ମୁମ୍ବାଇ: ବୀର ସାବରକରଙ୍କ ୧୩୯ ତମ ଜନ୍ମବାର୍ଷିକୀକୁ ଆହୁରି ଖାସ କରିଦେଇଛନ୍ତି ଅଭିନେତା ରଣଦୀପ ହୁଡ୍ଡା। ଏହି ସ୍ବତନ୍ତ୍ର ଦିନରେ ସେ ତାଙ୍କ ଜୀବନୀ ଉପରେ ନିର୍ମାଣ ହେଉଥିବା ଚଳଚ୍ଚିତ୍ରର ଫାଷ୍ଟ ଲୁକ୍ ଶେୟାର କରିଛନ୍ତି। ମୁଣ୍ଡରେ କଳା ଟୋପି, ଗୋଲ ଚଷମା ଆଉ ମୁହଁରେ ନିଶ। ଏପରି ଲୁକ୍ରେ ରଣଦୀପଙ୍କୁ ଚିହ୍ନିବା କଷ୍ଟକର ହେଉଛି। ତାଙ୍କୁ ଯିଏ ଦେଖୁଛି ସିଏ ଅବିକଳ ସାବରକରଙ୍କ ଭଳି ଦେଖାଯାଉଥିବା କହୁଛି।
ଫିଲ୍ମର ନାଁ ‘ସ୍ବତନ୍ତ୍ର ବୀର ସାବରକର’ ରଖାଯାଇଛି। ରଣଦୀପ ଶେୟାର କରିଥିବା ପୋଷ୍ଟରେ ‘ହିନ୍ଦୁତ୍ୱ ଧର୍ମ ନୁହେଁ ଇତିହାସ’ ବୋଲି ଲେଖା ରହିଛି। ଫିଲ୍ମ ସମୀକ୍ଷକ ତରନ ଆଦର୍ଶ ମଧ୍ୟ ଟୁଇଟ୍ କରି ଫିଲ୍ମର ଫାଷ୍ଟ ଲୁକ୍ ଶେୟାର କରିଛନ୍ତି।
A salute to one of the tallest unsung heroes of India’s struggle for freedom & self-actualisation. hope I can live up to the challenge of filling such big shoes of a true revolutionary & tell his real story which had been brushed under the carpet for so long#VeerSavarkarJayanti pic.twitter.com/R1UbFZebio
— Randeep Hooda (@RandeepHooda) May 28, 2022
ଚଳଚ୍ଚିତ୍ରର ଶୁଟିଂ ଅଗଷ୍ଟ ୨୦୨୨ରୁ ଆରମ୍ଭ ହେବ। ଏଥିରେ ମୁଖ୍ୟ ଭୂମିକାରେ ରଣଦୀପ ହୁଡ୍ଡା ଥିବା ବେଳେ ଏହାକୁ ସନ୍ଦୀପ ସିଂହ ଏବଂ ଆନନ୍ଦ ପଣ୍ଡିତ ପ୍ରଯୋଜନା କରିଛନ୍ତି। ଫିଲ୍ମକୁ ମହେଶ ମାଞ୍ଜରେକର ନିର୍ଦ୍ଦେଶନା ଦେଇଛନ୍ତି। ଲଣ୍ଡନ, ମହାରାଷ୍ଟ୍ର ଏବଂ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜର ବିଭିନ୍ନ ସ୍ଥାନରେ ଏହାର ଶୁଟିଂ କରାଯିବ ବୋଲି ଜଣାପଡ଼ିଛି।
କହିରଖୁଛୁ, ୧୮୮୩ ମେ’ ୨୮ରେ ମହାରାଷ୍ଟ୍ରର ନାସିକ ଜିଲାର ଭାଗୁର ଗ୍ରାମରେ ବିନାୟକ ଦାମୋଦର ସାବରକରଙ୍କ ଜନ୍ମ। ୧୯୬୬ ଫେବୃୟାରୀ ୨୬ରେ ତାଙ୍କ ପରଲୋକ ଘଟିଥିଲା।
