରେଳ ଅଧିକାରୀଙ୍କ ଫୋନକୁ ଟ୍ୟାପ କରି ଟୁଇଟରରେ ରଖିଥିଲେ। ଏହି ଲୋକମାନେ ଦୁଇ ରେଳ ଅଧିକାରୀଙ୍କ ମଧ୍ୟରେ କଥାବାର୍ତ୍ତା କିପରି ଜାଣିଲେ? ଏହା ପଛରେ ଷଡଯନ୍ତ୍ର କ’ଣ? ଏହା କିପରି ଲିକ ହୋଇଛି ତାହାର ସିବିଆଇ ଅନୁସନ୍ଧାନରେ ମଧ୍ୟ ଏହା ଆସିବା ଉଚିତ। ଯଦି ଏହା ନ ଆସେ ତେବେ ମୁଁ କୋର୍ଟର ଦ୍ୱାରସ୍ଥ ହେବି। ଏହା ଉପରେ ରାଜନୀତି କରାଯିବା ଉଚିତ ନୁହେଁ। ଦେଶକୁ ବଦନାମ କରିବା ଉଚିତ ନୁହେଁ। ଦେଶର ବଦନାମ ଏହା କୌଣସି ମୁଖ୍ୟମନ୍ତ୍ରୀ କରନ୍ତି ନାହିଁ।
