ତ୍ୟାଗର ଅନ୍ୟନାମ ପ୍ରେମ। କିଛି ଶବ୍ଦରେ ତାକୁ ରୂପ ଦେବା ଅସମ୍ଭବ। ହେଲେ ପଶ୍ଚିମବଙ୍ଗରେ ରହୁଥିବା ସ୍ବପନ ସେଟ ପ୍ରେମର ନୂତନ ପରିଭାଷା ସୃଷ୍ଟି କରିଛନ୍ତି। କୋଲକାତାର ବଳରାମ ଡେ ଷ୍ଟ୍ରିଟ୍ରେ ରୁହନ୍ତି ସ୍ବପନ। ତାଙ୍କ ସ୍ତ୍ରୀ ୨୦୦୨ରୁ କ୍ୟାନ୍ସରରେ ପୀଡ଼ିତ। ଏହି ରୋଗ ବିଷୟରେ ଜଣାପଡ଼ିବା ପରେ ସ୍ବପନଙ୍କ ଜୀବନ ବଦଳିଯାଇଥିଲା। ସେ ତାଙ୍କ ସ୍ତ୍ରୀଙ୍କୁ ବଞ୍ଚାଇବା ପାଇଁ ଏଭଳି କିଛି ନିଷ୍ପତ୍ତି ନେଇଥିଲେ ଯାହା ଶୁଣିଲେ ଆପଣଙ୍କ ଆଖି ଓଦା ହୋଇପାରେ। ଏପରିକି ଭଲପାଇବା ହେବ ତ ଏମିତି ବୋଲି ଆପଣ କହିପାରିବେ।
ସ୍ବପନ୍ ଭଲ ଭାଓଲିନ୍ ବଜାଇଥାନ୍ତି। ଏହାଛଡ଼ା ତାଙ୍କର ଚିତ୍ରକଳା ଏବଂ ମୂର୍ତ୍ତୀ ନିର୍ମାଣ ଆଦିରେ ଅଭିଜ୍ଞତା ରହିଛି। ଯେତେବେଳେ ସ୍ତ୍ରୀଙ୍କୁ କ୍ୟାନ୍ସର ହେବା କଥା ସେ ଜାଣିବାକୁ ପାଇଥିଲେ, ସେ ଅଧିକ ଟଙ୍କା ରୋଜଗାର କରିବାକୁ ଚାହିଁଥିଲେ। ଶେଷରେ ସେ ନିଜର କଳାକୁ ବ୍ୟବହାର କରି ସ୍ତ୍ରୀଙ୍କ ଜୀବନ ବଞ୍ଚାଇବାକୁ ଚାହିଁଥିଲେ। ଧଳା କୁର୍ତ୍ତା ଏବଂ ଧୋତୀ ପିନ୍ଧିବାକୁ ପସନ୍ଦ କରୁଥିବା ସ୍ବପନ ଭାଓଲିନ୍ରେ ହିଁ ତାଙ୍କର ଖୁସି ରହିଛି ବୋଲି ଜାଣିଥିଲେ। ଶେଷରେ ସେ କଲିକତାର ରାସ୍ତାରେ ଭାଓଲିନ ବଜାଇବା ଆରମ୍ଭ କରିଥିଲେ। ଏବେ ସେ ଦେଶର ଭିନ୍ନ ଭିନ୍ନ ଅଞ୍ଚଳକୁ ଯାଇ ଭାଓଲିନ୍ ବଜାଇ ସ୍ତ୍ରୀଙ୍କ ଚିକିତ୍ସା ପାଇଁ ଟଙ୍କା ଯୋଗାଡ଼ କରିଆସୁଛନ୍ତି। ଦୀର୍ଘ ୧୭ ବର୍ଷ ଧରି ସେ ଏଭଳି କରି ସ୍ତ୍ରୀଙ୍କ ଆରୋଗ୍ୟ ପାଇଁ ସମସ୍ତ ଖର୍ଚ୍ଚ ବହନ କରିଆସୁଛନ୍ତି।