ନୂଆଦିଲ୍ଲୀ,୧୬।୫: ଦୀର୍ଘ ସମୟର ଅପେକ୍ଷା କରିବା ପରେ ରାଜ୍ୟ ସଭା ଏମପି ଶ୍ୱାତି ମାଲିୱାଲ ଶେଷରେ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ଘର ନିକଟରେ ତାଙ୍କ ଉପରେ ହୋଇଥିବା ଆକ୍ରମଣ ମାମଲାରେ ଗୁରୁବାର ତାଙ୍କ ଲିଖିତ ଅଭିଯୋଗ ଦେଇଛନ୍ତି। ମେ ୧୩ ରେ ମୁଖ୍ୟମନ୍ତ୍ରୀଙ୍କ ଘର ଲବିରେ ତାଙ୍କ ପିଏ ବୈଭବଙ୍କ ଦ୍ୱାରା ହୋଇଥିବା ଆକ୍ରମଣ ସମ୍ପର୍କରେ ସେ ସମ୍ପୂର୍ଣ୍ଣ ସୂଚନା ଦେଇଛନ୍ତି।
ଦିଲ୍ଲୀ ପୋଲିସର ସ୍ପେଶାଲ ସେଲର ଟିମ ଗୁରୁବାର ଦିନ ପ୍ରାୟ ୧ଟା ୫୦ ସମୟରେ ଶ୍ୱାତି ମାଲିୱାଲଙ୍କ ଘରେ ପହଞ୍ଚିଥିଲେ। ସ୍ପେଶାଲ ସେଲ ଟିମ ତାଙ୍କ ସୁରକ୍ଷା ବ୍ୟବସ୍ଥା ସମେତ ଅନେକ ପ୍ରସଙ୍ଗରେ ତାଙ୍କ ସହ କଥା ହୋଇଥିଲେ। ମାଲିୱାଲଙ୍କ ସହ ଜଡିତ ମାମଲାରେ ଏପର୍ଯ୍ୟନ୍ତ କୌଣସି ଏଫଆଇଆର ପଞ୍ଜୀକୃତ ହୋଇନାହିଁ। ଗୁରୁବାର ଦିଲ୍ଲୀ ପୋଲିସର ସ୍ପେଶାଲ ସେଲର ଜଣେ ବରିଷ୍ଠ ଅଧିକାରୀ ତାଙ୍କ ସୁରକ୍ଷା ବ୍ୟବସ୍ଥା ସମ୍ପର୍କରେ ଆଲୋଚନା କରିଥିଲେ। ସ୍ପେଶାଲ ସେଲର ବରିଷ୍ଠ ଅଧିକାରୀମାନେ ତାଙ୍କ ଘରେ ତାଙ୍କ ସହିତ ପ୍ରାୟ ଚାରି ଘଣ୍ଟା କଥା ହୋଇଥିଲେ। ଦକ୍ଷିଣ ଦିଲ୍ଲୀର ମାଲିୱାଲଙ୍କ ବାସଭବନ ବାହାରେ ସୁରକ୍ଷା ବ୍ୟବସ୍ଥା ବୃଦ୍ଧି କରାଯାଇଛି। ବର୍ତ୍ତମାନ ତାଙ୍କ ବାସଭବନ ବାହାରେ ଚାରିଜଣ ସାମରିକ ବାହିନୀ କର୍ମଚାରୀ ନିୟୋଜିତ ହୋଇଛନ୍ତି।
