ଆଜିକାଲି ଯୁଗ ସ୍ମାର୍ଟଓ୍ବାଚ୍ର। ପ୍ରାୟ ସମସ୍ତଙ୍କ ହାତରେ ଏବେ ଏହି ଘଣ୍ଟା ଦେଖିବାକୁ ମିଳୁଛି। ତେବେ ଆଗକୁ ଏଭଳି ସ୍ମାର୍ଟଓ୍ବାଚ୍ ଆସିବାକୁ ଯାଉଛି ଯାହାକି ପିନ୍ଧୁଥିବା ବ୍ୟକ୍ତିଙ୍କ ଝାଳ ଦ୍ୱାରା ଚାର୍ଜ ହେବ। ସ୍କଟଲାଣ୍ଡର ୟୁନିଭର୍ସିଟି ଅଫ୍ ଗ୍ଲାସଗୋର ବୈଜ୍ଞାନିକମାନେ ଏହାକୁ ନେଇ ଗବେଷଣା ଜାରି ରଖିଛନ୍ତି। ଆଉ ଏମିତି ଏକ ଟେକ୍ନଲୋଜି ବିକାଶ କରିଛନ୍ତି ଯାହାଦ୍ୱାରା ସ୍ମାର୍ଟଓ୍ବାଚ୍ଟି ଝାଳର ଆଇଓନ୍ ଦ୍ୱାରା ଚାର୍ଜ ହୋଇଯିବ। ସାଧାରଣତଃ ସ୍ମାର୍ଟଓ୍ବାର୍ଚ ବ୍ୟାୟାମ କଲାବେଳେ ପିନ୍ଧାଯାଏ। କାରଣ ସେଥିରେ ଥିବା ସ୍ବାସ୍ଥ୍ୟ ସମ୍ବନ୍ଧୀୟ ଫିଚର ଯେମିତିକି କେତେ କ୍ୟାଲୋରୀ ବର୍ନ ହେଲା, ହୃଦସ୍ପନ୍ଦନ କେତେ ଅଛି, ଅମ୍ଳଜାନ ସ୍ତର କେତେ ଅଛି ଆଦି ବେଶ୍ ଉପାଦେୟ। ଆଉ ବ୍ୟାୟାମ କଲାବେଳେ ତ ଝାଳ ଯେମିତି ହେଲେ ବୋହିଥାଏ। ତେଣୁ ଏହି ଓ୍ବାଚ ବେଶ ଆରାମରେ ଝାଳ ଦ୍ୱାରା ଚାର୍ଜ ହୋଇଯିବ। ହେଲେ ଉକ୍ତ ଟେକ୍ନଲୋଜି ଏବେ ଗବେଷଣା ସ୍ତରରେ ଅଛି। ଖୁବ୍ ଶୀଘ୍ର ଏହା ବାସ୍ତବ ରୂପ ନେବ। ଆଉ ସମସ୍ତଙ୍କ ହାତରେ ଦିନେ ସ୍ମାର୍ଟଓ୍ବାଚ୍ ବଦଳରେ ସ୍ବେଟ୍ ଓ୍ବାଚ ଥିବ ବୋଲି ଆଶା କରାଯାଉଛି।
