ଜି ଉଦୟଗିରି,୨୭।୫(ଶିଶିର ପଟ୍ଟନାୟକ): ଜି ଉଦୟଗିରି ହବାକ ହାଇସ୍କୁଲର ଛାତ୍ର ସ୍ବୟାସ ସାମଲ ଚଳିତ ମାଟ୍ରିକ ପରୀକ୍ଷାରେ ସମୁଦାୟ ୬୦୦ ମାର୍କରୁ ୫୫୮ ନମ୍ବର (ଶତକଡା ୯୩% ମାର୍କ) ରଖି ଜିଲାରେ ଟପ୍ପର ହୋଇଛନ୍ତି। ସ୍ବୟାସ ଜି ଉଦୟଗିରି ନିକଟସ୍ଥ ସୁଭଦ୍ରା ମହତାବ ବାଳିକା ଉଚ୍ଚ ବିଦ୍ୟାଳୟର ବିଜ୍ଞାନ ଶିକ୍ଷକ ଶିକ୍ଷକ ଜିତେନ୍ଦ୍ର କୁମାର ସାମଲ ଓ ହବାକ ହାଇସ୍କୁଲର ବିଜ୍ଞାନ ଶିକ୍ଷୟତ୍ରୀ ମମତା ରାଣୀ ରାଉତଙ୍କ ଜ୍ୟେଷ୍ଠ ପୁତ୍ର। ସ୍ବୟାସ ଭବିଷ୍ୟତରେ ଜଣେ ବୈଜ୍ଞାନିକ ହୋଇ ଗବେଷଣା କରିବେ ବୋଲି କହିଛନ୍ତି। ସେ ତାଙ୍କର ଏହି ଶ୍ରେୟ ତାଙ୍କ ବାପା, ମା’, ଓ ଜେଜେ ମା’ଙ୍କ ସହ ହାଇସ୍କୁଲର ପ୍ରଧାନ ଶିକ୍ଷକ ଓ ଶିକ୍ଷକଶିକ୍ଷୟିତ୍ରୀମାନଙ୍କୁ ଦେଇଛନ୍ତି।
ସେହିପରି ଜିଲାର ଚତୁର୍ଥ ସ୍ଥାନରେ ଥିବା ହବାକ ହାଇସ୍କୁଲ ଛାତ୍ର ଆୟୁଷ ରଥ ୫୪୯ ମାର୍କ (୯୧.୫୦%) ସହ ଏ୧ ପାଇଛନ୍ତି। ଆୟୁଷ ସ୍ବର୍ଗତ କୈଳାସ ଚନ୍ଦ୍ର ରଥ ଓ ବର୍ତମାନ ଜି ଉଦୟଗିରି ମହିଳା ମହାବିଦ୍ୟାଳୟରେ ଲାଇବ୍ରେରୀ ଆସିଷ୍ଟାଣ୍ଟ ରଞ୍ଜିତା ପତିଙ୍କ କନିଷ୍ଠ ସନ୍ତାନ। ଆୟୁଷ ଭବିଷ୍ୟତରେ ଏନଡିଏ ରେ ଯୋଗଦେଇ ଜଣେ ଦକ୍ଷ ସାମରିକ ଅଧିକାରୀ ହେବେ ବୋଲି କହିଛନ୍ତି। ହବାକ ହାଇସ୍କୁଲର ଅନ୍ୟ ଜଣେ ଛାତ୍ର ଓମ ପ୍ରକାଶ ପଣ୍ଡା ୫୪୦ ମାର୍କ (୯୦%) ରଖି ଏ୧ ପାଇଛନ୍ତି। ଓମ ପ୍ରକାଶ ଜି ଉଦୟଗିରି ସହରର ବାଳକୃଷ୍ଣ ପଣ୍ଡା ଓ ଜୋସ୍ନାମୟୀ ପଣ୍ଡାଙ୍କ ପୁତ୍ର ଅଟନ୍ତି। ଜି ଉଦୟଗିରି ହବାକ ହାଇସ୍କୁଲରେ ସମୁଦାୟ ୧୧୪ ଜଣ ପରୀକ୍ଷା ଦେଇଥିଲେ ସେଥିମଧ୍ୟରୁ ୧୧୧ ଜଣ (୯୭.୭୦%) ଭାଗ କୃତକାର୍ଯ୍ୟ ହୋଇଛନ୍ତି ବୋଲି ପ୍ରଧାନ ଶିକ୍ଷକ ବିଜୟ କୁମାର ମିଶ୍ର କହିଛନ୍ତି।
