ମୁମ୍ବାଇ: ସ୍ବାଧୀନତା ସଂଗ୍ରାମୀ ବିନାୟକ ଦାମୋଦର ସାବରକରଙ୍କ ୧୩୯ତମ ଜନ୍ମ ବାର୍ଷିକୀ ଅବସରରେ ଫିଲ୍ମର ନିର୍ମାତା ରଣଦୀପ ହୁଡ୍ଡାଙ୍କ ପ୍ରଥମ ଲୁକ୍ ଜାରି ହୋଇଛି। ଏଥିସହ ଏକ ପୋଷ୍ଟର ମଧ୍ୟ ଜାରି କରାଯାଇଛି। ଯେଉଁଥିରେ ‘ହିନ୍ଦୁ ଧର୍ମ ଧର୍ମ ନୁହେଁ, ଏହା ଏକ ଇତିହାସ’ ବୋଲି ଉଲ୍ଲେଖ ରହିଛି। ନିର୍ଦ୍ଦେଶକ ମହେଶ ମଞ୍ଜରେକରଙ୍କ ଆଗାମୀ ବାୟୋପିକରେ ଅଭିନେତା ରଣଦୀପ ହୁଡ୍ଡା ରାଜନେତା, କାର୍ଯ୍ୟକର୍ତ୍ତା ତଥା ଲେଖକ ବିନାୟକ ଦାମୋଦର ସାବରକା ଭୂମିକାରେ ନଜର ଆସିବେ। ସୂଚନା ଅନୁଯାୟୀ ଚଳିତ ବର୍ଷ ଅଗଷ୍ଟ ମାସରେ ଏହି ଫିଲ୍ମର ସୁଟିଂ ଆରମ୍ଭ ହୋଇପାରେ। ଅନ୍ୟପଟେ ପୋଷ୍ଟର ଜାରି କରି ନିର୍ଦ୍ଦେଶକ ମହେଶ ମଞ୍ଜରେକର କହିଛନ୍ତି, ରଣଦୀପ ହୁଡାଙ୍କୁ ସ୍ବାଧୀନତା ସଂଗ୍ରାମୀ ବୀର ସାବରକରଙ୍କ ରୂପରେ ପ୍ରସ୍ତୁତ କରାଯାଉଛି। ଏଥିସହ ବୀର ସାବରକରଙ୍କ ଜନ୍ମ ବାର୍ଷିକୀ ଅବସରରେ ସେ ସମସ୍ତଙ୍କୁ ହାର୍ଦ୍ଧିକ ଶୁଭେଚ୍ଛା ଜଣାଇଛନ୍ତି। ସେହିପରି ଅଭିନେତା ରଣଦୀପ ହୁଡ୍ଡା ମଧ୍ୟ ଏହି ଅବସରରେ ସମସ୍ତଙ୍କୁ ଶୁଭେଚ୍ଛା ଜଣାଇଛନ୍ତି। ସୂଚନାଯୋଗ୍ୟ, ବିନାୟକ ଦାମୋଦର ସାବରକର ୧୮୮୩ ମେ’ ୨୮ରେ ମହାରାଷ୍ଟ୍ରର ନାଶିକ ଜିଲାର ଭାଗୁର ଗାଁରେ ଜନ୍ମଗ୍ରହଣ କରିଥିଲେ। ସେ ଜଣେ ହିନ୍ଦୁ ଜାତୀୟତାବାଦୀ ସଂଗଠନ ତଥା ଏକ ରାଜନୈତିକ ଦଳର ହିନ୍ଦୁ ମହାସଭାର ଅନ୍ୟତମ ପ୍ରମୁଖ ବ୍ୟକ୍ତିତ୍ୱ ଥିଲେ। ସେ ଜଣେ ରାଜନେତା, କାର୍ଯ୍ୟକର୍ତ୍ତା ଏବଂ ଲେଖକ ଥିଲେ। ୧୯୬୬ ଫେବୃଆରୀ ୨୬ରେ ବମ୍ବେରେ ତାଙ୍କର ନିଧନ ହୋଇଥିଲା।