ଏସପି ପାଇଁ ଘାତକ ହୋଇ ପାରନ୍ତି ସ୍ବାମୀ ପ୍ରସାଦ ମୌର୍ଯ୍ୟ, ବ୍ରାହ୍ମଣ-ହିନ୍ଦୁ ଧର୍ମ ବିରୋଧରେ ଦେଇଥିଲେ ମନ୍ତବ୍ୟ…

ଲକ୍ଷ୍ନୌ,୨୧।୯ : ବ୍ରାହ୍ମଣ ମହାସଭା ସ୍ବାମୀ ପ୍ରସାଦ ମୌର୍ଯ୍ୟଙ୍କ ବ୍ରାହ୍ମଣ ଏବଂ ହିନ୍ଦୁ ଧର୍ମ ବିରୋଧୀ ମନ୍ତବ୍ୟ ନେଇ ଅସନ୍ତୁଷ୍ଟ ଅଛନ୍ତି। ଏହାକୁ ବିରୋଧ କରି ବ୍ରାହ୍ମଣ ମହାସଭା ମୌର୍ଯ୍ୟଙ୍କ ପୁତ୍ତଳିକା ପୋଡିଛନ୍ତି। ପ୍ରଦର୍ଶନକାରୀ ମୋର୍ଯ୍ୟଙ୍କ ବିରୋଧରେ ସ୍ଲୋଗାନ ଦେଇଛନ୍ତି। ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଏବଂ ତାଙ୍କୁ ଜେଲ ପଠାଇବାକୁ ଉତ୍ତରପ୍ରଦେଶ ସରକାରଙ୍କ ନିକଟରେ ଦାବି କରାଯାଇଛି।

ସେ ସେପ୍ଟେମ୍ବର ୧୯ ରେ ହରଦୋଇରେ ପହଞ୍ଚି ଏକ କାର୍ଯ୍ୟକ୍ରମ ସମୟରେ ମଞ୍ଚରୁ ହିନ୍ଦୁ ଧର୍ମ ଏବଂ ବ୍ରାହ୍ମଣବାଦ ବିରୋଧରେ ଭାଷଣ ଦେଇଥିଲେ। ଏହା ଦ୍ୱାରା ମୌର୍ଯ୍ୟ ସମାଜବାଦୀ ପାର୍ଟି(ଏସପି) ପାଇଁ ଘାତକ ହୋଇ ପାରନ୍ତି ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି।

ସମାଜବାଦୀ ପାର୍ଟିର ରାଷ୍ଟ୍ରୀୟ ମହାସଚିବ ମୌର୍ଯ୍ୟ, ହରଦୋଇରେ ହିନ୍ଦୁ ଧର୍ମକୁ ତୁଚ୍ଛ ବୋଲି ବର୍ଣ୍ଣନା କରିବାବେଳେ ବ୍ରାହ୍ମଣମାନଙ୍କ ବିରୁଦ୍ଧରେ ଆପତ୍ତି ଜନକ ଶବ୍ଦ ବ୍ୟବହାର କରିଥିଲେ। ବ୍ରାହ୍ମଣ ମହାସଭାର ଲୋକମାନେ ମୌର୍ଯ୍ୟଙ୍କ ଫଟୋକୁ ଛକରେ ରଖି ଜୋତା ମାଳ ପିନ୍ଧାଇଥିଲେ। ବ୍ରାହ୍ମଣ ମହାସଭାର ଏହି ପ୍ରଦର୍ଶନ ସମୟରେ ବହୁ ସଂଖ୍ୟକ ପୋଲିସ ବାହିନୀ ମଧ୍ୟ ଉପସ୍ଥିତ ଥିଲେ।

ବ୍ରାହ୍ମଣ ମହାସଭାର ଜିଲା ସଭାପତି ନୀରଜ ଆୱସ୍ତି କହିଛନ୍ତି ହିନ୍ଦୁ ଧର୍ମ ଏବଂ ବ୍ରାହ୍ମଣମାନଙ୍କ ବିଷୟରେ ମୌର୍ଯ୍ୟଙ୍କ ବିବୃତ୍ତି ଯୋଗୁଁ ହିନ୍ଦୁ ଧର୍ମ ଏବଂ ବ୍ରାହ୍ମଣମାନଙ୍କ ମଧ୍ୟରେ ପ୍ରବଳ କ୍ରୋଧ ରହିଛି। ସେ ସନାତନ ଧର୍ମ ଏବଂ ବ୍ରାହ୍ମଣଙ୍କ ବିରୋଧରେ ନିଜର ବିବୃତ୍ତି ବନ୍ଦ କରିବା ଉଚିତ, ନଚେତ ତାଙ୍କ ଭାବମୂର୍ତ୍ତି ପ୍ରଭାବିତ ହେବ।

ଏହା ପୂର୍ବରୁ ମଧ୍ୟ ସେ ହିନ୍ଦୁ ଧର୍ମ ଏବଂ ବ୍ରାହ୍ମଣମାନଙ୍କ ବିଷୟରେ ବିବାଦୀୟ ବିବୃତ୍ତି ମଧ୍ୟ ଦେଇଥିଲେ। ସେ ରାମଚରିତମାନସ ଉପରେ ମଧ୍ୟ ପ୍ରଶ୍ନ ଉଠାଇଥିଲେ, ଯାହା ପରେ ଏକ ବଡ ଆଲୋଡ଼ନ ସୃଷ୍ଟି ହୋଇଥିଲା। ରାଜନୈତିକ ବିଶେଷଜ୍ଞମାନେ କହିଛନ୍ତି ୨୦୨୪ ଲୋକସଭା ନିର୍ବାଚନ ଆଗକୁ ଅଛି। ଏଭଳି ପରିସ୍ଥିତିରେ ମୌର୍ଯ୍ୟଙ୍କ ହିନ୍ଦୁ ଧର୍ମ ଏବଂ ବ୍ରାହ୍ମଣମାନଙ୍କ ସମ୍ବନ୍ଧରେ ଦେଇଥିବା ବିବୃତ୍ତି ସମାଜବାଦୀ ଦଳ ପାଇଁ ସାଂଘାତିକ ପ୍ରମାଣିତ ହୋଇପାରେ।