ଗରମରେ ଝାଳ ବୋହିବା ସ୍ବାଭାବିକ୍। ଏଇ ଝାଳ ପାଇଁ ଶରୀର ଦୁର୍ଗନ୍ଧ ବି ହୁଏ। ତେଣୁ ଏଇ ଦୁର୍ଗନ୍ଧକୁ ଦୁରେଇବା ଲାଗି ଅନେକେ ଡ଼ିଓଡ୍ରାଣ୍ଟ ଓ ପରଫ୍ୟୁମ୍ ବ୍ୟବହାର କରନ୍ତି। ହେଲେ ଜାଣି ଆଶ୍ଚର୍ଯ୍ୟ ହେବେ ବ୍ରାଜିଲର ଜଣେ ମଡେଲ ସ୍ବେଟ୍ ପରଫ୍ୟୁମ୍ ବା ଝାଳ ପରଫ୍ୟୁମ ବ୍ରାଣ୍ଡ ଆରମ୍ଭ କରିଛନ୍ତି। ଏହି ପରଫ୍ୟୁମ୍କୁ ସେ ନିଜ ଝାଳ ମିଶାଇ ପ୍ରସ୍ତୁତ କରିଛନ୍ତି। ସାଓ ପାଉଲୋରେ ରହୁଥିବା ଏହି ମଡେଲଙ୍କ ନାମ ହେଉଛି ଓ୍ବାନେସା ମୋରା। ତେବେ ନିଜ ଝାଳକୁ ନେଇ ପରଫ୍ୟୁମ୍ କରିବା ପଛର କାରଣ ସମ୍ପର୍କରେ ଓ୍ବନେସା କୁହନ୍ତି, ମୋ ବୟଫ୍ରେଣ୍ଡ ଓ ଏକ୍ସ ବୟଫ୍ରେଣ୍ଡ ମତେ ସବୁବେଳେ କୁହନ୍ତି ମୋ ଶରୀରର ପ୍ରାକୃତିକ ମହକ ବେଶ୍ ଆକର୍ଷକ। ଏହା ଅନ୍ୟକୁ ଆକର୍ଷିତ କରିବା ପାଇଁ ଯଥେଷ୍ଟ। ଏଇ କଥା ମୋ ମନକୁ ବେଶ୍ ଛୁଇଁଥିଲା। ଆଉ ଏହାକୁ ଗମ୍ଭୀରତାର ସହ ନେଇ ମୁଁ ନିଜ ଝାଳକୁ ବ୍ୟବହାର କରି ଏହି ପରଫ୍ୟୁମ ପ୍ରସ୍ତୁତ କଲି। ଏହାର ନାଁ ରଖିଛି ଫ୍ରେଶ୍ ଗଡେସ୍। ଏହାର ପ୍ରତି ବୋତଲରେ ୮ ମିଲିର ଝାଳ ମିଶାଯାଇଛି। ଅନେକ ଅନ୍ଲାଇନ୍ ଗ୍ରାହକ ତାଙ୍କୁ କହିଛନ୍ତି ଯେ, ଏହି ପରଫ୍ୟୁମ୍ ବ୍ୟବହାର କରି ସେମାନେ ନିଜ ପାର୍ଟନର୍କୁ ଆକର୍ଷିତ କରିପାରିଛନ୍ତି। ସେଥିପାଇଁ ଏହି ପରଫ୍ୟୁମ୍ର ଏବେ ବହୁତ ଚାହିଦା। ହେଲେ ଉକ୍ତ ପରଫ୍ୟୁମ୍କୁ କିଣିବା ପାଇଁ ଆପଣଙ୍କ ପକେଟ୍ ଖାଲି କରିବାକୁ ପଡିବ। କାରଣ ଏହାର ମୂଲ୍ୟ ହେଉଛି ୫୦ ମି.ଲି.କୁ ୧୧,୦୦୦ ଟଙ୍କାରୁ ଉର୍ଦ୍ଧ୍ୱ।