ବୁଗୁଡ଼ା,୨୮ା୭(ଡି.ଏନ.ଏ.)-ଓଡ଼ିଶାରେ ମିଠାମକା ଚାଷରେ ଅଗ୍ରଣୀ ଭୂମିକା ଗ୍ରହଣ କରିଥିବା ଗଞ୍ଜାମ ଜିଲା ବୁଗୁଡ଼ା ବ୍ଲକ ଅନ୍ତର୍ଗତ ତାକରଡ଼ା ଗ୍ରାମର ଚାଷୀ ଏବେ ହତାଶ ହୋଇ ପଡ଼ିଛନ୍ତି। ଉତ୍ପାଦିତ ମକା ବିକ୍ରି ପାଇଁ ଯାଇପାରୁ ନ ଥିବାରୁ ଚାଷୀମାନେ ମୁଣ୍ଡରେ ହାତଦେଇ ବସି ରହିଛନ୍ତି। ଅମଳ ହୋଇଥିବା ମିଠାମକା ଗଦା ଗଦା ହୋଇ ରାସ୍ତାକଡ଼ରେ ପଡ଼ିରହିଛି। କୌଣସି ଗ୍ରାହକଙ୍କ ଦେଖାନାହିଁ।
ତାକରଡ଼ା ଗ୍ରାମର ପ୍ରାୟ ୧୦୦ରୁ ଊର୍ଦ୍ଧ୍ୱ ଚାଷୀ ପ୍ରତିବର୍ଷ ମିଠାମକା ଚାଷ କରି ସେମାନଙ୍କର ଗୁଜୁରାଣ ମେଣ୍ଟାନ୍ତି। ସେମାନେ ଏହି ଚାଷକୁ ମୁଖ୍ୟ ଜୀବିକା ରୂପେ ଗ୍ରହଣ କରିଥିବାରୁ ବିଭିନ୍ନ ବ୍ୟାଙ୍କରୁ ଋଣ ଆଣି ଚାଷରେ ଲଗାଇଥିଲେ। ଠିକ୍ ଅମଳ ବେଳକୁ କରୋନା ଲାଗି ରାଜ୍ୟରେ ଲକ୍ଡାଉନ ଓ ଶଟ୍ଡାଉନ ଲାଗୁ ହେବା ଯୋଗୁ ଦୂରାଦୂରାନ୍ତରୁ ଆସି ବ୍ୟବସାୟୀମାନେ ଆସି ମକା କ୍ରୟ କରିପାରୁନାହାନ୍ତି । ଚାଷୀମାନେ ବି କେଉଁଆଡ଼େ ମକା ପଠାଇ ପାରୁନାହାନ୍ତି । ବିଗତ ବର୍ଷଗୁଡିକରେ ଏଠାର ମିଠାମକା ଜିଲା ସମେତ କଟକ, ଭୁବନେଶ୍ୱର ଏପରିକି କୋଲକତା ଏବଂ ମୁମ୍ବାଇକୁ ମଧ୍ୟ ପଠାଯାଇପାରୁଥିଲା। ମାତ୍ର ବର୍ତ୍ତମାନ ପରିସ୍ଥିତିରେ ଯାନବାହାନ ଚଳପ୍ରଚଳ ନ ହେବା ଯୋଗୁ ବ୍ୟବସାୟ ସମ୍ପୂର୍ଣ୍ଣ ଠପ୍ ହୋଇପଡ଼ିଛି। ଫଳରେ ଲକ୍ଷାଧିକ ଟଙ୍କା ଋଣ କରି ମକା ଚାଷ କରିଥିବା ଚାଷୀ କିପରି ଋଣ ଶୁଝିବେ ସେ ନେଇ ଚିନ୍ତାରେ ପଡ଼ିଛନ୍ତି। ତେଣୁ ସରକାର ସେମାନଙ୍କର ଋଣ ଛାଡ଼ କରିବାକୁ ଚାଷୀମାନେ ଅନୁରୋଧ କରିଛନ୍ତି। ମକାଚାଷୀ ମୁକୁନ୍ଦ ନାୟକ ଅନ୍ୟ ଚାଷୀମାନଙ୍କର ଅସୁବିଧା ଦର୍ଶାଇ ସରକାର ସେମାନଙ୍କ ଦୁଃଖ ବୁଝନ୍ତୁ ବୋଲି ଅନୁରୋଧ କରିଛନ୍ତି।