ଭୁବନେଶ୍ୱର,୨୫।୧୧ (ଅଭୟ ଦାଶ): ସୁଜୁକି ମୋଟରସାଇକେଲ ଇଣ୍ଡିଆ ପ୍ରାଇଭେଟ ଲିମିଟେଡ୍ର ବହୁ ପ୍ରତୀକ୍ଷିତ କାର୍ଯ୍ୟକ୍ରମ ‘ମାଇଲେଜ ରାଲି’ ର ଶୁଭାରମ୍ଭ ସର୍ବଭାରତୀୟ ସ୍ତରରେ ଆରମ୍ଭ କରାଯାଇଛି। ଏପରି କି କମ୍ପାନୀର ପ୍ରମୁଖ ମଡେଲ ସୁଜୁକି ଆସେସ୍ ୧୨୫ର ଗୁଣବତ୍ତା ଓ ମାଇଲେଜକୁ ନେଇ ଏହି ସ୍ବତନ୍ତ୍ର କାର୍ଯ୍ୟକ୍ରମ ନିକଟରେ ଶୁଭାରମ୍ଭ ହୋଇଯାଇଛି। ସେହିଭଳି ଓଡ଼ିଶାରେ ମଧ୍ୟ ପ୍ରଥମ ଥର ପାଇଁ କମ୍ପାନୀ ପକ୍ଷରୁ ଏଭଳି ଏକ ଅଭିନବ କାର୍ଯ୍ୟକ୍ରମ ଉଭୟ ଗ୍ରାହକ ଓ କମ୍ପାନୀର ସ୍ବୀକୃତିପ୍ରାପ୍ତ ଡିଲରମାନଙ୍କ ଜରିଆରେ ଆରମ୍ଭ କରାଯାଇଛି। ଏହି ପରିପ୍ରେକ୍ଷୀରେ କମ୍ପାନୀର ସ୍ବୀକୃତିପ୍ରାପ୍ତ ଡିଲର ଜ୍ୟୋତି ସୁଜୁକି ପଟିଆ ଏବଂ ନାରାୟଣୀ ସୁଜୁକି ଲକ୍ଷ୍ମୀସାଗର (ଝାରପଡା) ଆନୁକୂଲ୍ୟରେ ରବିବାର ଭୁବନେଶ୍ୱରର ଜନତା ମଇଦାନଠାରେ ‘ମାଇଲେଜ ରାଲି’ର ଆୟୋଜନ କରାଯାଇଥିଲା। ଏହି ରାଲିରେ ୫୦ ଜଣ ସୁଜୁକି ଆସେସ୍ ୧୨୫ର ଗ୍ରାହକ ଅଂଶ ଗ୍ରହଣ କରି ସେମାନଙ୍କର ଗାଡ଼ିର ଗୁଣବତ୍ତା ଓ ମାଇଲେଜ ଟେଷ୍ଟ କରି ପୁରସ୍କୃତ ହୋଇଥିଲେ। ସେହିଭଳି ରାଲିରେ ଅଂଶ ଗ୍ରହଣ କରିଥିବା ୫୦ଗ୍ରାହକଙ୍କ ମଧ୍ୟରୁ ଶ୍ରେଷ୍ଠ ମାଇଲେଜ ପ୍ରଦାନ କରିଥିବା ଗାଡ଼ି ମାଲିକଙ୍କୁ ୫୦୦୦ ଟଙ୍କାର ପୁରସ୍କାର ଦିଆଯାଇଥିଲା ବେଳେ ପ୍ରଥମ ରନର୍ସ ଅପ ଗାଡ଼ି ମାଲିକଙ୍କୁ ୩୦୦୦ ଟଙ୍କା ଏବଂ ୨ୟ, ୩ୟ ଏବଂ ୪ର୍ଥ ସ୍ଥାନ ଅଧିକାର କରିଥିବା ଗାଡ଼ି ମାଲିକଙ୍କୁ ୧୦୦୦ ଟଙ୍କା ଲେଖାଏ ପୁରସ୍କାର ସ୍ବରୂପ ଅର୍ଥ ରାଶି ପ୍ରଦାନ କରାଯାଇଥିଲା। ସେହିପରି ଏହି ରାଲିରେ ଉଭୟ ନୂଆ ଓ ପୁରୁଣା ସୁଜୁକି ଆସେସ୍ ୧୨୫ ଗାଡ଼ି ମାଲିକମାନେ ସାମିଲ ହୋଇ ଗାଡ଼ିର ଗୁଣବତ୍ତା ସମ୍ପର୍କରେ ନିଜ ନିଜର ମତ ଉପସ୍ଥାପନ ସହ ଅନେକ ପ୍ରକାର କାର୍ଯ୍ୟକ୍ରମରେ ଭାଗନେଇ ପୁରସ୍କାର ସହିତ ମନୋରଞ୍ଜନ କରିଥିଲେ।
