ମାଥିଲି,୧୬ା୧(ସୁବାସ ଚନ୍ଦ୍ର ଖୁଡୁପିଆ) ଫେଲ୍ ମାରିଛି ଶୌଚ ଭାରତ ଅଭିଯାନ। କାମରେ ଆସୁନି ପାଇଖାନା। ଶୌଚ ଭାରତ ନାଁରେ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି, କିନ୍ତୁ ଏହା ଅନେକ ଜାଗାରେ ଫେଲ୍ ମାରିଥିବା ଦୃଷ୍ଟିକୁ ଆସିଛି । ବାହାରେ ଝାଡ଼ା ଫେରିଲେ ବହୁ ରୋଗ ସଂକ୍ରମଣ ହେଉଥିବା ସହ ପରିବେଶ ଦୂଷିତ ହେଉଛି । ଏଣୁ ଶୌଚ ଭାରତ ମିଶନ (ଗ୍ରାମୀଣ)ଯୋଜନା ମାଧ୍ୟମରେ ଘରେ ଘରେ ପାଇଖାନା ନିର୍ମାଣ କରାଯାଇଛି। ଏହାର ନିର୍ମାଣ ଓ ତଦାରଖ ପାଇଁ ଏକ ସ୍ବତନ୍ତ୍ର ବିଭାଗ ମଧ୍ୟ ରହିଛି । ହେଲେ ଏହି ପାଇଖାନା ସବୁ ନିର୍ମାଣ ହୋଇଛି ସତ, କିନ୍ତୁ ଏହା ହେବା ଦିନଠାରୁ ଦିନେବି ବ୍ୟବହାର ହୋଇନାହିଁ। କେଉଁଠି କାଠ ରଖାଯାଉଛି ତ ଆଉ କେଉଁଠି ଇଟା ଓ ଘରର ନଷ୍ଟ ହୋଇଥିବା ଆସବାସପତ୍ର ରଖାଯାଉଛି। ଏଭଳି ଏକ ଗାଁ ହେଉଛି ମାଲକାନଗିରି ଜିଲା ମାଥିଲି ବ୍ଲକ ଧୁଙ୍ଗିଆପୁଟ ପଞ୍ଚାୟତ। ଏହି ପଞ୍ଚାୟତରେ ୩ ହଜାରରୁ ଊର୍ଦ୍ଧ୍ୱ ଘର ରହିଛି । ପଞ୍ଚାୟତର ପ୍ରାୟ ସମସ୍ତଙ୍କ ବାରିରେ ରହିଛି ପାଇଖାନା ହେଲେ ଜଣେ ବି ଏହାକୁ ବ୍ୟବହାର କରୁନାହାନ୍ତି। କାରଣ ସବୁ ପାଇଖାନାଗୁଡିକ ଅଳିଆ ଆବର୍ଜନାରେ ଭର୍ତ୍ତି ହୋଇରହିଛି। ତାହା ସମ୍ପୂର୍ଣ୍ଣ ହୋଇପାରି ନାହିଁ। କୌଣସି ପାଇଖାନା ଉପରେ ଟିଣ ନାହିଁ ହେଲେ ସବୁ ବିଲ୍ ହୋଇଯାଇଛି। ଏହି ପାଇଖାନା ବ୍ୟବହାର ନ କରି ଲୋକେ ବାହାରକୁ ଶୌଚ ପାଇଁ ଯାଉଥିବା କାରଣ ପଚାରିବାରୁ ଯେଉଁଠି ଲୋକେ ପିଇବା ପାଇଁ ଭଲରେ ପାଣି ପାଇପାରୁ ନାହାନ୍ତି ସେଠି ପାଇଖାନା ବ୍ୟବହାର ପାଇଁ ପାଣି ଆସିବ କୋଉଠୁ ବୋଲି ଉତ୍ତର ମିଳୁଛି। ତେଣୁ ବାଧ୍ୟହୋଇ ଲୋକେ ଗାଁ ନିକଟରେ ଥିବା ପଡ଼ିଆ ନଦୀ ଓ ନାଳକୁ ଯାଇ ଶୌଚ ହେଉଛନ୍ତି। ଲୋକ କିପରି ଏହାକୁ ବ୍ୟବହାର କରିବେ ସଚେତନ କରାଯିବାକୁ ଦାବି ହେଇଛି ।
