ଓ୍ବାଶିଂଟନ, ୧୩ା୧୦ (ଏପି)-ସୋମବାର ଟେନିସ୍ ର଼୍ୟାଙ୍କିଙ୍ଗ ତାଲିକା ପ୍ରକାଶ ପାଇଛି। ଫ୍ରେଞ୍ଚ ୍ଓପନ୍ ମହିଳା ସିଙ୍ଗଲ୍ସ ଟାଇଟଲ ଜିତିବା ପରେ ଡବ୍ଲ୍ୟୁଟିଏ ର଼୍ୟାଙ୍କିଙ୍ଗ ତାଲିକାରେ ପୋଲାଣ୍ଡର ଇଗା ସ୍ବିଟେକ୍ ୩୭ ସ୍ଥାନ ଉପରକୁ ଉଠି ଟପ୍ ୨୦ରେ ପ୍ରବେଶ କରିଛନ୍ତି। ସେ ତାଙ୍କ କ୍ୟାରିୟର ଶ୍ରେଷ୍ଠ ୧୭ତମ ସ୍ଥାନରେ ପହଞ୍ଚତ୍ପାରିଛନ୍ତି। ଫ୍ରେଞ୍ଚ ଓପନରେ ଭାଗ ନେବା ବେଳକୁ ୧୯ ବର୍ଷୀୟା ସ୍ବିଟେକ ୫୪ ର଼୍ୟାଙ୍କିଙ୍ଗପ୍ରାପ୍ତ ଖେଳାଳି ଥିଲେ। ୧୯୭୫ରେ ଡବ୍ଲ୍ୟୁଟିଏ କମ୍ପ୍ୟୁଟର ର଼୍ୟାଙ୍କିଙ୍ଗ ଆରମ୍ଭ ହେବାପରଠାରୁ ଏହି କ୍ଲେକୋର୍ଟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟରେ ସର୍ବନିମ୍ନ ର଼୍ୟାଙ୍କିଙ୍ଗ ଖେଳାଳି ହିସାବରେ ମହିଳା ଚାମ୍ପିୟନ ହୋଇଥିଲେ। ଫ୍ରେଞ୍ଚ ଓପନ୍ ପୂର୍ବରୁ ଯଥାକ୍ରମେ ପ୍ରଥମ ୩ ସ୍ଥାନ କରିଥିବା ଆସ୍ଲେ ବାର୍ଟି, ସିମୋନା ହାଲେପ୍ ଓ ନାଓମି ଓସାକା ର଼୍ୟାଙ୍କିଙ୍ଗ ତାଲିକାରେ ସେମାନଙ୍କ ସ୍ଥାନ ବଜାୟ ରଖିଛନ୍ତି। ସେରେନା ଓ୍ବିଲିୟମ୍ସ ୧୦ମ ସ୍ଥାନରେ ଅଛନ୍ତି। ରବିବାର ନୋଭାକ ଜୋକୋଭିଚ୍ଙ୍କୁ ପରାସ୍ତ କରି ଫ୍ରେଞ୍ଚ୍ ଓପନ୍ ଗ୍ରାଣ୍ଡସ୍ଳାମ ଟେନିସ ପ୍ରତିଯୋଗିତାର ପୁରୁଷ ସିଙ୍ଗଲ୍ସ ଟାଇଟଲ ଜିତିଥିଲେ ମଧ୍ୟ ରାଫାଲ ନାଡାଲ ଏଟିପି ର଼୍ୟାଙ୍କିଙ୍ଗ ତାଲିକାର ଦ୍ୱିତୀୟ ସ୍ଥାନରେ ରହିଛନ୍ତି। ଜୋକୋଭିଚ୍ ପ୍ରଥମ ସ୍ଥାନ ବଜାୟ ରଖିଛନ୍ତି। ତାଙ୍କ ପଛକୁ ଯଥାକ୍ରମେ ରହିଛନ୍ତି ୟୁଏସ୍ ଓପନ୍ ଚାମ୍ପିୟନ ଡୋମିନିକ୍ ଥିମ୍ ଓ ରୋଜର ଫେଡରର। ଅନ୍ୟପକ୍ଷରେ ନାଡାଲଙ୍କଠାରୁ ହାରିବା ପୂର୍ବରୁ କ୍ୟାରିୟରର ପ୍ରଥମ ଗ୍ରାଣ୍ଡସ୍ଲାମ୍ ସେମିଫାଇନାଲ ଖେଳିଥିବା ଆର୍ଜେଣ୍ଟିନାର ଡିଏଗୋ ସ୍କ୍ବାର୍ଜମ୍ୟାନ ପ୍ରଥମଥର ଏଟିପି ର଼୍ୟାଙ୍କିଙ୍ଗ ତାଲିକାର ଟପ୍ ୧୦ରେ ପ୍ରବେଶ କରିଛନ୍ତି। ସେ ୧୪ ତମ ସ୍ଥାନରୁ ୮ମକୁ ଉନ୍ନୀତ ହୋଇଛନ୍ତି। କ୍ରମାଗତ ଭାବେ ଦୁଇଟି ପ୍ରମୁଖ ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ପ୍ରବେଶ ଦ୍ୱାରା ଏହା ସମ୍ଭବ ହୋଇପାରିଛି।
